Yésʉs - Koonzime
Here are some extracts from a Koonzime translation of the Bible that talk about Jesus. The extracts are from the Gospel of Mark.

Mɑ́rkus
Mɑ́rkus
Mbɨɑ­mbɨɑ Lɔ́ɔ
ɨ́ Mɑ́rkus ɑ́ tile ě
1:1
Lɔ́ɔ̌ Yʉɑ́­nes Ndu-bʉr ɑ́ lɛ́ɛ ɛ̌
1 Etɛ́ɛ́rɨ́ é Mbɨɑ­mbɨɑ Lɔ́ɔ́ mó Yésʉs-Krîst, [Mwɑ̂n mó Zyɛ̌m].

1:14-15
Etɛ́ɛ́rɨ́ é syɛ́ɛ́ mó Yésʉs ɨ́ Gɑlɨlê
14 Píe tɨ, Yésʉs zě tô Gɑlɨlê, tô le elɛ́ɛ̌ Mbɨɑ­mbɨɑ Lɔ́ɔ lé eduho kwɑ́ mó Zyɛ̌m ɨ́. (Tínɑ̌ yé ɑ́ be ó Yʉɑ́­nes, nyé osí ɡbɑ́ŋɔ é mbʉʼ.)
15 Nye ɑ́ lɛ́ɛ-lɛɛ ó: «Jɔʼ, yí pyɑ̂l: Zyɛ̌m, mû ó kúnó­kúno le ecyêl Jøʼɑ yé é nkʉ́ʼʉ. Gwímɑ́ ɡɑ́ mobébe mɨ́n. Bɨ̌n bé ɑ dwír mɨ́léme. Búʼlɑ́ ɡɑ́ Mbɨɑ­mbɨɑ Lɔ́ɔ.»

1:21-27
Nkul mojøʼɑ mó Yésʉs
21 Bé zě tô Kɑper­nɑ́ʉm. É móhó sɑ́bɑt, bé zě nî é mpɑ́h mɨnjøʼlɑ. Yésʉs zě tɑ́ɑre lé edwe bʉ̂r mɨyéʼlɑ́ é mɨlɔ̌b mó Zyɛ̌m.
22 Bé ɑ́ be ó sí bǔl jéhě mbi mɨ́yéʼlɑ́ nyé ɑ́ dwe-dwe bé é, ebě nye ɑ́ yêʼle-yeʼle bé ó, e nkul mojøʼɑ̌ Zyɛ̌m ɑ́ dwe nye ě, ɑbě mpʉ óyêʼle o mótié bɔ́ɔ́.

23 É sɑ́mɑ́ bʉ̂r bé e boo nɔ́ɔ́ bé ɑ́ be é mpɑ́h mɨnjøʼlɑ ɛ̌, núú ɑ́ be ó, e bébe­bébe sísim. Nye zě bɑhle nkœ́mê. Nye ó:
24 «Hɛɛyɑ̂! Yésʉs, mʉr Nɑzɑ­rɛ̂t, bɨnɑ́ e ɡo bé e wɑ́ɑ̌ lɔ̌b ɛ́ɛɛ́? Go zé ó, zě sîl bɨ́h ɨ́? Mɨ́ dweʼe ɡo! Go ó Mʉr mó Zyɛ̌m ndɨ́ ti nwɑ́ ɔ́ɔɔ́!»
25 Yésʉs ntɔ̂ʼ bɑ̂m e sísim wɑɑ́. Nye e wé ó: «Diblɑ́ nʉm. Duhɑ́ mʉ̂r nɨ̌ é nyʉ̂l.»
26 Bébebébe sísim yɑɑ́ zě ncyeŋ mʉ̂r nɨ̌ e nkul, nye ntɔ̂ʼ bɑhlě bwɑʼ­bwɑʼ nkœ́mê. Yé ntɔ̂ʼ pʉʼɑ nyé é nyʉ̂l.
27 Bʉr bɨ́bɛ̂h zě jéhe, zě tɑ́ɑre lé elwiblɑ pɑ́ʼrɑ́ wɔ́ɔ́ ó: «Wɑ́ɑ̌ mbǐ lɔ̌b wî? Edwɑ́n é sikʉ́lʉ lǿŋlɑ́ e nkul mojøʼɑ ó nɨ̌ óo! Dɑ̌m be bɨ́bɨ̂blɑ mɨ́sísim, nye lé ebɑ́nɑ̌ jǿø e mye, myé bɑ́nɑ̌ sɑ̂ nyé mojóʼo!»

