Jisas - Mufian
Here are some extracts from an Mufian translation of the Bible that talk about Jesus. The extracts are from the Gospel of Mark.

PDF version - extracts (66kB)
PDF version - entire book of Mark (225kB)
You will need Adobe Reader to view pdf files, which can be downloaded free here

_____________

Mak

1.1
Jon napisi'as embel nawalipasa basef Godi
1-2 Basef amama bu'wamima Jisas Krais, Anan nogalomana Godi.
Basef amama mohafel mataga si'i anona profet fowa'inai Aisaia
nanda'am mape buk.

1.14-15
Jisas nafela maol nanda'ana gani etap hiagoma Galili
14 Nemaf anama amam manda' Jon nanda' kalabus, Jisas nafe'
etap hiagoma Galili nanda' maol nawalapa basef bu'wami Godi na'ipasam
15 na'i, "Nemaf anama felefele' netaga ma epes hiesi siowis
wambota Godi numafias. Na'ama dei' ipe' pemboma opalef pefe'ma God pewa' alafugaha waf aonai."

1.21-27
Jisas natofa ambal aonai nape anona amani
21 Jisas naloma alupumi ananimi Jems naloma Jon, Saimon naloma Andru mafe' Kaperneam mape. Nemaf anama esis Juda sapoma noma'wanai, Jisas nao'wam mafe' mawis ipat esis Juda sa'i basef sapeinai ea' na'ipasa basef amam nematawa.
22 Esis same' basef ananimi ea' gegelalasis kwapete'as endilisi.
Anan ina nawalipas si'i amam falafumi ma'ipas, owa'. Anan na'ipasa basef la'ifimi si'i amam agufumi ma'ipas. Amam mawalipasa mi'uli Godi ina mawalipas na'ama si'i anan, owa'.
23 Nemaf anama anona aman nape nalomas ipat anama, ambal aonai napeinai ea' mehip etin ambal anama noga na'i mehip na'i,
24 "Jisas ine' Nasaretinai, ine' nafi'i na'i nenda' maina afa'?
Nafi'i ma nehambombagafa? Ae' egawena ine' aman bu'winai Godi."
25 Ea' Jisas ninifalom na'i, "Ine' ambalip aonai, feso'mena
kwaha aman anama fo'o."
26 Ea' ambal anama aonai nakoto'ana kwapete'ana nanda'am ge'ala mehip nakwahona nawisi nafe'.
27 Ea' amam nematawa hiesi gegelalasis sandakoto'ma ea' sanda'ipama sa'i, "Amama main de'im? Amama anom basef dambaimi. Anan natofa ambagof awami na'ipam si'i anona aman la'ifinai. Amamaga hiami mame' basef Ananimi. Ambagof awami wapoti' mame' basefana makwaha epes mafa' mafe'."

1.32-34
Jisas nanda' amam nematawa awes nanda'asi sataga bo'wes
32 Ea' aon nowala naso', esis sofa'ai epes awes naninani nanda'asi saloma enis ambagof awami mapeisi safi'mai Jisas.
33 Ea' esis hiesi sape wambel lu'unai safi'i saitu felefele'ma
uta ipat si'ina.
34 Ea' Jisas nanda' amam namatawa hiesi awes nanda'asi bo'wes, natofamasa anom ambagof awami mapeisi ea' sataga bo'wes. Ambagof awami mogawa Jisas anan nogalomana Godi. Na'ama nasopama malogof ambagof amama awami faso'mam tol mape.

