Ya:su - Tabo, Aramia River
Here are some extracts from a Tabo, Aramia River translation of the Bible that talk about Jesus. The extracts are from the Gospel of Mark.

1.1
Yoneko Tawakalubi Beyamo Wadulateledawate Godokono Tabo Dolamagiya:
Ma:t 3:1-12; Luk 3:1-18; Yon 1:19-28
1 Ya:su Kelisoko ba: Godokono Oemedawala ba:gala ebeno Gudula, ba:bene Ya:sukunu Hido Tabo da:tupuimiya: ba:moe ba:be mabula.

1.14-15
Ya:suti Ebeno Oko Da:tupuimiya:
Ma:t 4:12-17; Luk 4:14-15
14 Ba:bene gabomana:te Yoneko du genamamo dihatiya:, ba:ba tetelo Ya:suti Ga:lili hopamo Godokono Hido Tabo olamaga:go ba:bo piya:.
(1:14 - Mak 6:17)
15 Ebete na:pegoiya:, “Hido tete ba: a:pe. Godokono Ko Gawadalagima: eda: tete tatalila, ba:bema: la:eno kubane ohobila:te Hido Tabo hibima: na:mida:la:.”

1.21-27
Ya:suti Kuba Gobogobagoeno Dubu Da:hiduimiya:
Luk 4:31-37
21 Ba:ba tetelo Ya:suti ebe ta:matapa:go Kapeniyama habamo tolamiya:. Ba:bene Yu tawakalubino okoha: talona hegelalo ebete ibino baidi ibubulamehole genamamo tote ibi da:niya:tulamitiya:,
22 iba:te ebeno tabamo na:hanohanohutiya:, mabu ebete Godokono heloamo iya:tulamitiya: huiyatiya ebe ibino Godokono Tutumu iya:tulamepi huiyaha:.
(1:22 - Ma:t 7:28-29)

23 Ba:be atu tetelo kuba gobogobagoeno dubuti ibino baidi ibubulamehole genama gulu na:lutiya:,
24 ba:bene ebete gaa:tepahalo na:goiya:, “Ya:su Nasaletenapi, ama: atamo bada komo na:kododiomena:? Ama: a kubahia:mema: ka:pa:wa? A:iye, na iya:tawala amia:no komo, ama: ba: Godokono Hido-talona Dawalata!”
(1:24 - Mak 5:7)

25 Ya:suti huiyatiya ebe na:kiyahamiya:, “Ama: kodakodate, ebegodone nuluhuka!”

26 Ba:bene kuba gobogobote gaa:tepahago ba:gala ewagelehago dubuino apene duluhukuya:,
(1:26 - Mak 9:26)
27 tawakaluba:te ba:be komoma: na:hanohanohutiya:. Etate eta goemenakui, etate eta goemenakui, “Moe badala:ka:? Moe eta hiya: uli iya:tulame komola:ka:? Ba:moe dubuino helo konomola! Numa:la:, kubakuba gobogobate ebeno tabamo a:papamila:!”

1.32-34
Ya:suti Hiliyonomo Temetema:gopi Da:hiduilameniya:
Ma:t 8:16-17; Luk 4:40-41
32 Ba gapogapohona hegelate da:nihila:minaniya:, habaluba:te hiliyonomo temetema:gopi ba:gala kuba gobogobagopi Ya:sutamo ba:bo magaheleniya:,
33 ba:bene komo ibi hiliyonomate genama gigiho dopo hapulu pepola:nuya:.
34 Ba:ba tetelo Ya:suti ibi ipuwalo komo hiya:hiya: temetema:gopi hiliyonomo hiduilamenate, ba:gala hiliyonomo kuba gobogobo komopa:godone ba:bo oelameniya:. Ba:bi kuba gobogobo iya:tawahala Ya:suku ba: Godogodone piya:, ba:bema: iba:te ebeno komo kohawakalimima: ebete tabo ga:la talona bihatelameniya:.

