An alwa' tʼilab xin dhutsám na
Markos
1.1
Na Juan xu pujax u tʼiltsix ban chabál xon ti yab kʼwajtsidh
(Mt. 3:1-12; Lk. 3:1-9, 15-17; Jn. 1:19-28)
1.1 Enché' ti kʼwajat dhutsadh xan ti tujey an alwa' tʼilab kʼal tin kwenta xowa' in tʼaja' na Jesukristo, nin Chakámil na Dios.

1.14-15
Na Jesús in tujúch Galilea nin tʼojlábil
(Mt. 4:12-17; Lk. 4:14-15)
1.14 Tayíl, tam ti balidhich na Juan ban wikʼaxte', na Jesús kʼale Galilea. In tʼila' taja' an alwa' tʼilab xin ulal xan tu takʼix na Dios.
1.15 In ulu enché':
―Xo' in bajúch xowkʼi ne'ech ka tujéch ti takʼyáb an iniktsik kʼal na Dios. Ka jila'ichtsik ta walablom ani ka bela'ichtsik an alwa' tʼilab.

1.21-27
Jun i inik xi ochadh kʼal i atʼax ejattaláb
(Lk. 4:31-37)
1.21 Kʼaletsik tám ban bitsow Kapernaúm ani tam tin bajúch nin kʼítsájil an koyóxnich, na Jesús ochich ti okʼtsix ban atá xon tu tʼajnal an junkuntaláb.
1.22 Labantsik tʼajat xin achʼa' xan tu okʼtsix na Jesús abal u okʼtsix kʼal yantam i awiltaláb ani yab jelti an okʼtsixtsik xin wilál nin takʼixtal na Dios xin jilám dhutsadh na Moisés.
1.23 Tá' jeye ti kʼwajat altá xon tu tʼajnal an junkuntaláb, jun i inik xi ochadh kʼal jun i atʼax ejattaláb ani dhájaxin kawidh enché':
1.24 ―¿Jantʼéy a lé' kʼal wawá', Jesús xi Nasaret? ¿I tsi'nekxe' abal ti ku kʼibdha'? Naná' tu exlál ani u cho'ób ke Tatá' i Tʼokat Chakámláb kʼal na Dios.
1.25 Kʼwiyan tám enché' an atʼax ejattaláb kʼal na Jesús:
―¡Ki chamkʼan ani ki kale ba jeché' an inik!
1.26 An atʼax ejattaláb in wipipindha' chapik an inik, dhájan kawidh ani támkʼi ti kale ba jachan' an inik.
1.27 Ejtal an atiklábtsik laban tʼajat ani u útsáxtsik enché':
―¿Jantʼéy in lé' kin ulu jeché' xowa' támun? ¿Jantʼom ít okʼtsixtaláb xin okʼtsixnál? ¡Abal Jajá' in ko'ol i awiltaláb kin utsa' ka kale an atʼax ejattaláb ani u axtsinal!

1.32-34
Na Jesús in jeldha' yán i ya'ultsik
(Mt. 8:16-17; Lk. 4:40-41)
1.32 Tam ti ochenekich na kʼítsá ani jikʼwchinékich, júntsin xon ti kʼwajat na Jesús ejtal an ti ya'ultsik ani ejtal jeye xi ochadh kʼal i atʼax ejattalábtsik.
1.33 Ejtal an atiklábtsik xi ba jachan' an bitsow, junkun tin tamét in wi'lébil an atá.
1.34 Jeldhá kʼal na Jesús yán i ya'ultsik kʼal xowa'kich i yaw'láchtsik xin ko'ol ani káldhantsat jeye yán ti atʼax ejattaláb xi kʼál ti ochadhtsik. Na Jesús u exláb kʼal an atʼax ejattalábtsik, jaxtám na Jesús yab in walka' kin ulutsik xitam já' jeye Jajá'.