1:32-34
32 É bíí-kʉ̌ʼ yɑɑ́, bʉr ntɔ̂ʼ tô nyé yé e mɨsyôblʉ̌ myɔ́ɔ́ mímyɛ̂h le bʉr o bɑ́ jɑʼrɑ e moleme ě.
33 Bʉr ó nkɑnɑ yɑɑ́ bɨ́bɛ̂h zě fwɑ̂l bɑ̌ʼ e lʼebé é mbɛ̌r wɔ́ɔ́.
34 Nye zě tiʼ mɨ́syôblʉ̌ é buo buo myé ɑ́ be e mokpɑɑ é monyʉ̂l mɨmbi mɨmbi ɨ̌. Nye ɑ́ si pɛʼ buo­buo bʉ̂r moleme. Nó ó, nye ɑ́ si pɨr moleme mɑɑ́ mɨnʉm, ebě mé ɑ́ be ó lé edweʼe nye.

2:1-12
Yésʉs lé etǐʼ mbʉ́­mbʉ́ʼ
1 Píe bwɑ́ mólû, Yésʉs ntɔ̂ʼ bɑ̂ʼlě tô Kɑper­nɑ́ʉm. Bʉr zě jóʼo ó, nyí búlɑ, nye mû ó mbɛ̌r.
2 Buobuo bʉ̂r zě fwɑ̂l mbɛ̌r wé. Bé zě kœb ó, yé ɑ́ bé ɑkɑ̌ be e ɡúmó écyɛ̂b, dɑ̌m jóʼo ó, é lʼebê. Nó ó nyé ɑ́ ze dwe bé mɨyéʼlɑ́ é mɨlɔ̌b mó Zyɛ̌m.
3 Bʉ́ʉ́ bʉ̂r onɑ̂ zě pyɑ̂l épíhe kwɑ́ mó Yésʉs, lé eze le enkɛ́ɛ̌ mbʉ́­mbʉ́ʼ, wé ndɨ́ mbwɑmle é tɔɔ́.
4 Nó ó mpʉ bé ɑ́ bé ɑbeě ɡúmó bé cǿŋɨ é lɔ̌b mpúo bʉr ɨ̌, bé zě jʉ kʉ́, é mié mbɛ̌r Yésʉs ɑ́ be ě, túbɔ éɡʉ́ɑ́ é mié, ntɔ̂ʼ filɔ̌ tɔɔ́ syôblʉ̌ wɔ́ɔ́ tɨ̂ʼ é lʼeɡʉ́ɑ́.
5 Mpʉ̌ Yésʉs ɑ́ bee mpʉ bé ɑ́ jyɛ̂ʼ tɑ́ɑ́ búʼó yɔ́ɔ́ bóo nye ě, nye e mbʉ́­mbʉ́ʼ ó: «Mwɑ̂n wɑ̌m, bɨbɑɑ bɨ́ ébébe byô, bí pɛʼɔ!»

6 Nó ó é sɑ́mɑ́ óyêʼle o mótié e lʼoFɑri­zyɛ̂ŋ bé ɑ́ be tɨ̂ʼ ondî­ndǐl ɨ́, bʉ́ʉ́ zě tɑ́ɑre lé esôŋlo nye, le elɛ́ɛ é mɨlémé myɔ́ɔ́ ó:
7 «Mʉr nwɑ, nye lé elwib-lwib nó ebe yě? Mʉr nwɑ, nye lé ekʉ́ pyêh yɛ́ɛ Zyɛ̌m! Zé ndɨ́ e nkul epɛʼ bɨ́bɑɑ bɨ́ ébébě Zyɛ̌m lé eniʼe mʉ̂r ebe mɨ́syém myé é, píe nye mʉr tɨ?»
8 Yésʉs ɑ́ be ó sí kpɑ̂hbě ɡʉ́ɑ é sísim wé tʉ̂ŋlʉ̌ bɨjøʼ byɔ́ɔ́ bíbyɛ̂h. Nó ó nyé ɑ́ lɛ́ɛ e bé ó: «Wɑ́ɑ̌ mbi mósónó bɑ́ be bɨ́n é mɨléme bím yîʼ mpʉ̌ʼ ɨ́?
9 Yé ndɨ́ é kpɑ̂hbe lé esɑ̂? Le elɛ́ɛ e mbʉ́­mbʉ́ʼ mʉ̂r ó: ‹Bɨbɑɑ bɨ́ ébébe byô, bí pɛʼɔ›, nkʉ̂ lɛ́ɛ e wé ó: ‹Mʉŋɑ́ sí. Nkɛ́ŋɨ́ tɔɔ́ ɡô, kœ́ʼœ̂›?
10 Sɑ̂ ɡwɑ́r, mé ekpɛl ó, bɨ̌n ɡʉ́ŋɑ ó, Mwɑ̂n mó Mʉr ó ndɨ́ e nkul mojøʼɑ é sí nwɑ̂ʼ é lʼefú ó, nye pɛ́ʼɛ bʉr bɨbɑɑ bɨ́ ébébě Zyɛ̌m lé eniʼe bé ebe mɨ́syém myɔ́ɔ́ ɛ́...» Nye zě lɛ́ɛ e mbʉ́­mbʉ́ʼ ó:
11 «Me lé elɛ́ɛ ɡó ó: mʉŋɑ̂, ɡo ɑ nkɛ́ɛ́ tɔɔ́ ɡô, ɡo tôʼ kwɑ́r ɡǒ.»