2.1-12
Ya:suti Ape Kodakoda Temetema:goeno Dubu Da:hiduimiya:
Ma:t 9:1-8; Luk 5:17-26
1 Ba:bene komo hegela da:wibohuya: Ya:suti Kapeniyama habamo gala na:kapiya:. Ebete ebeno genamalo da:lutiya: tawakaluba:te ulihuya:,
2 ba:bema: komo ibi hiliyonomate da:pelamiya:, genama gulu ba:gala gigiho dopo hapulu eta habate kitanuya:ha:. Ba:ba tetelo Ya:suti Godokono tabo iba:tamo ba olamagita,
3 netewa-netewa dubate ape kodakoda temetema:goeno dubu ebetamo ba:bo agatuya:.
4 Mabu tawakalubi hiliyonomate ba:bolo na:pola:nuya:, ba:bi dubate Ya:suku tama:mo tolamema: gabohenola. Ba:bema: iba:te genama hunamo nalehawaminate, Ya:suti kebo ka:la:nuya: iba:te ba:be genamoeno hunu a:himiti temetema:goeno dubu tilago Ya:sutamo ba:bana nadutiya:.
5 Ya:suti ibino hibima: midi komo umilamete temetema:goeno dubutamo na:goiya:, “Hopodalagi, Godote amia:no kuba egebolemete adodoholema:ta.”

6 Huiyatiya komo Godokono Tutumu iya:tulamepi ba:bo da:pola:nuya:, iba:te ba:be tabo uliti ibino tepo ipuwalo ba:ma ka:na emalagidolutiya:,
7 “Ba:moe dubu awagalo kuba tabo badama: ka:goe Godokono holoholo hapulu? Kuba egeboledawa potela:ka:? Ba: Godoko kapiyala!”

8 Ba:ba tetenomolo Ya:suti iya:tawuya: iba:te bada komoma: ukui da:miya:titiya:, ba:bema: ebete iba:tamo na:goiya:, “Mabu keka: la:eno tepo ipuwalo ba:moi komo demalagidolitama?
9 Ba:moe tabo kodakodala:ka: nale ba:moe temetema:goeno dubutamo goema:, ‘Godote amia:no kuba egebolemete adodoholema:ta?’ O ba:moe eta tabo goema: kodakodala:ka:, ‘Mahigate, amia:no tilo lawete na:toa?’
10 Ba:bema: nale la: kiya:tulamema:nemata, na Tawakalubino Naniwigodolo¹ helo bitana ba:moe hopolo tawakalubino kuba egebolelamete kadodoholelamema:.” Ba:bene ebete ape kodakoda temetema:goeno dubutamo na:goiya:,
11 “Nale ama: begoememata, na:mahiga! Amia:no tilo mokopa:midate genamamo na:toa.”

12 Ba:ba tetelo ibi hiliyonomate ebe ba umita, ba:be dubuti mahigate ebeno tilo lawete tiyonomolo ba:bo tuya:, ba:bema: iba:te hibinomolo hanohanoholo na:ga:luya:, “Godoko hunamo nadipata:la:. A dopamo ba:mako komo kuminakuiha:!”

4.35-41
Ya:suti Gogo Da:tatabuiminiya:
Ma:t 8:23-27; Luk 8:22-25
35 Ba:be hegelate da:duniya: Ya:suti ebe ta:matapa:tamo na:goeniya:, “A bobo hapuamo kona:hiwaliya:.”
36 Ba:bene iba:te komo tawakalubi hiliyonomo miya:palenate, Ya:suti da:lutiya: ebe ta:matapa:te ba:be boga:mo ololonate ba: dito tolameniya:. Ba:ba tetelo komo boga:te atumu iba:go na:katolameniya:,
37 ba:bene ko gogonomote ba mahigana koko gawiyoeno beyate ta:matapino boga:mo da:pa:la:haniya:, boge gu beyate dito taboniya:.
38 Huiyatiya Ya:suku boge gala hapulu ebeno wato tenamo apatinate ba:bo wataniya:, ba:bema: iba:te ebe modoetenate na:ga:lameniya:, “Iya:tulamedawa, ama: a hidamo badama: kua:menaha:? A ba: koha:lahama:nema:!”