2.1-12
Jisas nagiambama anona aman lagufi bo'wagah maga'anai ambo'ona
1 Anom nimeguf mafe'ma ea', Jisas notanima nafe' Kaperneam.
Ea' esis same' basefa Anan nafi'i nape ipat.
2 Ea' amam nematawa hiesi sandakolas ipat anama napeinai asi'ina ea'. Na'ama uta owa' anagon nogal nopoma sefe' siowisi. Ea' na'ipasa basef bu'wami Godi ma esis.
3 Ea' anom amam biamibiam manda' balata malai anona aman lagof bo'wagah maga' mefa'ana ma'i mefe'ma Jisas.
4 Ipat asi'inama amam nematawa hiesi saitu sili'akw, ea' ina
anagona mofa'ana muwis mofe' felefele'ma Jisas, owa'. Ea' malata
ipat ilif ande'ana mapisila bogwan ilif mala aman anama awes nanda'anai naloma lahis nowala nomon Jisas naituma.
5 Nogota anama Jisas nati biamibiam nagawa amam mombale'efana ma'i anan la'ifinai ma nigiambama aman anama notaga bo'ona. Ea' na'ipa aman anama na'i, "Ine' epen ae'inai. Waf aonai ine' nanda'anai Ae' akwahomenana ea'."
6 Ea' anom dambami mawalipasa mi'uli Godi mape mame'ana. Opalef amamumi aoma basef ananimi. Na'ama amam nomonas matamea ma'i,
7 "Dei' maina Jisas na'iam na'ama? Anan nanda' God findiwana.
Owa' etina anona aman la'ifinai ma neakwaha waf aonai epes sanda'anai. God atona nakwa waf aonai."
8 Dei' atef Jisas nogawa nomonas amamumi negawam okom ananinai, ea' na'ipam na'i, "Dei' maina ukup ipe'imi mape na'ama?
9 Dei' amamaga maim ipe' pa'i ahifima Ae'? Ae' la'ifiwei ma
i'ipa aman anama awesinai, i'i 'Ae' ekwahomena waf aonai ine'
nanda'anai', o i'ipana, i'i, 'fela lahis ine'imi nehafel nefe'.'
Ipe' pa'i maim ahifima ae'?
10 Ae' a'i ipe' pegawa ae' ataga epen endelisiwei, la'ifiwei
ma ekwahomasa waf aonai hianai amam nematawa sape etap anae' sanda'anai. Ae' a'i ihi'ambepa ae' la'ifiwei ma enda' amamaga amama." Ea' na'ipana na'i,
11 "Ae' a'ipina, ine' hafel fela lahis ine'imi fo'o ipat ine'inai."
12 Ea' esis saitu satolona sati anan nohafel mehip nafela lahis
ananimi nefa'am nafe'. Ea' amam nematawa hiesi gegelalasis kwapete'as, safela agel Godi lu'una sa'i, "Fowa' ape' ina mati anom amamaga si'i na'ama, owa'etin."

4.35-41
Jisas ninifala embel maloma uf faso'mam mapan
35 Nemaf anama atona, wambomota felefele'ma owamb, Jisas na'ipa alupumi ananimi na'i, "Afa' ofe' anama walemb lu'unai batupa'manai anama gani fisana."
36 Ea' amam makwaha esis amam nematawa hiesi mafe' bot anama Jisas natumanai mofa'ana mafe'. Enis epes sofa' anom bogw maloma bot anama mafe'.
37 Ea' anona uf lu'unai naluwi, naoh manda'am fepoh, mafe'
mawis bot nomon ea' na'i si'inama embel.
38 Ea' Jisas na'oh nalola bot nagi'ma nola komboto'w na'oh.
Ea' amam mafe' minimbalona ma'ipana ma'i, "Tisa dembinai, afa'
wa'i a' owala. Ine' negawafa, owa'?"
39 Ea' Jisas nohafel ninifala uf na'ipa embel naoh na'i, "Uf
neloma embel ipe' petah." Ea' uf faso'mana, embel ina ata' manda' fepo. Tol motah.
40 Ea' na'ipa alupumi ananimi na'i, 'Ipe' umbamahepa ma main?
Ipe' pembalo'a basef Godi pa'i Ae' la'ifiwei, owa'?