12 Cyé e cyé, mʉr wɑɑ́ ntɔ̂ʼ mʉɑ sí, nkɛ́ɛ̌ tɔɔ́ wé, ntɔ̂ʼ kœ̂ʼ, bʉr bɨ́bɛ̂h lé ebee. Bʉr bɨ́bɛ̂h, bé ɑ́ si jéhe syɛ́ɛ́lɑ́ yɑɑ́, ntɔ̂ʼ dwíibɨ̌ Zyɛ̌m. Bé ó: «Bɨnɑ́ bé ɑpɑ̌ bee ɡɑ́ yʉ́ʉ́ sɔ́ʼɔ̌ nøølɑ e yi!»

4:35-41
Yésʉs lé ebɑ̂m e nkúo
35 É móhó nɡwɑ́r wɑɑ́, é jɔʼ dóbó lé ɑ́ kɔ́ɑ ɛ̌, Yésʉs, nye e lʼompʉ́n bé ó: «Ncʉ́ʼ ɡɑ̂. Bɨnɑ́ ntɑ́ŋɑ ɡɑ́ mɑ̂ŋ, tô é lʼebʉ́m é kɔ́m-nkɛ́ɛ́.»

36 Jɔʼ bé ɑ́ be, bé mû sí líʼe émɛl e bʉ̂r lɑɑ́ ɛ́, bé ntɔ̂ʼ tó kœ̌b Yésʉs é fúm nyé ɑ́ be é byɛ̂l ɨ̌. Bé e boo nɔ́ɔ́ ntɔ̂ʼ tô. Mʉ́ʉ́ mɛ̂l ntémé, mé ɑ́ be ó fúm byɛ̂l wɑɑ́, wé ɑ́ be ě.
37 Nó ó bwɑʼ­bwɑʼ nkúo ɑ́ tɑ́ɑre lé ekuulo. Obóʼó ó mɑ̂ŋ zě tɑ́ɑre lé esøø é byɛ̂l, byɛ̂l ntɔ̂ʼ tɑ́ɑre lé elôŋlo e modíbé, wé mû lé edɨ.
38 Nyɛɛ ɑ́ be ó nkǒ ndʉ́ɑ byɛ̂l, lé ejɑ̂ dwô, lʉ̂ kɛlɑ́ é lʼebóóló. Bé ntɔ̂ʼ jɨm nye. Bé e nye ó: «Yêʼle, bɨnɑ́ múno zě dwe ɡɑ. Zê sɑ̂ yɑɑ́ yé ɑlɛ́ɛ ɡwɔ́ɔ sɔ́ʼɔ̌?»

39 Yésʉs zě mʉɑ, ntɔ̂ʼ bɑ̂m e nkúo. Nye e mɑ̂ŋ ó: «Diʼé é puuu! É ɡʉ́ʼʉ́ʉ́!» Nkúo ntɔ̂ʼ síe. Sɑ́ yíyɛ̂h mû é myeéŋ.
40 Nye e lʼompʉ́n bé ó: «Ebe yé bɨ́n lé ejóʼo bʉ́ɑ́ ɛ́? Ebe yé bɨ́n bé ɑjyɛ̂ʼ tɑ́ɑ́ búʼó yín bóo me ɛ̌?»
41 Bé zě jóʼo bʉ́ɑ́ pɑŋ le elɛ́ɛlɑ pɑ́ʼrɑ́ wɔ́ɔ́ ó: «Wîʼ mbi mʉ̂r, wê zě, ndɨ́, nkúo e mɑ̂ŋ, bɑ́nɑ̌ sɑ̂ nyé mojóʼo wi?»

5:22-24
22 Núú mʉ̂r ɑ́ be ó cyɛ̂b efôʼ é mpɑ́h mɨnjøʼlɑ, díé lé, Yɑ́rwis. Nye ɑ́ si pyɑ̂l, zě beě Yésʉs. Mbeɑ́ nyé ɑ́ bee nye ě, nye zě dumɑ sí pɑ́ʼrɑ́ mokʉ̌ mé,
23 zě jøʼlɑ e nye e nkoó nyi­wɛ̂h ó: «Me líʼé mwɑ̂n wɑ̌m ó, nye mû tiʼ le efie. Nó ó, me lé ejøʼlɑ e ɡo ó, ɡo ntɑ̂ʼ. Bɨnɑ́ tôʼ. Go tôʼ kɛl nyé mobô é nyʉ̂l, nye nkʉ̂ʼ bɑ̂ʼlě sɑ̂ mbɨ̌­mbɨɑ́, tiʼe.»
24 Yésʉs ntɔ̂ʼ tô, bé e nɔ́ɔ́. Bé e mpɑ́­mpɑ́ʼ bʉ̂r, entúúnó-é-nkɑ́ɑ́, ebɑ­bub.

