|
Yeesu - Fali, South
Here are some extracts from a Fali translation of the Bible that talk about Jesus. The extracts are from the Gospel of Mark.
 PDF version (extracts) (56kB)
PDF version (whole book) (232kB)
You will need Adobe Reader to view pdf files, which can be downloaded free here
Font
To view this page properly, you can download the necessary font here.
___________________________
Marku
YEK KAWRRA A DEFTERRE MARKU
1:1
Yèk Yuhanna nit iirra baptisma
1 E rri yey kày ɗaa Yèk Kâwrra Yeesu Kristu.
1:14-15
Yeesu 'naasirre lor ta wàa màrra
14 Ye leknuwan di Yuhanna a kultuma, Yeesu taye a dees Galile. De sage Yèk Kâwrra anga a gin Fay, de gàa:
15 Unji gerre, wûun Fay hèerage. Inin tinîir wun, goosin Yèk Kâwrra!
1:32-34
32 Tuma ye gàa e lugi, a nit ây de 'maaran nit àyci ây ni nit tindòom ây pî a gin Yeesu.
33 A ni-riiy ây maan pî aw kimjige a ɓeeri àay.
34 Yeesu de ndòose nit àyci ây dèy, koo ni àyci 'nang 'nang. Yuuni tindòom ây ɗa da nit ây dèy. Njanggi yèerra yèy da jungci tindòom ây, ngam aw cèngnuge.
2:1-12
Yeesu ndòosirre nit wuta isi
1 A dat unji 'nang 'nang Yeesu koysa a Kafernahum. Aw rage dii a àay.
2 A nit ây dèy aw kimjige a àay maan, koo a ɓeeri gin tâarra cen. Yeesu sak dawrre yèk Fay.
3 A nit ây de dàaran, de 'maaran nit wuta isi. A nit ây naan tokuwa.
4 Ye tâa aw kpàa orri kày gaw tîiw a ɗàm kpees Yeesu ba ngam mûsa nit ây, de naan de kpulin kpiiri a fak àay a gin tâa ey gi. De cinin a kpongna gi nit wuta isi nà ni jingi gin kûurra wàa.
5 Yeesu ye rabe goosum waw, de gàaw di nit wuta isi: Hàm mum, jàk maarra wey yaafige.
6 A nit còycum ây aw tâarre ton a farra. De dànin a tinîir waw de gàan:
7 Ngam jâ ey yèerre hûy ya? Ey maasi nîir Fay. Wun ge kpàa orri yaafum jàk maarra ya? Sey Fay gbè.
8 Kòsòng Yeesu cèngnige dànda waw. De gàa daw: Ngam jâ dànnu hûy a tinîir wun ya?
9 Jàk jâ hòmge àyrra, to mi gàaw go di nit wuta isi "jàk maarra wey yaafige", koo mi gàaw go "an mu at jingi wey, mu digi" ya?
10 Ndika un cèngni, Hàm nirri dii ni mbinum ha e yaafi jàk maarra a deesi. De gàaw di nit wuta isi:
11 Mi gàamde, ani at jingi wey, mu koyi!
12 Nit wuta isi nà de ane, de arre jingi wàa yaale, de yuu a nis nit ây pî, ha de tâa daw 'nang pî. De 'misin nîir Fay. De gàan: Ot haa kpàarra jày kà yey ba.
4:35-41
Yeesu gòynirre hiski a sòo ɓèl
35 Unji maan mbona ciiye. Yeesu de gàa da lor ta wàa: Dàan ot yew a taga sòo.
36 De woon mûsa nit ây, de diknjin ni Yeesu a koombowal yey tâa ey gi, aw yewi. Koombowal ây kana ɗa dii a sòo.
37 Hiski ɓèl de ana dèy, gîirarre sòo a koombowal, ha koombowal kèle e mûu ni sòo.
38 Yeesu dii gaarra a gin kûta koombowal, kûurre, iirra hak wàa a gin iirra hay. De mûysuwan de gàawan: Nitkàlnjum, ot gbeerre, ge ngòlum ba yi?