41 Ea' amam mati na'ama, umbamaham kwapete'am endilisi, ea'
manda'ipama ma'i, "Anan emi egafuna? Na'ipa uf naloma embel mame'ana mowala."

5.22-24
22 anona aman Jairus numafi ipat esis Juda sa'i basef sapeinai
nafi'i. Anan nati Jisas ea' nindiwa nembawa notawamana, felefele'ma bo'wagah ananimi.
23 Ea' na'ipana mehip na'i, "Nogame ae'akwi felefele' kwa'i
koga'. Ae' a'i ine' nefe' newamona lagel ine'inai akwa'w ambal
notanimai nuwisa'w kohafel kopan."
24 Ea' Jisas nalomana mafe'. Ea' amam nematawa hiesi safe'
sagi'mam sanda' gwagwasi'ma etin saitu sindiwapana.

5.35-42
35 Jisas ata' na'ipakw etin, nati anom amam makwaha ipat Jairusi
mafi'i ma'ipa Jairus ma'i, "Nogamena ine'ikwi kwaga' ea'. Amama
atom dei' ina nenda' Dembinai Tisa nofo'o ekep pehana, owa', hapainai."
36 Ea' Jisas ina nembe' aligah name'amam basef amama amamumi, owa'. Ea' na'ipa Jairus na'i, "Ina umbamehena, owa'. Nembale'efa Ae' la'ifiwei."
37 Ea' Anan ina na'i a'e ma amam nematawa hiesi solomana siowis ipat anama, owa'. Anan nao'wa Pita Jems naloma owalomana Jon amam atom mawis malomana.
38 Mafe' mataga ipat Jairusi, Jisas nati esis salef mehip sa'i
sapoma'w kwapete'as.
39 Ea' nawis nomon na'ipas na'i, "Dei' maina ipe' palef patapea
kwapete'epa? Akwa'w ina kwaga' endilisi, owa'. Kwa'oh etin."
40 Ea' esis sanda' iafana kwapete'as ama na'iam na'ama. Ea'
nagalo'ma esis sawisi ande'. Anan nao'wa ahaloma'w naloma mama'wakw saloma alupumi ananimi mape malomanai, esis etis safe' sawis nomon awani inima naga' na'oma.
41 Ea' nahapila lagel akwa'unai na'ipakw na'i, "Talita kumi."
Ape' mamboma basef amama ma'i, "Nemata'w sa'ukwi, ae' a'ipina,
ine' dei' hafel."

7.18-23
18-19 Ea' na'ipam na'i, "Ipe' ina ata' pegawa! Amamaga gwa'aimi
maim mape ande'i ina monda'epa awepa, owa'. Gwa'aimi amama sa'am mowala opalef nomon ea' mafe' sakam mafe' mowala dowah. Ea' ukup ipe'imi ina aom, owa'." Jisas na'ipasa basef amama na'i, "Gwa'aimi mamumami hiami hi'alam bu'wami atom mogwam."
20 Ea' na'ipam wapoti' na'i, "Amamaga mape epes opalef nomoni,
ukup awami maim mataga ande', amama atom manda'epa awepa.
21 Amamaga awami mape ukup nomon epesi mawisi ande' na'ama. Waf naninani aonai, ukup awami, waf sanda' so'a waulanai, wal, soha enis seaga'i,
22 sohambombaga waf dase'amainai, waf kowalasanai, waf sa'i
sofa' amamaga hiami ma esis etis, baso'amunai naninani aonai,
sesambala basef, simbisambas, sa'i basef awami, ukup aoma enis
epes, findiwa, safela agof asasimi atom lu'um, waf gawa a'anai.
23 Waf anama naninani aonai, anama nape nomon ukup epesi nawisi ande' nanda'epa awepa."