5:35-42
35 Yésʉs tínɑ̌ lé elwib nó nɛ́ʼɛ, mɨlʉ́mlʉ́ ntɔ̂ʼ duhǒ mbɛ̌r mó Yɑ́rwis. Myé zě lɛ́ɛ e cyɛ̂b efôʼ é mpɑ́h mɨnjøʼlɑ wɔ́ɔ́ ó: «Eséhé lô, lɨ́ dwe. Ebe yé ɡó lé ekɑ̌ bɑ̂ʼlě ntɨ̂ʼ yêʼle ě?»
36 Yésʉs nyɛɛ lé ekʉ́ jóʼo mókɑ̌n bé ɑ́ lɛ́ɛ ɛ̌, nye ɑ́ be yɛ́ɛ ó, ɑnʉɑ mé, ɡbɑ̂ é nkɔb. Nye zě lɛ́ɛ e njǿø mpɑ́h mɨnjøʼlɑ ó: «Ayí jóʼo bʉ́ɑ́. Jyɛ́ʼɛ́ tɑ́ɑ́ búʼó yô bóo me.»
37 Nye zě kɑmle bʉ̂r lé edû nye. Nye ɑ́ kʉ mɛʼle ó, njɨ Pyɛ̂r, Jɑcques ndwe e ncyóm wé, Yʉɑ́­nes, ó bé e boo nɔ́ɔ́ tôʼ.
38 Bé ntɔ̂ʼ nî mbɛ̌r mó njǿø mpɑ́h mɨnjøʼlɑ. Yésʉs ntɔ̂ʼ bee ó, tɨ̂ʼ yé ɑ́ be ó, yé mû é leŋé leŋé, bʉr lé ekɑhle módwê le ebøhlɑ é buo buo.
39 Yésʉs nî mbɛ̌r, zě lɛ́ɛ e bé ó: «Ebe yé bɨ́n lé ekɑ̌ sɑ̂ óleŋé­leŋé mpʉnʉ̂ le ejɨ módwê ě? Mwɑ̂n, nyé ɑdwe. Nye é dwô.»

40 Bé zě dwo nyé é cɑ́ cɑ́ cɑ́ le esôŋlo nye. Nye zě pyɛ̂l bɨ́bɛ̂h kʉ̌l. Yé ɑ́ kʉ lîʼ tɨ̂ʼ ó, njɨ sɔ́ŋ e nyɔ̌ŋ mwɑ̂n, e bʉr ó sɑ́mɑ́ yé. Bé zě nî é tíʼé, fúm mwɑ̂n ɑ́ be ě.
41 Nye ntɔ̂ʼ mɛ̂r mwɑ̂n wɑɑ́ é mbô. Nye e nye ó: «Tɑlitɑ, kumi!» (Nó ó yé elɛ́ɛ ó: «Mɑ̂ mʉmɑ́, me lé elɛ́ɛ e ɡo ó: mʉŋɑ̂.»)

42 Cyé e cyé, eséhe lɑɑ́ zě mʉɑ, ntɔ̂ʼ tɑ́ɑrě cen, ebě nye ɑ́ be ó, nye mû mɨmbû ewʉ̂m e mɨmbɑ́. Bʉr bɑɑ́ zě jéhě syɛ́ɛ́lɑ́ yɑɑ́ é buo buo.

7:18-23
18 Nó ó nyé ɑ́ lɛ́ɛ e bé ó: «Zê bɨ̌n tínɑ̌ wɑ̂ʼ ó, lúʼó pɨ̂ʼ? Zê bɨ̌n bé ɑɡʉ́ɑ ó, ntʉ́ʼ sɑ́ lé eduhǒ kʉ̌l, nî é nyʉ̂l mʉr, lé elœʼ nyé é míh mó Zyɛ̌m ɨ́?
19 Ebě yé ɑnî nyé é léme tʉ̂ŋlʉ̌. Yé enî ó, é mo, kɑ̌ pyɑ̂l kʉ̌l.» (É lwǐb yɑɑ́, Yésʉs ɑ́ be lé ekpɛl elɛ́ɛ ó, mode mɨ́mɛ̂h mû ó sí pubɔ.)

20 Nó ó nyé ɑ́ bɑ̂ʼle lɛ́ɛ e bé ó: «Sɑ́ lé epɑ̂m mʉ̂r é nʉm ɨ̌, yé ó lé elœʼ mʉ̂r.
21 Ebě ebébe ndwe e bɨbébe­bébe bɨ́jøʼ bíbyɛ̂h, byé eduho ó, é nyʉ̂l mʉr tʉ̂ŋlʉ̌, lé etɨ̂ é lémé wé. Byé ó:
bɨmɑlɑ́,
díbe,
ejǿǿ é bʉ̂r,
mɨfyɛbɑ,

22 zɔ́ɔ́ bɨ́sɑ̂,
bɨ̌n,
bɨlwǐb bɨ́kʉ́ʉ́ŋʉ́,
bɨlwǐb bɨ́ fúlʉ̂s,
eɡú,
movóʼ,
mobún e nkɛ́ɑ́ nyʉ̂l,
ompʉ́.