39 Yeesu ye mûye, de kpânu di hiski, de gàaw di sòo: Gòy, tâa baak baak! Hiski de gòye. Jày pî tâaye baak baak.
40 De gàa da lor ta wàa: Ngam jâ tolnu ya? Kà kà un dii ni goosum ba ya?
41 Tolnji ɓèl mòo dawge. De gàanjin: Nit yey nit ji rri ya? Ngam koo hiski ni sòo ɓèl aw raguge.
5:22-24
22 Wûun a àay kimjum de dàara, nîir wàa Yayru. Ye rabu di Yeesu, de ûu a ɗàm kpees wàa.
23 De waaw dèy de gàa: Hàm mum hàm nikin gàarre e wurri. Ndògòn, dàara mu banggurra kàn ha mu ndòosuwa, ta e wut ba.
24 Yeesu de diknji ni Yayru. Mûsa nit ây dèy furre mu gàa aw èwnjurre.
5:35-42
35 Ye tâa Yeesu yèerre kà yey, a nit ta wàa di Yayru nà aw dàarage. De kàluwan: Hàm wey wurre, ta mu loosu di Nitkàlnjum ba.
36 Yeesu ti ii tuy a yèk waw ba. De gàaw di Yayru: Mi yiɗi mu tol ba, sey mu goosi gbè!
37 Ti woo da nit ây aw diknji ni ey ba, sey Piyèr, ni Yakuba, ni Yuhanna kaa wàa di Yakuba.
38 Ye kpèrrin a àay Yayru, Yeesu de kpàa mûsa nit ây aw yèerre unggunggung. Aw umde dèy, aw taasirre.
39 De lege a àay de gun daw: Ngam jâ gbaanu yèy umnu ya? Hàm ti wut ba, amma kûu kûuye.
40 De wâskuwan. De yuuni daw pî. De arre too wàa ni nuu wàa di hàm, ni nit tâanjum ta wàa. De legin a gin tâa hàm gi.
41 De mòow di hàm nà a kàn, de gàa: Talita kumi, kà gàarra hàm mum, mi gàamde, ani!
42 Kòsòng hàm nikin nà de ane. De ɗaa gîta. Yer wàa dii ra sàm cuk. De tâa daw 'nang.
7:18-23
18 De goosi de gàa daw: Kay, un ɗa un kpàawrre cèngnum jày ba yi? Ndika un cèngni, jày pî lek go a mgbelyèk nirri ge 'miskunu ba.
19 Ngam jàk yey ge lek a tinîir wàa ba, sey a himni, ge yuunufa a ɓutki. Yeesu gàa kà yey ɗa ngam e mbârsi tiriici pî.
20 De gàa bak: Jàk yey yuuga a mgbelyèk nirri ey ge 'miskunuwa.
21 Ngam a tinîir nirri ana dànda maktiya, yey ge 'maaw a mboysum lori ni sapri, ni oori, ni ɓàta nirri,
22 ni njeenu, ni gayrum jàk ây, ni kperrem, ni gâra, ni haanum tuy, ni ngèeri, ni maasum yèy, ni 'misum hay, ni ray ɗa.
23 Maarra yey pî ge ana a tinîiri, ge 'miskunu di nirri.
9:2-8
Bunjum is Yeesu
2 A dat unji yira Yeesu arre Piyèr, ni Yakuba, ni Yuhanna. De 'maa daw a fak gopri ɓèl aw naan gbè. Is wàa di Yeesu de bunje kayang a nis waw.
3 Lurra ta wàa ire burriya tal tal, koo nirri kpolo a deesi ge mbin iirra burriya kà yey ba.
4 Eliya ni Muusa aw lòtɗa dawge, de yèenjin ni Yeesu.
5 Piyèr de gàaw di Yeesu: Nitcoorra, a gin mbâra tâana ay gi. Woona ot mbangsi ndûkci ây taan, kpolo ngam wey, kpolo ngam Muusa, kpolo ɗa ngam Eliya.