9.2-8
Alop Jisasi nataga nandati na'ana, nafifil endilisi
2 Nimeguf wanom wanom mafe'ma ea', Jisas nao'wa Pita naloma
Jems naloma Jon nao'wam mondowasa' anona halaf launai. Nao'wa amam atom mape, ea' mati alop Ananinai nandati na'ana nafifil endilisi.
3 Luwaguf maim ananimi mataga afitim endilisi. Ina anona aman
etapanai la'ifina nanda' luwaguf maim mataga efitim na'ama, owa'.
4 Ea' mati amam biam fowa'imi, Elaija naloma Moses mataga maitu ma'i maloma Jisas.
5-6 Pita naloma Jemsi Jon umbamaham endilisi, ea' Pita na'i
nie'iami anom basef, ea' anan ina ata' okom napoma basef na'i
ni'iami, owa'. Ea' na'iam na'ama na'i, "Dembinai Tisa, afa' wape
na'ae andeande'. Ata' ola' anom aolah wanom, mondandafa. Ine'
anona, Moses anona, Elaija anona."
7 Ea' anom elagw maofeniam. Ea' anona malogel na'i natagai
elagw amama na'i basef na'i, "Anan Nogalome ae'anai, Ae' okom
nohafel nainailana endilisi. Ipe' peme' basef ananimi."
8 Dei' atef alupumi Jisasi wanom matologon mehip ganigani,
ina mati enin epen, owa'. Mati Jisas atona naitu nalomam.

12.28-31
Mi'uli Godi nali'i nikila' mi'uli hianai ape' membale'efanai
28 Anona aman nawalipasa mi'uli Godi nafi'i, name' amam ma'i
maloma Jisas mandahihianama basef. Ea' name' Jisas nagwamama basef bu'wami atom. Ea' nahali'ana na'i, "Mi'uli Godi ape' membale'efanai hianai. Ea' maina mi'uli lu'unai nikila' mi'uli hianai nape nali'i?"
29 Ea' Jisas nagwamana basef na'i, "Mi'uli nali'i anama.

'Ipe' Israel, ipe' peme'! Dembinai God ape'inai, Anan atona Dembinai.

30 Nomonas ipe'imi mohafela Dembinai God ipe'inai mimilana na'ama. Ukup ipe'imi mimilana hi'ilam, pese'ana ambagof opalef moloma pepel ipe'imi pese'anam hi'ilama Dembinai God atona.'

31 Ea' mi'uli nafe'ma bifi anama.

'Ipe' ukup mimila enis epes sape felefele'ma ipe'i si'i ukup maimaila ipe' etipa.'

Owa' anona mi'uli nikila' mi'uli anama biefina, owa'. Mi'uli
anama biefina ape' mombale'efanai ea' anama atona."

14.10-11
Judas nihi'amba Jisasa agufumi Juda ma mofa'ana mohana neaga'
10 Amam amama Jisasi 12-peleim anona amamunai agilinama Judas Kariotinai nafe'ma amam pris hiami dambami. Anan na'i ni'ipama Jisas atona napoma mofe' mombalo'ana.
11 Amam mame' basef ananimi mandanifel endilisi. Ea' ma'i basef
mandame'mam na'ama ma'i, "Andeande', afa' ose'ena anona moni." Ea' Judas na'i nefe' nogolopa anona eafa nihi'ambama Jisas amama mombalo'ana.

14.44-46
44 Aman anama nawalapa Jisasi, nali' na'ipam nanda' ikwaf nihi'ambam na'i, "Atuwasi piti ae' iesisi' dalogwanai, aman anama ea' Jisas ma'una. Ipe' pembalo'ana pewa'ana andeande' pefa'ana pefe'."
45 Amam ata' mataga etin, Judas nafe'ma Jisas na'ipana na'i,
"Dembinai Tisa." Ea' nasisi' dalogwana.
46 Ea' amam membalo' Jisas.