2.1-12
Na Jesús in jeldha' jun i inik xi yab in ejtowal ka yoyon
(Mt. 9:1-8; Lk. 5:17-26)
2.1 Tayíl, tam ti watʼenekich cháb óx a kʼítsá, witsiy juní na Jesús ban bitsow xi Kapernaúm. Tam ti cho'óbná abal ta' ti kʼwajat ban atá xon tu kubél,
2.2 jikʼatkʼi ti junkun yán i atiklábtsik ke nibalich ejtidh tin tamét in wi'lébil an atá ani Jajá' in tʼiltsaltsik tin káwintal na Dios.
2.3 Ulich tám i iniktsik xin tsi'dhál jun i ya'ul inik xi yab in ejtowal ti belal. Kitámte tu tsi'dháb bin chayté'il kʼal ché' ti éb.
2.4 In lé'wi'ik kin ódha'tsik altá xon ti kʼwajat na Jesús, por yab in ejtotsik abal ta' ti kʼwajat yán i atiklábtsik. Xowa' in tʼaja'tsik tám, kʼadhiytsik tin éb an atá ani in wixkʼintsi wé' tin jujúl. Taja' tin ódha' ani tin pa'ba' an ya'ul kʼal nin chayté'il asta xon ti kʼwajat na Jesús.
2.5 Tam ti na Jesús in chu'u xantʼéy in tʼaja'tsik, in cho'óbna' abal u belnal kʼal jajá'tsik; jaxtám tin utsa' enché' an inik:
―Ja'úb, na walastalábil pakwlantsidh ti kʼwajat.
2.6 Tá' jeye ti buxutsik cháb óx i okʼtsixtsik xin wilál nin takʼixtal na Dios xin jilám dhutsadh na Moisés xin chalpayaltsik enché':
2.7 “¿Jantʼókʼi tu káw yab alwa' jeché' an inik? Abal u káw jelti max u Dios. Tokot a Dios in ejtowal ti pakwlantsix an ti walastaláb.”
2.8 Por na Jesús in cho'óbna' xantʼéy u chalpantsáb kʼal an okʼtsixtsik ani in utsa'tsik enché':
―¿Jantʼókʼi tin chalpantsal anchan'?
2.9 ¿Jowa' más yab tʼojláb ku utsa' an ya'ul: “Na walastalábil pakwlantsidhich ti kʼwajat”, o ku utsa': “Ki chʼakay, ka dhaya' na chayté'il ani ki beley”?
2.10 Pos ne'ech tu xalkʼantsitsik ke Naná', xin abadh abal kin wenkʼon neye tin inik, u ko'ol i awiltaláb teché' ti chabál abal ku pakwlantsi i walastalábtsik.
Utsan tám enché' an ya'ul kʼal na Jesús:
2.11 ―Ki chʼakay, ka dhaya' na chayté'il ani ki kʼaléch ta kʼimá'.
2.12 Chʼakay tám an inik, in dhaya' nin chayté'il ani kaléch tám tin tamét ejtal an atiklábtsik. Ejtal xi taja'tsik ti kʼwajat, laban tʼajat, in pubédhantsaltsik tin bij na Dios ani in ulaltsik enché':
―Yab jaykʼi i chu'úmal jun xata' jelti jeché'.

4.35-41
Na Jesús in kubdha' ti waw'nal an ikʼ ani ti múlákʼ an ja'
(Mt. 8:23-27; Lk. 8:22-25)
4.35 Tam ti dhamúch jachan' a kʼítsá, in utsa' enché' nin exóbaliltsik:
―Wana ku watʼey jun pakʼe' pujal.
4.36 In jila' tám an atiklábtsik xi ta' ti kʼwajat bin wál an pujal ani kʼaletsik kʼal an tan xon ti kʼwajat balidh. Tá' jeye ti kʼwajat i atiklábtsik ba kʼe'et i tantsik ani kʼale jeye kin junikna' na Jesús.
4.37 Jun jikʼtowále ti tujey ti waw'nal jun i chapik ikʼ ani in múlákʼindha' an ja'. Ochich an ja' ban tan ke asta wé'ich tʼajat ka tsʼutsich an tan kʼal an ja'.
4.38 Na Jesús kʼwajat ti wayal ba jun i latsikʼláb tin kúx an tan. Bakyat tám kʼal nin exóbaliltsik ani utsan enché':
―¡Okʼtsix! ¿Yabxe' a ódhál ti kwenta max ku lupun?
4.39 Chʼakay tám na Jesús in kʼwiya' an ikʼ ani in utsa' enché' an pujal:
―¡Ki chamkʼan! ¡Yabich ki kʼuchun!
Támkʼi ti kublan ti waw'nal an ikʼ ani jilkʼon chamamadh tʼajat.
4.40 Utsan tám enché' an exóbaltsik kʼal na Jesús:
―¿Jantʼókʼi ta jikʼéltsik ani jantʼókʼi ti yabtsik tin belál?
4.41 Jikʼeytsik tʼajat ani u útsáxtsik jún ani jún enché':
―¿Jantʼom awiltaláb in ko'ol jeché' an inik abal u axtsinal tam kin tawna' an ikʼ ani an pujal?