23 Bɨsɑ́ bɨ́nɨ̌ bíbyɛ̂h, byé eduho mʉ̂r ó, é nyʉ̂l tʉ̂ŋlʉ̌, ntɔ̂ʼ sîl élœʼ nye.»

9:2-8
Yésʉs lé esíilɑ nyʉ̂l
2 Molú tóbó mé osí lɑɑ nɛ́ʼɛ, Yésʉs zě nʉɑ̌ Pyɛ̂r, bé e Jɑcques ndwe e Yʉɑ́­nes. Nye zě tô e bé é bwɑʼ­bwɑʼ écø̂ʼ. Bé ɑ́ be ɡʉ̂ʼ ó, bé omé. Nye zě síilɑ nyʉ̂l é míh mɔ́ɔ́. Nye ɑ́ be ó, nye mû dɨ̌ nyîn mbi fîh.
3 Mɨkɑ́n myé, myé ɑ́ be ó lé ebǔl pɑn, myé mû é pumo pumo, kɑ̂r tʉɑ e mʉr é sí nwɑ̂ʼ ndɨ́ e nkul eliŋ mɨ́kɑ́n myé é pumo pumo mbi wɑɑ́.
4 Nó ó Éli, bé e Moyɨ̂z, bé ɑ́ ze nyîn ɡúmó bé ɑ́ be ě, Yésʉs, bé e boo nɔ́ɔ́ zě lɛ́ɛlɑ.
5 Nó ó Pyɛ̂r ɑ́ ze lɛ́ɛ e Yésʉs ó: «Yêʼle, yé é lɑŋlě mbɨɑ ó, bɨnɑ́ díʼe ɡɑ́ wɑ̂. Bɨnɑ́ fúmɑ ɡɑ́ pɛr, bɨsɑʼ bɨlɛ̂l: le yô, le yɑɑ́ mó Moyɨ̂z ndwe e yɑɑ́ mó Éli!»

6 (Nye ɑ́ bé ɑɡʉ́ɑ̌ sɑ́ nyé ɑ́ jɑlɑ le elɛ́ɛ ɛ̌, ebě bé e bʉ́ʉ́ ómpʉ́n, bé ɑ́ be ó lé ebǔl jóʼo bʉ́ɑ́.)

7 Dwiné zě búuro be. Ompʉ́n, bé kɑ̌ jóʼo ó, núú twíí lé eduho é dwiné tʉ̂ŋlʉ̌, lé elɛ́ɛ ó: «Nwɑ̂ʼ, nye ó mwɑ̂n kpɛ̌l wɑ̌m. Jóʼɑ́ ɡɑ́ nye.»
8 Cyé e cyé yɑɑ́, ómpʉ́n kɑ́ dwɛ̂ʼlɑ nɛ́ʼɛ, bé kɑ̌ bee ó Yésʉs, nyé osí lîʼ njɨ nye omé.

12:28-31
Etié lé entɑɑ mótié mɨ́mɛ̂h ɛ̌
28 Núú yêʼle motié ɑ́ be ó sí jóʼǒ mpʉ bé e boo nɔ́ɔ bé ɑ́ be lé epɨ́rɑ mókɑ̌n ɨ́. Nye ɑ́ be ó sí bee ntémé ó, Yésʉs ɑ́ si ɡʉ́ɑ bɨhɑ. Nye ntɔ̂ʼ dî e nye ó: «É motié ɡɑ́ mɨ́nɑ́, lɑ́ɑ étié lé elɑɑ mótié mɨ́mɛ̂h ɛ̌?»
29 Nó ó Yésʉs ɑ́ bɨhɑ e nye ó: «Etié lé entɑɑ mótié mɨ́mɛ̂h, lé ó: ‹Jóʼɑ́ ɡɑ̂, bwɑ́ bé Ɨ́zrɑɛ̂l: Dɑ̂, Zyɛ̌m ɡɑ́ wínɑ́, nye ó ndɨ́ Zyɛ̌m nye omé.
30 Kpɛlɨ́ Dɑ̂, Zyɛ̌m ɡǒ, e lémé ɡô wíwɛ̂h, le sísim ɡô wíwɛ̂h, le pɨʼ ɡǒ nyi­wɛ̂h, le nkul ɡǒ nyi­wɛ̂h.› »
31 Yésʉs ntɔ̂ʼ lɛ́ɛ ó: «Etié embɑ́, lé ó: ‹Kpɛlɨ́ mɨ́ɔ̌ ɡǒ mʉr mpʉ ɡó lé ekpɛl ɡó mʉr tɨ̂ʼ ɨ̌.› Yé ɑbe e lʉ́ʉ́ étié lé entɑɑ̌ mɑɑ́ mónɨ̌.»