39 Ba:bene Ya:suti mahiganate huhu na:kiyahameniya:, “Na:tataba!” ba:gala gawiyatamo atu tabo bekagoeniya:, “Na:ka:la:liyahala:!” ba:bene huhuti wibonate bobote tatabanomoma: ba: dito eda:niya:.
40 Ba:bema: Ya:suti iba:tamo na:goeniya:, “La: badama: ka:toletolehonama? La:eno hibima: midi komo puliyala:ka:?”

41 Huiyatiya iba:te konomamo ba hanohanohona ibi ipuwalo na:ga:laniya:, “Moe lumagi potela:ka:? Huhu ba:gala gawiya iba:te ebeno tabo uliti a:papamila:!”

5.22-24
22 Ba:ba tetelo Yu tawakalubino baidi ibubulamehole genama umidawa dubu, ebeno mahilo Ya:ilasitila, ebete Ya:sutamo pete ebeno nato mabamo pepapamiwatate,
23 konomamo ba petoetoe na:pegoiya:, “Naeno bohele deha:poto hoe tatalila. Ama: pete amia:no kokoto ebetamo na:pemowatima: ebete kohidoma:, ba:bene ebete a:kahaa:mene.”
24 Ba:bene Ya:suti ba:moe dubago to da:tupuimiya:, tawakalubi hiliyonomate ebe ba anataguma:tuta emokatihuia:go tolamitiya:.

5.35-42
Ya:suti Ya:ilasikono Bohele Hoene Dadipatiya:
Ma:t 9:23-26; Luk 8:49-56
35 Ya:suti ba:moe tabo ba olamagita, tabo adahepa:te Yu watodawa Ya:ilasikono genamane pelamete ebe na:pega:lamiya:, “Amia:no bohele a:hoe, ba:bema: Iya:tulamedawa gala akagoema:la: ebe kopihiduimima:.”

36 Ya:suti ibino tabo dito ulia:tepuya:, ba:bene ebete Ya:ilasiko na:goemiya:, “Ama: akatoletola:la:, ama: Godoko hibima: na:mida:.”
37 Ba:ba tetelo ebete Pitako, Ya:imesiko, ba:gala ebeno ekawi Yoneko, ibi kapiya ba magatale komo tawakalubi na:duhilamiya: iba:te iba:go tolamema:.
38 Ba:bene ibi ha:kiya Ya:ilasikono genamamo da:nikuliya: Ya:suti tawakalubi hiliyonomo ba:bo nulamiya:, iba:te howela:go konomamo ihimitiya:.
39 Ya:suti genama guamo nodolote ibi na:negoelamiya:, “La: hiliyonomo howela:go bada mabuma: kihimiutama? Gudu bohele kahaa:kaha:, ebete u bewatita.”

40 Huiyatiya iba:te ebe na:walitiya:, ba:bema: ebete ibi hiliyonomo genamane ba: dito poelamiya:, ba:bene Ya:suti guduino menoko, nabiwi, ba:gala ebeno netewa-kapiya ta:matapi uwatete, guduti da:kapitanuya: iba:te ba:be habamo dito na:pa:la:huya:.
41 Ba:ba tetelo ebete bohele kokotamo nelawete Yu tawakalubino tabamo na:goemiya:, “Talita kumi!” ba:moe taboeno ipuwa nitana, “Bohele, nale ama: begoememata, na:mahiga!”
(5:41 - Luk 7:14)
42 Ba:bene ba:ba tetenomolo ba:be 12 gogo tete bohelete mahigate na:patiya:. Puya:te ba:moe komo dumiya: iba:te koamo hanohanohuya:,

7.18-23
18 Ebete iba:tamo na:goiya:, “Komopa:te ukui hidamo katuputupuilamenaha:, la: ba: atumu. La: iya:tawahala:ka:? Naha ilinate lumagino tepo ipuwamo opegate ebe a:kakubahima:mene,
19 mabu naha ilinate lumagino ukui mabamo katutaha:, huiyatiya wapamo tuta ba:bene nea:go kopenuluhukuma:ne.” Ba:bema: hibila, Ya:suti ba:moe tabamo hiliyonomo naha ilinoeno talona hiliyonomo tama:mo miya:tenomo a:miya:tiya:.