5.22-24
5.22 Ulich jun i inik xin bij ta Jairo xu okʼlek jeye ban atá xon tu tʼajnal an junkuntaláb. Tam ti chu'tat na Jesús, tudhlan na Jairo tin tamét
5.23 ani pakabédhá enché':
―Nu tsidhánil exomich ti chemel, jala' ka puntsi an ta kʼubak bin tʼu'úl abal ka jeley ani yab ka chemech.
5.24 Kʼale tám na Jesús kʼal na Jairo ani yán kʼale ti juniknax. Kʼal nin yaníl an atiklábtsik, u nichʼokʼnábich tʼajat na Jesús.

5.35-42
5.35 Tam ti na Jesús bél kʼwajat ti tʼilom, ulich cháb óx i iniktsik xi tál tin kʼimá' na Jairo ani utsan enché':
―Na tsidhánil chemech, yabich ka tʼojliy an Okʼtsix.
5.36 Na Jesús in achʼa' xowa' ulwat ani in utsa' enché' na Jairo:
―Yab ki kʼwajay ta chalpax, ka bela' tokot abal Naná' ne'ech ku ejto tu tolmiy.
5.37 Kʼale tám na Jesús kʼal na Jairo ani tokot in walka' ka junikná kʼal na Pedro, na Jakobo ani na Juan, nin kidháb na Jakobo.
5.38 Tam ti ulich bin kʼimá' jachan' an inik xu okʼlek ban atá xon tu tʼajnal an junkuntaláb, in achʼa' abal kʼíbalich tʼajat an ukʼil ani an dhajal abal chemech an tsidhan.
5.39 Ochich tám na Jesús ban altá ani in utsa'tsik enché':
―¿Jantʼókʼi ta ukʼnaltsik ani ta dhajnaltsik? An tsidhan yab chemnek, u wayalkʼi ti kʼwajat.
5.40 Jajá'tsik in labídhna'kʼi tokot na Jesús. Utsantsik tám kʼal na Jesús abal ka kale ejtal eléb, ochich ban altá xon ti kʼwajat an tsidhan junkímte kʼal an táta'láb, an nána'láb ani xi kʼalnek an ti junkiltsik.
5.41 In téynantsi tám tin kʼubak an tsidhan ani káwin arameo enché':
―Talita, kumi. Ti tének káw, in lé' kin ulu: Tsidhan, ki chʼakay.
5.42 Támkʼi ti chʼakay ani beley jachan' an tsidhan xin ko'ol lajucháb i tamub ani ejtaltsik xin chu'u jeché', labantsik tʼajat.

7.18-23
7.18 Utsantsik enché':
―¿Yabxe' teye a exbayámaltsik? ¿Yabxe' a cho'óbtsik ke ni jun xita' yab u chʼó'nal nin itsích kʼal xowa' in kʼapal?
7.19 An kʼapnél yab u ochel bin itsích an inik, u kʼalel bin tsukul ani tayíl ne'ech kin wakʼla' alte'.
Anchan' tin ulu na Jesús abal kin xalkʼa' ke xowa'kich an kʼapnél yab tu chʼo'tsal an ti itsích.
7.20 In ulu jeye enché':
―U chʼó'nal nin itsích an inik kʼal xowa' in chalpayal yab alwa' ani kin tʼaja'.
7.21 Pos xowa' kʼwajat alkʼidh bin itsích an iniktsik, ja'ich kʼál tu tʼajnal kin kó'oy an atʼax chalab. Kʼal jachan' an atʼax chalab, kʼál tu tʼajnal ka junkun kʼal xi yab in tomtal. Wa'ach jeye xi yab u tomkinal, u ani' junkunalkʼi. Wa'ach xu chemdhax,
7.22 xu kwé', xi chʼe'ne', xin tʼajtsal ti atʼaxtaláb xi kʼe'et, xu kʼambix, xin jilál tinbá' ka óxná kʼal xowa'kich i atʼaxtaláb, xin telál kʼal i chákub xowa' in ko'ol kʼe'et, xu tʼilom yab exbadh, xin tʼekʼál tinbá' ani xi yab lujat in chalab.
7.23 Ejtal jeché' xowa' yab alwa', u tujél bin itsích an iniktsik ani tam kin tʼaja', u jilkʼonalich tám chʼo'odh nin itsích kʼal an walastaláb.