6 Ti cèngni kày ge gàa ba. Ngam ey ni nit ây cuk aw tolle dèy.
7 Titurum dàa butɗa dawge. Gûn ana a titurum de gàa: Yey hàm mbâr mum ɗi, mi yiɗurre. Raguwan!
8 Kòsòng a lor ta Yeesu de gobin a cewci waw. Aw rap koo nit kana ba, sey Yeesu kpolo wàa dii ni aw.
12:28-31
Yèk mgbèngda woy yey hòmge 'mita
28 Nit còycum kpolo aw hàanjirre ni Yeesu. De rabe kày goosi daw mbâra da ni-Saduki ây. De hèewrra de gunuwa: Yèk hâ hòmge 'mita a yèk mgbèngda gi ya?
29 Yeesu de goosu: E rri yey yèk mgbèngda woy hòmge pî: Raksin, ni-Israyel ây, Tooy Ɓèl Fak worro ey tâage kpolo gbè.
30 Yiɗi Fak wey Tooy Ɓèl ni tinîir wey pî, ni jungci is wey pî, ni dànda wey pî, ni kpèw kpèw is wey ɗa pî.
31 E rri yey yèk cukti a yèk mgbèngda: Yiɗi nit tâanjum wey kà yey yiɗum hak wey. Cen yèk mgbèngda kana hòmge da woy ây cuk gi ba.
14:10-11
Yuda yiɗi e hîi Yeesu a kàn nit yiir ây
10 Yuda Iskariyo, nirri kpolo a tîim lor ta Yeesu ra sàm cuk, de dige kàlla da nit ɓèl ta waw da nit daprum ây, e hîi daw Yeesu a kàn waw.
11 Ye ragin hûy, del dawge. De gàawan hîi gaw hîiw seede. Yuda kàme ot mbâra ha e hîi daw Yeesu a kàn waw.
14:44-46
44 Yuda nit mòorra Yeesu ni gâra, raknjige ni nit ây e ii daw ticèngsunum, gàaye: Nit yey gim kabu gi ey ɗi. Mòowan, un 'maaw ni faacu.
45 De hèewrra yaale di Yeesu, de gàaw: Soko, Nitkàlnjum! De kabuwa.
46 A nit ây de yaawrran gbi di Yeesu, de mòowan.
15:6-15
Aw yaanu di Yeesu a kiita wurra
6 A daprum Paska pî Pilatu hû waa e yuuni nit kulkultuma kpolo, yey waasin a nit ây gi.
7 Nirri kpolo dii a kultuma, nîir wàa Barabba, ni nit ɗàar ây, ngam aw ɓàre nà nirri a ɗàar waw.
8 Mûsa nit ây de naan a àay Pilatu. De ɗaan waarra e mbir daw kà woy mgban.
9 Pilatu de gun daw: Un yiɗi mi woonu wûun ni-Yude ây yi?
10 Gun daw kà yey ngam cèngnige, a nit ɓèl ta waw da nit daprum ây aw hîiwe di Yeesu a kàn wàa yèk ngèeri gbè.
11 Amma a nit ɓèl ta waw da nit daprum ây de kpèwsin mûsa nit ây, ha aw waa e woo daw Barabba.
12 Pilatu de gun daw: Ji yiɗunu mi mbiru di nit yey 'naasunu wûun ni-Yude ây ya?
13 De bimin de gàan: Gbalu a minjum kpiiri!
14 De gàa daw: Maarra ji mbire ya? Amma a nit ây de iisirran bimda de gàan: Gbalu a minjum kpiiri!
15 Pilatu yiɗi mbita jày ge del daw da nit ây, de woo daw Barabba. A sooje ây de lurruwan di Yeesu ni timbii. Pilatu de hîi daw aw gbalu a minjum kpiiri.
15:33-39
Wuta Yeesu
33 Kulpi ii a deesi pî diga unji a tîim hay ha unji mbona.
34 A unji mbona Yeesu bime ni tibimni ɓèl, de gàa: Eloyi eloyi lama sabaktani, kà gàarra Fak mum Fak mum, ngam jâ woomfa dim ya?
35 A nit ây kana a tîim nit ây gòyge a farra ye ragin kà yey, de gàan: Raksin, 'naasirre Eliya!
36 Nirri kpolo a tîim waw de 'nòo, de bûura ndàksi jày a mgbewnji mbàl, de ii a samsi. De hîiw di Yeesu ha e sûu. De gàa: Dàan ot raptuwa to Eliya dàa ge dàara go, e cinu a minjum kpiiri gi.