20 Ba:bene ebete gala na:kagoiya:, “Numa:la:, lumagino tepo ipuwane dikulimina: ba:bi komo kapiyate ebe kokubahimima:na:,
21,22 mabu lumagino tepo ipuwane hiya:hiya: kuba ukui komate pikulinaka, ba:bene ba:bi kuba ukuia:godone ba:moi koko kubate kapikulinakabohele pilo komo ba:gala eta lumagino kamena pilo komo, ilina pilo komo ba:gala eta lumagino ilina ubi komo, mauba komo ba:gala lumagi anakapumi komo, ha:da amiho komo ba:gala eta lumagino mahilo kubahimi komo, apa:mo kuba ododili komo ba:gala hiya:hiya: kuba oholelo ododili komo, awagaha komo ba:gala daedae ukui komo.
23 Iyo, ba: hibila! Ba:moi kuba hiliyonomate lumagino tepo ipuwane pikuliti lumagi ba:bo kokubahimima:na:.”

9.2-8
Godokono Helonomo Alote Ya:sukunu Ape Da:la:minuya:
Ma:t 17:1-13; Luk 9:28-36
2 Ba:bene sikisi hegela da:wibuya: Ya:suti Pitako, Ya:imesiko, ba:gala Yoneko eta hununomo hakamo magataliya:, iba:te ha:kiya ba:bolo konepola:nama:. Ba:ba tetelo ibino dopo hapulu Ya:sukunu apete hiya:ma: ba edita,
(9:2-7 - 2Pit 1:17-18; Oel 3:22)
3 ebeno pupulino ilinate a:la:minahamete keyakeyanomoma: hibilo eda:hamitiya:, ba:moe hopo konomolo eta lumagiti kaliko ba:ma ka:na ukulalelo keyakeyanomoma: midili wadiyaha:.
4 Ba:bene ta:matapino holoholo hapuamo Moseseko ba:gala Elayako iba:te uluhukuti Ya:sukuba: tabo ba:bo ga:lutiya:.
5 Ba:ba tetelo Pitate Ya:sutamo na:goiya:, “Iya:tulamedawa, ale ba:malo da:pola:nama:, kalakala konomola. Wadiyala a mimiya netewa-kapiya ketemotema:nema:, eta amia:nola, eta Mosesekonola, eta Elayakonola.”
6 Ba: hibila, ta:matapa:te konomamo toletolehutiya:, ba:bema: Pitate ukui hidamo emalagidoloheno ba:be tabo ba: dito goiya:.

7 Ba:bene hawaiti pete ibi da:patulateliya:, tabote hawai ipuwane ba:ma ka:na piya:, “Ba:moe naeno kapiya Gudunomola, na ebetamo na:kalakalutamo. La: ebeno tabo nulia:la:!”
8 Huiyatiya ba:ba tetelo iba:te hopo tiyonomo umihote Moseseko Elayako ibi gala kulamiya:ha:, Ya:suku kapiyate iba:go ba:bolo la:nuya:.

12.28-31
Kebe Tutumu Tabote Konomoma: Keda:na
Ma:t 22:34-40; Luk 10:25-28
28 Ba:bene eta Godokono Tutumu iya:tulamedawate pete, iba:te da:ga:lutiya: ba:be tabo ba:bo puliya:. Ya:suti Sa:diyusi kapiyuimipa:tamo tabo hidamo dolamagiya:, ba:be komo umiti ebete Ya:suku nalatediya:, “Kebe tutumu tabote konomoma: keda:na?”
(12:28 - Luk 10:25-28)

29 Ya:suti na:goiya:, “Ba:moe ba: konomo tutumula, ‘Isalaela tawakaluba:la:, la: nulia:la:! Godoko aeno Kodawala, ebe ba: kapiyanomola, eta puliyala.
(12:29 - Tutumu 6:4-5)
30 Ama: amia:no Kodawa Godoko malemalelo nemalagidolona, amia:no tepo ipuwanomamo ba:gala amia:no gobogoboeno heloamo, amia:no ukui konomamo ba:gala amia:no helo konomamo.’
31 Ba:gala ba:moe ba: eta konomo tutumula. ‘Ama: ha:kiya ama: demalagidolona, wadiyala ama: ba:ba ka:na ama: tamelo demedena ba:be lumagi malemalelo nemalagidolona.’ Eta tutumu tabote ba:moi tutumu netewa a:kagogola:mene.”
(12:31 - Hawi 19:18)