15.6-15
6 Nemaf anama esis Juda sanda' anom gwa'aimi lu'wami sa'i Pasova. Afagof hiami ma nemaf anama Pailat nanda'am na'ama. Anan nakwaha anona nape kalabusi nafe' wafifina. Emi epen esis amam nematawa sa'ianai, Pailat name'asa nakwahona nafe'mas.
7 Nogota anama anona aman nape kalabusi agilinama Barabas.
Anan nanda' kalabus naloma anom amam mapa' maloma gavmani maha enis saga'i.
8 Ea' esis hiesi safi'i saitu sofala Pailat sa'ipana sa'i,
"Ine' nekwaha anona aman nape kalabusi nifi'mai ape' wafifina,
si'i afagof hiami nanda'am."
9 Ea' nagwamasa basef na'i, "Dei' ae' ekwaha king dembinai
ipe' Judai nefe'mago ipe', o emi?"
10 Dei' main, Pailat anan nogawa amam pris dambami kowalama
epes hiesi saila basef Jisasi ukup aom atom mapomana dei' manda' kotimana.
11 Ea' amam mafela ukup ma esis amam nematawa hiesi ma sohali' Pailata nokwaha Barabas atona nufi'mai esis.
12 Ea' Pailat na'iam wapoti' na'ama na'i, "Aman anama ipe'
pefalona pa'i king dembinai esis Judai, ipe' pa'i ae' enda' i'imamana?"
13 Ea' esis sa'i mehip sa'i, "Undana nil lawag usi'inai tu'wanainai!"
14 Ea' Pailat nahali'as na'i, "Dei' main? Anan nanda' maina
waf aonai?" Ea' esis sa'i mehip sa'i, "Undana lawag hana afuna!"
15 Ea' Pailat naila ukup asasimi, nakwaha Barabas nafe'ma esis
na'ipa amam soldia ma mopagaha Jisas mofa'ana mefe'ma mundana lawag usi'inai tu'wanainai.

15.33-39
Jisas naga'
33 Aon nahagasom owamb lu'unai nataga etap hiagoma esis Judai akotigin. Owamb nape nafe' nafe' ma aon nasa nape 3 klok wambomota. Ea' aon howalagon wapoti'.
34 Aon nasa nape 3 klok, Jisas noga na'i mehip na'i, "Eloi,
Eloi, lama sabaktani?" Ape' mambomam ma'iam na'ama ma'i, "God ae'inai, God ae'inai, dei' maina ine' nakwahowe?"
35 Enis epes saitu felefele' same' anan na'iam na'ama sa'i,
"Peme'. Anan nofala profet Elaija."
36 Ea' anona aman nasagih nafe' nofa' anom mosong mape naohi nalam mowala embel wain numbutimi nagiam nasapa'am anona elifita nandowana nafe'ma Jisas nea' embel. Ea' aman anama na'ipas na'i, "Ipe' ata' ota' muti Elaija atuwasi nifi'i notagahona nisila'i o owa'?"
37 Ea' Jisas na'i mehip endilisi naga' ea'.
38 Ea' dei' lowaf anama lu'unai si'i uta nail ipat Godi lu'unai
sanda' lotuwanai nomon palalana gani ilif nowala etap nataga biefina.
39 Ea' kepten anama dembinai numafi soldia hiami, naitu felefele'ma Jisas nati anan naga' na'ama ea' na'iam na'i, "Endilisi, aman anama nogalomana Godi."