37 Yeesu de bime ni tibimni ɓàng, de woofa yîngda de wurre.
38 Jimda jàk joorra woy minjum a àay Fay ngarre a tîim, diga u fay ha u furi.
39 Nit ɓèl waw da sooje ây gòyge a ɗàm kpees Yeesu gi ye rabe kày wurre, de gàa: Takundi, nit yey Hàm Fay ɗi!
15:42-46
Aw siptirre is Yeesu a gebi
42 Mbona ciiye. Tâa mgbàr mbangsum unji wuysum ni-Yude ây.
43 Yosef ni-Arimatiya de dàara. Ey nit raknjum wûun ɗi, aw coowrre, waarre a wûun Fay. De mòo tinîiri de lege a gin Pilatu. De waaw is Yeesu.
44 De tâaw 'nang di Pilatu ye rage, Yeesu wurre gi. De 'naase nit ɓèl waw da sooje ây. De gunu to Yeesu wut go diga mgban.
45 Ye rage yèk nit ɓèl waw da sooje ây nà, de woow orri di Yosef e cini is Yeesu.
46 Yosef de sàa jàk joorra woy ɓèl burriya. De cini is Yeesu a minjum kpiiri. De forgu ni jàk joorra nà. De iiw a mîis gebi cèerriya a kpata. De kiwsa gòok ɓèl, e kuptini nin gebi.
16:1-7
Yeesu gûysi a wurra
1 Ye tâa unji wuysum ni-Yude ây hòme, Mariya sàni-Magdala, ni Salome, ni Mariya nuu wàa di Yakuba de sàan num mgbirgumya, ngam ha aw dik aw fingjurra a is Yeesu ni ndamji.
2 Ni ndamji birit a dat unji wuysum, mgbàr màrra a asaweerre, aw dige a gebi. Unji ɓarrarre.
3 De gunjin a tîim waw: Wun ge kiwsifa dot gòok ɓèl a nin gebi gi ya?
4 Ngam gòok maan 'mirre dèy. De gobin, de kpàan, gòok ɓèl nà kiwrige mgban.
5 De cirin a gebi. De rabin hàm lori tâarre ton a cewci riina waw. Ey mgbapɗe lurra ɓèl burriya. De kpul daw jungci isi, de tolin.
6 De gàa daw: Ta un tol ba! Un kàmde Yeesu ni-Nasaret nit yey gbaluwan a minjum kpiiri gi. Ti cenda ay ba, gûysige. Gobin e rri yey a gin iiwan nà.
7 Amma digin un kàl yèk yey da lor ta wàa hayye di Piyèr. Yeesu ɗàa ge ɗàanu dikta a dees Galile. A farra kpàa gun kpàawa kà yey gàanu nà mgban.
16:15-16
15 De gàa daw: Digin a gin nit ây a deesi lang, sagin Yèk Kâwrra koo di wuna.
16 Nit yey goosu di Fay, ngorge baptisma gi, kpàa ge kpàa saarra. Amma nit yey hàwge goosum, kiita Fay mòo ge mòowa.
16:19-20
Yeesu itɗe a gin Fay
19 Yeesu Nitcoorra ye gbèesi yèerra hû go, de naase a faktiturum e tâa a riina Fay.
20 A lor ta wàa de tayin, de sagin Yèk Kâwrra koo u hâ. Nitcoorra ngaa tèenjirre ni aw, gòynirre sakta yèk waw ni lònum jàk kayeefi ây ɗa.)
___________________________
Font Downloads
- Charis SIL 4.100 font release (Windows, Macintosh and Linux) NRSI staff, 2007-01-31 Download "CharisSIL4.100.zip", ZIP archive for users with WinZip, 2MB
- Charis SIL 4.100 font release (Windows and other) NRSI staff, 2007-01-31 Download "CharisSIL4.100.exe", Windows application, 2MB
- Charis SIL 4.100 font release (Debian package, GNU/Linux) NRSI staff, 2007-02-08 Download "ttf-sil-charis_4.100-1_all.deb", Debian Linux Package, 2MB
Copyright information World Home Bible League
|