14.10-11
Yudasiti Ya:suku Lawema: Nopo Da:tamotiya:
Ma:t 26:14-16; Luk 22:3-6
10 Ba:bene Ya:sukunu 12 ta:matapi ipuwalo Keliyotanapi Yudasiti Godotamo hawa:goeno ikamehopino watowatopa:tamo tote, nopo ba:bo netamotiya: Ya:suku ibino kokotamo kihatema:.
11 Ba:ba tetelo iba:te ba:be komo uliti kalakalahalo tabo ba:bo ihatiya: ebetamo mani kikamema:, ba:bema: Yudasiti iba:godone tote gabo ba:bo nohowadiya: Ya:suku ibino kokotamo kihatema:.

14.44-46
44 Ba: hibila, Yudasiti ibi ya:lo ba:ma ka:na goelameniya:, “Nale daboetehomo, ba:be ba:be lumagila. La: ebe tiyonomo lawete hidamo na:magatuya:la:.”

45 Ba:bene Yudasiti penate Ya:sutamo tonomo tonate ebe na:negoemeniya:, “Iya:tulamedawa!” Ba:ba tetenomolo ebete ebe ba aboetehona,
46 komo dubate Ya:suku ibino kokotamo kodakodanomolo ba:bo laweniya:.

15.6-15
Paeletete Ya:suku Hoea:mo Doemiya:
Ma:t 27:15-26; Luk 23:13-25; Yon 19:1-16
6 Ba:ba tete tawakalubino komo ba:ma ka:nala, hiliyonomo gogo ipuwalo Yunapino Adaguila: Poko tetelo iba:te du genamalo kapiya lumagi mahilamo da:ka:minakui, Paeletete ba:be lumagi ebeno kuba huiyane dito oemenakui.
7 Ba:ba tetelo kapiya dubu ebeno mahilo Balabasitila, ebete du genama gulu nemedenami, ebeno komo ba:ma ka:nala. Dopamo komo dubate Loma gabomana:go alaholohopima: ba eda:ha, iba:te komo tawakalubi ba:bo anakapulamiya:, ba:be mabuma: Loma gabomani watowatopa:te ibi Balabasiko bana uwatete du genamamo dito miya:tiya:.
8 Ba:bema: Ya:suti Paeletekono holoholo hapulu ba la:na tawakalubi hiliyonomate ebetamo pelamete na:pega:lamiya:, ebete poko tetelo dopamo keba ka:na kododinakui ba:ba ka:na gala kakododima:.
9 Ba:bene Paeletete iba:tamo na:goiya:, “La: ubila:ka: nale la: Yu tawakalubino Ko Gawadalagi dito oeme?”
10 Ebete ba:moe tabo begoiya: mabu ebete iya:tawuya:, Yunapi ipuwalo komo ibi hiliyonomate Ya:sutamo na:kalakalahutiya:, ba:gala ibino watowatopa:te ba:be mabuma: ebetamo maubahate ebe ba: dito magahiya:, iba:godolo hibi komo puliyala, kitanuya:ha:.

11 Huiyatiya ba:ba tetelo Godotamo hawa:goeno ikamehopino watowatopa:te komo hiliyonomo tawakaluba:tamo helo bikalamiya: iba:te Paeleteko koga:lamema:, ebete Balabasiko du genamane dito oemete huiyatiya Ya:sutamo kuba huiya kikamema:.
(15:11 - Oel 3:13-14)
12 Ba:bene Paeletete iba:tamo gala na:kagoiya:, “Ba:moe dubu la:le Yu tawakalubino Ko Gawadalagima: da:ga:lanama, nale ebe keba ka:na na:kamitimo?”