15.42-46
Amam mawa Jisas anona owap lu'unai nagal nawis nomon
42 Ea' wambomota felefele'ma owamb, Josep Arimateainai nafi'i.
43 Anan dembinai ma kot esis Judai, agel lu'unai. Nape nohafa
nemaf bu'unai notaga ma hiesi siowis wambota Godi numafias. Dei' sandandomba amamaga gwa'aimi maima naman nemaf anama Sabat notaga. Ea' Josep nafe' nawis naitu naep Pailati. Anan ina umbamahana, owa'. Nahali'ana ma nofa'ai alop Jisasi nawana.
44 Ea' Pailat gegelalasona okom na'i Jisas ina dei' afuna endilisi,
ata' owa'. Ea' nofala anona dembinai soldia nafi'i nahali'ana
na'ama na'i, "Jisas naga' ea' o owa'?"
45 Soldia anama na'ipana na'i, "Jisas naga' endilisi ea'." Ea' Pailat na'ipa Josep na'i, "Ine' nefe' nefa' alop Jisasi."
46 Fowa' nanda' anona hi'agif nagwasa owap lu'unai nagal nawis
nomon. Ea' dei' anan na'i nowa Jisas hi'agif anama. Ea' nafe'
notala anona lowaf afitinai nafi'i natagaha alop Jisasi nisila'i
ma nanda' lowaf anama nowa'ana ma ea', nasapa'ana nawis hi'agif anama nalana nomon. Ea' namboma anona owap lu'unai nafe' nowalo uta hi'agif anama.

16.1-7
Jisas notanima nohafel wapoti'
1 Nemaf anama sapoma noma'wanai nafe' hi'alana, Maria Makdalai'wi kwaloma Maria mama'wana Jems kwaloma Salomi watala anom wel alogw bu'wami ma'ami. Awau wa'i ofa'am ofe' ondisa alop Jisasi.
2 Wafilu nemaf Sande, kuhimbita atona awau ofa' wel amama wafe' hi'agif.
3 Awau ata' wafe' etin eaf, wanda'ipama na'ama wa'i, "Atuwasi
emi nigiambamafa nelefata owap anama nowalo utai?"
4 Ea' watologon, wati owap anama lu'unai ina ata' nape nowalo
uta, owa'. Enin epen nafe' nausi'ana nafe' na'oh wa'ol.
5 Awau wawis hi'agif nomon, wati anona aman sa'unai tol nape
uta wa'ol lagel da'isinaima. Nala anona lowaf launai afitinai.
Na'ama awau gegelalasowa kwapete'awa umbamahawa.
6 Ea' anan na'ipawa na'ama na'i, "Ipe' ina umbamehepa, owa'.
Ae' egawepa ipe' pafi'i pegolopa Jisas Nasaretinai, esis saundana
naga' lawag usi'inai tu'wanainai. Anan notanima nohafel ea', ina
ata' nape na'ae, owa'. Ipe' piti na'ae sofa'ana sawisi salana
nalama. Dei' wafigin nape.
7 Ea' ipe' fo'o pi'ipa alupumi ananimi ea' pi'ipa Pita nalomam
na'ama pi'i, 'Jisas nali'ipa nafe' etap hiagoma Galili. Ipe' pefo'o
petolona si'i nimbewa' na'ipipa.'"

16.15-16
15 Ea' na'ipam na'ama na'i, "Ipe' pefe' wambel hiagoma pi'ipasa
basef bu'wami Godi ma amam nematawa hiesi hi'ilas.
16 Emi egafis sembale'efa ae' sofa' baptais, anona nemaf God
notanima nefa'asi wapoti' ea' Ananisi. Ea' isima owa' sembale'ifi,
anona nemaf God nonda'mas kota basef lu'wami ma waf aonai esis sanda'anai.

16.19-20
God nofa' Jisas nalata heven
19 Dembinai Jisas nawalipas na'ipas ea', God nofa'ana nalata
heven. Ea' nofa' agel lu'unai nape lagel da'isinai Godi.
20 Ea' alupumi Ananimi mafe' gani wambel hiagoma mawalapa basef Godi. Anan nanda'am mataga la'ifim manda' ikwaf hianai naninani si'i God nanda'anai. Enis epes sati maol anama amam manda'anai sa'i, "Endilisi, God nagiambama amam ea' ape' magawa basef Ananimi endilisimi."

_____________

Copyright information:  ©World Home Bible League