9.2-8
Tam ti na Jesús in jalkʼuy tinbá'
(Mt. 17:1-13; Lk. 9:28-36)
9.2 Akak a kʼítsá más tayíl, na Jesús junax kʼal na Pedro, na Jakobo ani na Juan, kʼadhiytsik ba jun i tʼekʼat chʼén. Tam ti taja'ich ti kʼwajattsik, na Jesús in jalkʼuy tinbá'.
9.3 Nin kʼudhkʼúmil chʼaxkʼin ani dhakni'bé tʼajat jelti an chám; dhakni'bé tʼajat, ke ni jun i pakʼwtsix xi teché' ti kʼay'lá yab ne'ech kin ejto kin dhakni'bédha' jelt xan ti dhakni'bé nin kʼudhkʼúmil na Jesús.
9.4 An exóbaltsik in chu'u jeye na Elías ani na Moisés ti tʼilolól kʼal na Jesús.
9.5 Utsan tám enché' na Jesús kʼal na Pedro:
―Okʼtsix, ¡alwa' tʼajat abal teché' u kʼwajat! Ne'ech ki tʼaja' óx i padhel, jún abal Tatá', jún abal na Moisés ani jún abal na Elías.
9.6 Anchan' ti kʼwajat ti káw abal jajá' ani nin kidhtaltsik jikʼenektsik tʼajat ani na Pedro yab in cho'ób xantʼéy kʼwajat in ulal.
9.7 Cha'kan tám jun i tokow xon ti jajá'tsik kʼwajat ani dhabyattsik, achʼatmé jun i káwintaláb ban tokow ani xu káw, in ulu enché':
―Jeché' ja'ich nu Chakámil xu kʼanidhál tʼajat, ka exbantsitsik xowa' Jajá' in ulal.
9.8 Támkʼi, tam tin tela'tsik wililíl, yab xita' más in chu'u, tokot kwetém na Jesús.

12.28-31
An takʼixtaláb xi más uluts
(Mt. 22:34-40)
12.28 Jun i okʼtsix xin wilál nin takʼixtal na Dios xin jilám dhutsadh na Moisés utey xon ti kʼwajattsik ani in achʼa' xantʼéy u káwlíxnáb. Kom in cho'óbna' ke na Jesús tókʼnék alwa', in konoy enché':
―¿Jowa' já' an takʼixtaláb xi más uluts?
12.29 Tókʼoyat enché' kʼal na Jesús:
―An takʼixtaláb xi más uluts ja'ich jeché': “Ka achʼa', atiklábtsik xi Israel: an Okʼóxláb ja'ich ni Diosil ani Jajá', ja'ich nu junkax Okʼóxláb.
12.30 Ka kʼakʼna' an Okʼóxláb na Diosil kʼal ejtal na itsích, kʼal ejtal na ejattal, kʼal ejtal na chalab ani kʼal ejtal na cháp.” Jeché' ja'ich an takʼixtaláb xi más uluts.
12.31 Nin chabtal, in junwal jeye jelti xin jidhtal: “Ka kʼanidha' xi kʼe'ettsik jelt xan ta kʼanidhál tabá'.” Yab wa'ach ni jun i takʼixtaláb xi más uluts ké xi jeché'tsik.

14.10-11
Na Judas in ulu abal ne'ech kin chinat pidhna' na Jesús
(Mt. 26:14-16; Lk. 22:3-6)
14.10 Na Judas Iskariote, jún ti éb xi lajucháb an exóbaltsik, kʼale tám kin chu'u an okʼlek pále'tsik ani in utsa' abal jajá' ne'ech kin pidhna' na Jesús.
14.11 Tam tin achʼa'tsik, kulbétsik tʼajat ani utsan na Judas abal ne'ech ka pidhan ti tumín. Na Judas in tuju tám kin aliy xan ti kin uwa' abal kin pidhna' na Jesús.

14.44-46
14.44 Na Judas, xi ne'ech ti pidhnax, jaykʼi tin utsámalich an yákʼwaltsik xantʼéy ne'ech kin tʼaja' abal kin exla'tsik xitam já' na Jesús. Enché' tin utsa'tsik:
―An inik xi ne'ech ku chʼuchʼbay, ja'ich xi tatá'tsik a ayal. Ka yakʼwa' ani ka júna'tsik belkómte alwa'.
14.45 Tam ti ulich, utey ba na Jesús ani in utsa' enché':
―¡Okʼtsix, Okʼtsix!
Ani in chʼuchʼbay.
14.46 Támkʼi ti yakʼwan na Jesús kʼal an yákʼwaltsik.