13 Iba:te ga:ga:lo na:ga:luya:, “Keha pihigamo pihomotete, ikoko nalukulima:!”

14 Ba:bene Paeletete na:goiya:, “Bada mabuma:? Ebete bada kuba kododi?”
Huiyatiya iba:te konomamo ga:ga:lo gala na:kaga:luya:, “Keha pihigamo ebe na:pihomota:!”

15 Ba:bema: Paeletete ba:bi tawakalubi kokalakaluilamema: ubi ba ihate, ebete Balabasiko du genamane ba: dito oemiya:, huiyatiya ebete ebeno alaholohopi na:goelamiya: iba:te Ya:suku giya:pa:pa:mo ka:na:miga:tima:. Ba:bene ba:be komo da:wibuya: ebete Ya:suku iba:tamo dito ikalamiya:, iba:te ebe keha pihigamo pihomotete ikoko kalukulimima:.

15.33-39
Ya:suti Da:hoeniya:
Ma:t 27:45-56; Luk 23:44-49; Yon 19:28-30

33 Ba:bene hegelate tuli teta:mo dutiya: hopo konomote ba:bo duya:. Ba:ba tetelo du komote hegeloeno alo ba mula:, hegelate a:hiwate nanekela:mo a:nihitigatepaniya:, hegela tuli tetene tupuimiti 3 koloko teta:mo.
34 Ba:bene Ya:suti Yu tawakalubino tabamo ibulunomamo na:goeniya:, “Elai, Elai, lama sabakatani?” ba:moe taboeno ipuwa ba:ma ka:na itana, “Naeno Godo, naeno Godo, na ama:le badama: ka:miya:pana:wa?”
(15:34 - Ohale 22:1)

35 Komo ba:bolo da:pola:nuya: iba:te ebeno tabo ulinate na:ga:laniya:, “Numa:la:, ebe Elayako beka:mina!”
36 Ba:bene kapiya dubu nipuliganate, humago kaka gao beyamo nadutinate pudamo negalapata:midanate Ya:sutamo ba nikamena na:goeniya:, “Hiya:, a kumima:nema:! Elayate ebe pelawete hopamo da:padipotemene!”
(15:36 - Ohale 69:21)

37 Ba:ba tetelo Ya:suti ibulunomo goewatanate hoenomo ba:bo hoeniya:.

38 Ba:bene Godoko Adikumino Hiya: Genamoeno kaliko ubiliti tulituliya bolagale hununi tupuiminate hopamo ba:bo pihitiganiya:.
39 Ba:gala Ya:sukunu holoholo hapulu da:la:nuya:, ba:be alaholohopino gawadalagiti Ya:suti keba ka:na ka:hoeniya: ba:be komo uminate na:goeniya:, “Hibila, ba:moe dubu ba: Godokono Gudula!”

15.42-46
A:limitiya Habanapi Yausepete Ya:sukunu Ape Nakola Bobo Ipuwamo Dihateniya:
Ma:t 27:57-61; Luk 23:50-56; Yon 19:38-42
42,43 Gapogapo tetelo A:limitiya habanapi Yausepete na:peniya:, ebe Yunapi Ka:nisolo ipuwalo eta tuputupu lumagima: eda:nami, iyo, ebete Godokono Ko Gawadalagima: eda: tete belatiminami. Ba:bene ebete ba:ma ka:na pemalagidoloniya:, ba:be hegela ba: Yu tawakalubino okoha: hegeloeno ilina hiduilame tetela mabu dumutu ba: talona hegelala, ba:bema: ebete tonate Paeleteko toleheno na:nikiyameniya: Ya:sukunu ape lawenama:.
44 Paeletete ba:be tabo ulinate koamo la:wa:nate ukuilo na:goeniya:, “Ya:suku ya:lo a:ka:haa:ka?” ba:bema: ebete alaholohopino gawadalagi ebetamo ka:minate Ya:sukunu hibi hoe komoma: ebe ba:bo alateda:niya:.
45 Ba:bene Paeletete alaholohodawa gawadalagigodone Ya:sukunu hoe tete ulinate Yausepetamo modobo tabo ba:bo goeniya: ebete Ya:sukunu ape lawenama:.
46 Ba:bene Yausepete hidonomo keyakeya kaliko mana:mo lawenate Ya:sukunu ape hopamo padipotenate, hido kalikamo a:wa:tinate nakola bobo ipuwamo ba:bo nihateniya:, ba:be bobo tawakaluba:te iya:ha:midale nakola haka ba aligi ya:lo ba:bo ododiya:. Ba:ba tetelo Yausepete ko nakola emokamidanate bobo gigiho ba:bo netakuminiya:,