14:10-11
10 Nó ó Yʉ́dɑs Iskɑ­riôt, núú mpʉ́n é sɑ́mɑ́ ómpʉ́n ewʉ̂m e lʼobɑ́ mó Yésʉs, ɑ́ ze tô kwɑ́ ojǿø o Mpɑ́h Zyɛ̌m, ó nyě kɛhɑ ó bé Yésʉs.
11 Mpʉ bé ɑ́ jóʼo nó é, bé ntɔ̂ʼ bǔl soho. Bé ntɔ̂ʼ kɛʼ ó, bé ójɛ́nɑ nyé syɛ́ɛ́lɑ́ yɑɑ́, dwe nyé mɔ̌n. Yʉ́dɑs ntɔ̂ʼ sɑ́ɑ̌ mpɑ̌ŋ jɔʼ ékɛhɑ̌ Yésʉs.

14:44-46
44 Yʉ́dɑs, mʉr ɑ́ kɛhɑ Yésʉs ɨ̌, ɑ́ be ó sí bɛɑ́ tɨ́e bʉ̂r bɑɑ́ ó: «Bɨ̌n bé ódweʼe nyé ó, mbi wi: mʉr bɨ́n bé óbee mé lé edû émúʼ lé e nʉm ɨ̌, nye ó nɨ̌! Nye ó bɨ́n lé ejɑlɑ le enɑʼ móbô, tô e nye ě.»
45 Jɨ́h tɨ̂ʼ Yʉ́dɑs ɑ́ kʉ pyɑ̂l, nye ntɔ̂ʼ dîhlě bɑ̌ʼ e Yésʉs, ntɔ̂ʼ lɛ́ɛ ó: «Yêʼle!» Nye ntɔ̂ʼ dû nyé emúʼ é mpyɔ̂ʼ.
46 Bʉ́ʉ́ bɛ́ɛ ntɔ̂ʼ nɑʼ nyé mobô, mɛ́rɔ nye.

15:6-15
6 Nó ó yé ɑ́ be-be ó, é jɔʼ ébʉ̂ʼ lɑɑ́, lé ɑ́ pyɑ̂l-pyɑl ɨ̌, Pilɑ̂t ɑ́ be-be ó lé ebîr-bir bé mbʉʼ nɡwɑ́r, wɑɑ́ bʉ̂r, bé ɑ́ ɡø̂m-ɡøm ó, nye bírɨ ɨ̌.
7 Gúú mbʉʼ, wé ɑ́ be ó tɨ̂, díé lé, Bɑrɑ́­bɑs. Nye ɑ́ ɡbɑ́ŋɔ ɨ́ mbʉʼ ó, ɨ́ lɔ̌b bɨ́ntʉ̌ bé e bʉr bé, bé ɑ́ sɑ̂ ɛ̌. Bé ɑ́ si jʉ̂ mʉr é jɔʼ bé ɑ́ sɑ̂ bɨntʉ̌ byɑɑ́ ɛ́.
8 Nó ó mpɑ́­mpɑ́ʼ bʉ̂r, yé ɑ́ ze bére ecø̂ʼ lé etó dî e Pilɑ̂t ó, nye dwêʼ bé sɑ́ nyé ɑ́ bɛɑ dwe-dwe bé é mbi ébʉ̂ʼ lɑɑ́ ɛ́.
9 Pilɑ̂t zě bɨhɑ e bé ó: «Zê bɨ̌n bé eɡø̂m ó, me bírɨ bɨ̌n wɑɑ́ lé ejébɔ ó, ‹njǿø oYʉ́den› ě?»
10 (Nye ɑ́ lwib nó ó, ebě nye ɑ́ be ó sí bee ó, ojǿø o Mpɑ́h Zyɛ̌m, bé ɑ́ pur Yésʉs ó, ebe zíí.)

11 Nó ó ójǿø o Mpɑ́h Zyɛ̌m bé ɑ́ sôʼlo emɛl e bʉ̂r ó, lé díʼe ó, nye bírɨ bé mʉr ó, njɨ Bɑrɑ́­bɑs.
12 Pilɑ̂t ntɔ̂ʼ bɑ̂ʼlě dî. Nye ó: «Á nó ó, wɑɑ́ bɨ́n lé ejébe-jebe ó, ‹Njǿø oYʉ́den› ɨ̌, me sɑ̂ʼ nye nyɑ̌?»
13 Bé ntɔ̂ʼ bɑ̂ʼlě kʉ́ bɨ̂ʼlɑ kʉ́ kʉ́ lé elɛ́ɛ ó: «Cyelɨ́ nyé é klôs kʉ́.»
14 Pilɑ̂t ntɔ̂ʼ dî e bé ó: «Ebě yě? Nye sɑ́ yɑ́ɑ̌ sɔ́ʼɔ̌ ndɨ́ é bébe?» Bé ntɔ̂ʼ bɑ̂ʼlě kʉ́ bɨ́rɔ mótwíí kʉ́, lé elɛ́ɔ ó: «Cyelɨ́ nyé é klôs kʉ́!»
15 Mpʉ̌ Pilɑ̂t ɑ́ bee ó, nyě fuó kolo ó emɛl e bʉ̂r ɨ̌, nye kɑ̌ zě bîr bé Bɑrɑ́­bɑs. Jɔʼ nyé ɑ́ be sí lómo bʉ̂r ó, bé fúurɑ Yésʉs mɨmbíhé ɨ́, nye zě líʼě nʉm ó, bé tôʼ cyel nyé é klôs kʉ́.