15.6-15
Bijtsin na Jesús abal ne'ech ka chemdhá
(Mt. 27:15-31; Lk. 23:13-25; Jn. 18:38-19:16)
15.6 Echʼekʼi tam u ajíbnáb an paskwa, na Pilato in walkál jun i wikʼnél xi ka kontsin kʼal an atiklábtsik.
15.7 Tam ti jachan' i kʼij, ta' ti balidh ban wikʼaxte' jun i inik xin bij ta Barrabás xi wikʼnék junax kʼal nin kidhtaltsik abal chemdhaxnéktsik tam tin péjeyám i awiltalábtsik.
15.8 Junkun tám an atiklábtsik abal kin kontsi na Pilato kin walka' jun i wikʼnél jelt xan ti echʼekʼi in ujnámal in tʼajál.
15.9 Tókʼoyattsik enché' kʼal na Pilato:
―¿A lé'tsikxe' tu walkantsi an tin Pulek Takʼíxal an judíotsik?
15.10 Konyattsik anchan' kʼal na Pilato kom in cho'ób alwa' ke yab u le'náb ka chu'tat na Jesús kʼal nin okʼlékiltsik an pále'tsik ani jaxtám ti pidhnats na Jesús abal ka chemdhá.
15.11 Por nin okʼlékiltsik an pále'tsik, in nixokna' an atiklábtsik kin konoy ka walká na Barrabás.
15.12 Konyattsik tám juní enché' kʼal na Pilato:
―¿Ani jantʼéy a lé' ku tʼajtsi xa bijyaltsik tin Pulek Takʼíxal an judíotsik?
15.13 Jajá'tsik tókʼon kawidh ani in ulutsik enché':
―¡Ka chemdha' pajkʼidh ban peltsidh te'!
15.14 Konyattsik tám enché' kʼal na Pilato:
―¿Jantʼom walastaláb in tʼajám?
Por jajá'tsik in óntsi kin ulu más kawidh enché':
―¡Ka chemdha' pajkʼidh ban peltsidh te'!
15.15 Kom na Pilato in lé' ka jilkʼon alwa' kʼal an atiklábtsik, in walka' na Barrabás. In abna' tám ka lekbayat yáníl na Jesús ani tayíl in pidhna'ich tám abal ka chemdhá pajkʼidh ban peltsidh te'.

15.33-39
Nin chemtal na Jesús
(Mt. 27:45-56; Lk. 23:44-49; Jn. 19:28-30)
15.33 Tam ti chʼejelich a kʼítsá, jikʼwchin tin pubíl an kʼay'lá ani in tʼójontsi asta óx i wákal.
15.34 Tam ti óxich i wákal, na Jesús in ulu kawidh enché':
―Eloi, Eloi, ¿lama sabaktani? ―jeché' an káw in lé' kin ulu: Dios tu Ajátik, Dios tu Ajátik, ¿jantʼókʼi tin walba'?
15.35 Taltsik xi taja' ti kʼwajat, in achʼa'tsik ani in ulu enché':
―Ka achʼa', exom in kanál na Elías, an tʼiltsix xi xe'chinék ti weje'.
15.36 Jún ti éb kʼale adhik kin axdha' ban jiliy uxnél jun xata' jelti kwinim, in wikʼa' bin tsúm jun i te', in utuntsi bin wi' na Jesús abal kin juchʼu ani in ulu enché':
―Yabich más xata' ki tʼajtsi, wana ki chu'u max ka tsích na Elías kin pa'ba' ban peltsidh te'.
15.37 Dhájan tám kawidh na Jesús ani chemech.
15.38 Támkʼi jachan', an tolow kʼudhkʼum xi ta' ti palat altá ban pulek atá xon tu kʼakʼnáb na Dios, xílan asta tʼekʼat ani asta cha'at.
15.39 An okʼlek soldado romano xi ta' ti kubúl tin tamét na Jesús, tam tin chu'u xan ti dhájan ani chemech, in ulu enché':
―Tsubax lejtal, jeché' an inik u Chakámláb kʼal na Dios.