16.1-7
Ya:suti Hoene Gala Da:kamahiguya:
Ma:t 28:1-8; Luk 24:1-12; Yon 20:1-10
1 Ba:bene Yu tawakalubino okoha: talona hegela tete da:wibuya:, Magadalanapi Ma:liko, Ya:imesikono menoko Ma:liko, ba:gala Salomiko, iba:te tolamenate hido nibo ilina mana:mo na:nuwatehoniya: eta hegelalo Ya:sukunu apa:mo kopabutilamelemema:.
2 Ba:bene Sande hegela duiduiyanomolo hegela ba owalohuta, iba:te nakola bobo habamo da:tolamitiya:
3,4 na:nega:luya:, “Bobo gigiholo ditana ba:be ko nakola tama:mo pote na:ka:nemokamidaa:memene?” Iba:te ba:ma ka:na ga:lutiya: mabu ba:be nakola menemenenomola, huiyatiya iba:te hidamo ba gahilamehole ba:be ko nakola tama:mo ya:lo emokamida ba itana ba:bo umiya:.
5 Ba:bene iba:te nakola bobo ipuwamo nogomote, uli ape dubu ga:ga: keyakeya kaliko puliti tu hapulu da:lutiya: numiti konomamo nehanohanohutiya:.

6 Ebete iba:tamo na:goiya:, “La: akahanohanohala:! Nasaletenapi Ya:suku tawakaluba:te ebe keha pihigamo da:pihomoti, la:le ebe bohowaditamata. Ebe malo puliyala, ebe a:mahigaka! Iba:te ditidi gapogapolo ebe dihateni ba:be haba la: numa:la:.
7 Ba:bema: la: tolamete Pitako ba:gala komo ebe ta:matapi na:nikiyalama:la:, ‘Ya:suti Ga:lili hopamo dopamo kotoma:ne. La: tolamete ebe ba:bo konumima:nemata, ebete la: dopamo keba ka:na ka:kiyalamiti ba:ba ka:na.’ ”

16.15-16
15 Ba:bene Ya:suti iba:tamo na:goiya:, “La: hopo konomamo tolamete Godokono Hido Tabo hiliyonomo hiya:hiya: tawakaluba:tamo na:nolamagiminakuya:la:.
(16:15 - Oel 1:8)
16 Kebe lumagiti hibima: miditi ba:bene beyamo aduti komo da:lawemene, Godote ebeno ka:ka: komula:mema:ne, huiyatiya kebe lumagiti hibima: midihino Godote ba:be lumagino komo anagiya:midamete ebetamo kuba huiya hibilo kikamema:ne.
(16:16 - Oel 2:38)

16.19-20
Godote Ya:suku Hunu Habamo Dadipatiya:
Luk 24:50-53; Oel 1:9-11
19 Ba:bene Kodawa Ya:suti iba:tamo tabo olamagi da:wibuya:, Godote ebe pelawete Hunu Habamo ba:bo adipatiya:, ba:bolo ebete Godokono tu hapuamo ba: dito nemediya:.
(16:19 - Oel 1:9-11; 2:33-34)
20 Ba:bene ta:matapa:te tolamete hiliyonomo hiya:hiya: hopolo Godokono tabo ba nolamagimi, Kodawa Ya:suti iba:go kapimilo Godokono oko na:nowatinami, iyo, ba:ba tetelo ebete Godokono helo hawakalimino hanohano komokomo ipuwado ba:be Hido Tabo na:neheluiminami.
(16:20 - Oel 14:3; Yun 2:3-4)

_____________

1) 2.10 Tawakalubino Naniwi ba: Ya:sukunu mahilo etala. Ebe ba: tawakalubi hiliyonomoeno Naniwila, atumu Godoko ba: aeno Nabiwila.
_____________