15:33-39
Efie mó Yésʉs
33 É jɔ̌ʼ témé móhó, yé ɑ́ pyɑ̂l ɨ̌, edúrʉ́ ntɔ̂ʼ fulo é sí nyi­wɛ̂h, tó pyɑ̂l é mowɑlɑ molɛ̂l mó bíí-kʉ̌ʼ.
34 É mowɑlɑ molɛ̂l mɑɑ́, Yésʉs zě bʉ̂ bɨ́tím, lé elɛ́ɛ ó: «Eloyɨ̂, Eloyɨ̂, lɑmɑ sɑbɑk­tɑ́ni?» (Nó yé elɛ́ɛ ó: «Zyɛ̌m wɑ̌m, Zyɛ̌m wɑ̌m, ɡǒ kɑ̌ myɑh mé ebe yě?»)

35 Bʉ́ʉ́ bʉ̂r o bɑ́ be tɨ̂ʼ ɨ̌, mpʉ bé ɑ́ jóʼo mpʉ nyé ɑ́ tíme é, bé ó: «Jóʼɑ́ ɡɑ́: nye mû ó lé ejébě Éli.»
36 Núú mʉ̂r zě tô kɑ̂m, tó dubo éponɡe é bɨkɛ̌ʼlɑ mónwoʼ, zě pɛn lé é péh sʉŋ, ntɔ̂ʼ cen nyé lɑ̌ ó, nye dúʼo. Nye ó: «Bónɑ́ ɡɑ̂. Bɨnɑ́ pɑ̂ʼ bee ɡɑ́ yínɨ̌, nkʉ̂ Éli óbɛ̌m pyɑ̂l, zě fil nyé sí!»
37 Nó ó Yésʉs ɑ́ ze tíme kʉ́ kʉ́, ntɔ̂ʼ fǐl sø̂h.

38 É jɔʼ yɑɑ́, kɑ́n ébê, wé ɑ́ be-be cyelɑ́ é Mpɑ́h Zyɛ̌m Yeró­se­lɛm ɨ̌, wé ntɔ̂ʼ nyɛɛ é wɛɛɛ́b bɨpéh bɨ́bɑ́, tɑ́ɑre kʉ́, pyɑ̂l sí.
39 Njǿø nter bɨ́zimɑ ɑ́ be cɨ̂cyěl é míh mó Yésʉs ɨ̌, mbeɑ́ nyé ɑ́ bee mpʉ̌ Yésʉs ɑ́ fil sø̂h ɨ̌, nye ó: «Mʉr nwɑ̂ʼ ɑ́ bɑ́nɑ kʉ be ó Mwɑ̂n mó Zyɛ̌m!»

15:42-46
Dɨlɑ́ mó Yésʉs
42-43 É jɔ̌ʼ bíí-kʉ̌ʼ, yé ɑ́ pyɑ̂l ɨ̌, Yóseb mʉr nkɑnɑ̌ Ari­mɑtê zě pyɑ̂l. Nyɛɛ ɑ́ be ó mʉr nɨ́nɨ́ é bʉm nɨ́nɨ́ oYʉ́den. Nye ɑ́ be ó lé ejóʼǒ dwéh ébeě Zyɛ̌m lé ecyêl Jøʼɑ yé é nkʉ́ʼʉ. Yé ɑ́ be ó titír, móhó bé ɑ́ jɑ̂m-jɑm mode bé óde é sɑ́bɑt ɨ̌. Ebe nó ó Yóseb ɑ́ tô jɑʼ Pilɑ̂t múú mó Yésʉs, ɑbɑ́ɑ̌ sɔ́ʼɔ̌ ɛ́.
44 Pilɑ̂t ɑ́ be ó sí bǔl jéhe lé ejóʼo ó, Yésʉs, nyí lɨ̌ dwe. Nó ó nyé ɑ́ jébe njǿø nter bɨ́zimɑ, lé edî nyé nkʉ̂ Yésʉs ɑ́ si kʉ bɑ́nɑ dwe.
45 Jɔʼ nyé ɑ́ be sí jóʼo mpɨ́hɑ njǿø nter bɨ́zimɑ ɛ̌, nye ntɔ̂ʼ mɛʼle ó, Yóseb tôʼ nʉɑ̌ múu.
46 Yóseb zě tó bwɑ̂m ndómó, ntɔ̂ʼ tó fǐl Yésʉs sí, dîble nyé e ndómó wɑɑ́. Nye ntɔ̂ʼ tó dɨ̌l múu é nɡuʼ ékóʼ. Píe tɨ, nye ntɔ̂ʼ bîŋle lʉ́ʉ́ ékóʼ, búurǒ nʉm fóo e tɨ.