15.42-46
Jolyat na Jesús
(Mt. 27:57-61; Lk. 23:50-56; Jn. 19:38-42)
15.42 Tam ti exomich ti dhamul, tam an israelitatsik in tʼojojoyal xowa' in yéntsal abal in kʼítsájil an koyóxnich,
15.43 ulich na José xu kʼwajíl ban bitsow Arimatea. Jajá' ja'ich jeye jun i ultaláb kidhtaláb kʼal an Junkulom Awiltaláb. Jajá' kʼwajat jeye in aytsím xowkʼi na Dios ne'ech ka tujéch ti takʼix ani in kuba' tinbá' ka ochich xon ti kʼwajat na Pilato abal kin kontsi tin tʼu'úl na Jesús kin joliy.
15.44 Na Pilato labandhá abal in achʼa' ke jaykʼi ti chemnek na Jesús. Jaxtám tin kaniy an okʼlek soldadotsik abal kin konoy max ani' lejtal ti chemnekich.
15.45 Tam ti utsan kʼal an okʼlek soldadotsik abal ani', utsanich tám na José kʼal na Pilato abal awilich kin júna' kin joliy.
15.46 In chʼa'ay tám na José jun i kʼudhkʼum, in pa'ba' nin tʼu'úl na Jesús ban peltsidh te' ani in boliy kʼal an kʼudhkʼum. Kʼale tám kin kʼwajba' ba jun i jólimtaláb xi ta' ti kʼwajat cholkʼadh bin akan jun i tʼujub chʼén ani tolilíl tin utu jun i yejche' tʼujub abal kin paxkʼintsi kʼál tin wi'lébil an jólimtaláb.

16.1-7
Ejech ti ít na Jesús
(Mt. 28:1-10; Lk. 24:1-12; Jn. 20:1-10)
16.1 Tam ti watʼéch nin kʼítsájil an koyóxnich, na Salomé, na María Magdalena ani xi jún na María nin nána' na Jakobo, in chʼa'aytsik i niwiytaláb abal ka kʼaletsik kin mawtsi kʼál tin tʼu'úl na Jesús.
16.2 Dhajawe tin jidhtal kʼítsájil an semana, kʼaletsik ban jólimtaláb ani tam ti ulich taja' jaykʼi ti eblinékich na kʼítsá.
16.3 Kónóxintsik enché':
―¿Jita' ne'ech ti ku wixkʼintsi an ti tʼujub xi kʼál ti paxkʼidh an jólimtaláb?
16.4 Por tam ti ulchichtsik, in chu'u abal an yejche' tʼujub xi kʼál ti paxkʼidh an jólimtaláb jaykʼi ti wixkʼintsidh.
16.5 Ochichtsik tám altá ani in chu'u taja' buxúl tin ejáttsik jun xita' jelti kwitól inik. An kwitól inik xeketlidh kʼal jun i dhak jochʼat xeketláb ani jikʼey tʼajat an mímlábtsik.
16.6 Por utsan enché' an mímlábtsik:
―Yab ki jikʼeytsik, u cho'óbich abal a ayaltsik na Jesús xi Nasaret, xi chemdhá pajkʼidh ban peltsidh te'. Jajá' ejnekich ti ít, yabich wa'ach teché'. Ka tela'ti nú' xon ti kʼwajbadh.
16.7 Ki kʼaléchtsik ani ka utsa' nin exóbaliltsik ani na Pedro: “Na Jesús ne'ech ka okxin ka kʼale Galilea ani tatá'tsik tayíl; taja' ne'ech ka chu'utsik jelt xan ti utsámal.”

16.15-16
16.15 Utsantsik tám enché' kʼal na Jesús:
―Ki kʼaletsik putálkʼi tin pubíl an kʼay'lá ani ka tʼiltsitsik an ti alwa' tʼilab ejtal an atiklábtsik.
16.16 Xita' kin bela' ani ka pujan, ne'ech ka lo'ey; por xita' yab kin bela', ne'ech ka kʼale ban kʼibeltaláb.

16.19-20
Na Jesús kʼadhích walkʼi'
(Lk. 24:50-53)
16.19 Tayíl, tam ti okʼonich ti tawnábtsik, júnájich tám walkʼi' an Ajátikláb ani buxkan tin eját na Dios.
16.20 Tam ti kaléch an abatwáletsik, xe'chin putálkʼi kin tʼila' an alwa' tʼilab ani tolmiyattsik kʼal an Ajátikláb kin tʼaja' i labidh labandhaxtaláb abal ka cho'óbná ke tsubax xowa' in tʼiláltsik. Anchan' ka tʼájan.