16:1-7
Epɑh e fóo mó Yésʉs
1 É jɔ̌ʼ móhó sɑ́bɑt, wé ɑ́ be sí lɑɑ ɛ̌, Mɑɑ­ríɑ, silě Mɑɡ­dɑlɑ̂, le Mɑɑ­ríɑ nyɔ́ŋ mó Jɑcques ndwe e Sɑlʉ́mɑ, bé ɑ́ be ó sí tó bwɑ̂m lɑbínɑ ó, bé ótó lœ̌m múú mó Yésʉs.
2 É mɛ́n sóno, é mobɔ́ɑ mo dóbo, bé zě tô nko fóo.
3 Bé ɑ́ tô le edíilɑ pɑ́ʼrɑ́ wɔ́ɔ́ ó: «Zé nyɛɛ óbîŋle bɨ́nɑ́ ɡɑ́ ekóʼ ndɨ́ é nʉm fóo ě?»

4 Bé kɑ́ dwɛ̂ʼ nɛ́ʼɛ, bee ó, ekóʼ énɨ́nɨ́ lɑɑ́, lé osí bîŋlɔ, lé mû é lʼempɑh!
5 Bé zě nî é foo, tó kœb núú mɑ̂ sohó ndî­ndǐl é pɑ́ʼ mbó éjʉ̂m e kɑ́n é pumo pumo é nyʉ̂l. Bé ntɔ̂ʼ lɑŋlě jóʼo bʉ́ɑ́.
6 Nó ó wé ɑ́ lɛ́ɛ e bé ó: «Ayí jóʼo ɡɑ́ bʉ́ɑ́. Bɨ̌n bé lé esɑ́ɑ ó, Yésʉs, mʉr Nɑzɑ­rɛ̂t, wɑɑ́ bé ɑ́ cyel é klôs kʉ́ ɨ́. Nyí pɑh! Nyé ɑkɑ̌ be wɑ. Pɑ̌ʼ bee ɡɑ́ fúm bé ɑ́ jyɛ̂ʼ múú wé é!
7 Tóʼ ɡɑ̂. Tó lɛ́ɛ ɡɑ́ ompʉ́n bé ndwe e Pyɛ̂r ó: ‹Nyí sɑ̂mle, lé etô bóno bɨ́n ɨ́ Gɑlɨlê! Gʉ̂ʼ ó bɨ́n bé óbee nyé ɨ́ mpʉ nyé ɑ́ bɛɑ lɛ́ɛ bɨ̌n ɨ́.› »

16:15-16
15 Nó ó nyé ɑ́ lɛ́ɛ e bé ó: «Tóʼ ɡɑ́ é sí nyi­wɛ̂h, lé etô le elɛ́ɛ̌ Mbɨɑ­mbɨɑ Lɔ́ɔ é mɨlɑl mímyɛ̂h Zyɛ̌m ɑ́ cyê ě.
16 Wɑɑ́ ójyɛ̂ʼ tɑ́ɑ́ búʼó yé bóo me, ntɔ̂ʼ nʉɑ̌ ndubó é, nye ó nɡʉ́ tiʼe. Wɑɑ́ óbe, ɑjyɛ̂ʼ tɑ́ɑ́ búʼó yé bóo me ě, nye ódweŋɔ bɨ́ntɨ́ʼɑ́ ndɨ́ é lɑŋlě bébe ě.

16:19-20
Yésʉs lé ebére é jóbo
19 É jɔ̌ʼ Dɑ̂ Yésʉs ɑ́ be, nyé osí lwib e bé nó é, Zyɛ̌m ntɔ̂ʼ zě nʉɑ nye, tô e nye é jóbó kʉ́, tó dil nyé é mbó éjʉ́m wé.
20 Nó ó ómpʉ́n bé, bé ɑ́ tô le elɛ́ɛ Mbɨɑ­mbɨɑ Lɔ́ɔ é ɡúmó yíyɛ̂h ɛ̌. Píe lɔ́ɔ́ bé ɑ́ lɛ́ɛ ɛ̌, Dɑ̂ Yésʉs ɑ́ ntɨh-ntɨh mosimɑ́ ó, mɑɑ́ lé eboʼlo ó, lɔ́ɔ́ wɔ́ɔ́, wé ɑ́ kʉ be ó cye­cye ě.]