Jesús - Mixtec, Tezoatlán

1.1

Diʼa ni̠ kuu, dá ni̠ ka̱sáʼá kásto̱ʼon Juan ña̱ kasaa̱ Jesús
1 Diʼa ni̠ ka̱sáʼá to̱ʼon va̱ʼa saʼa̱ Jesucristo, na̱ kúú de̱ʼe Ndios.

1.14-15

Diʼa ni̠ kuu tá ni̠ ka̱sáʼá dánaʼa̱ Jesús sa̱ʼá to̱ʼon va̱ʼa Ndios
14 Tá ni̠ tiin ra Juan ni̠ sadi ra̱ veʼe ka̱a, dá ni̠ kee Jesús kuaʼa̱n na̱ chí kuendá Galilea kasto̱ʼon na saʼa̱ to̱ʼon va̱ʼa, ña̱ káʼa̱n saʼa̱ ndi kee ña̱yuu, dá ndu̱ʼu na ti̠xi ndáʼa̱ Ndios, 15 ta kaá na̱:
—Sa̱ ni̠ kasa̱ndaá vá hora, sa̱ ni̠ ku̱yati va ña̱ ndu̱ʼu ña̱yuu ti̠xi ndáʼa̱ Ndios. ¡Nandikó iní ndo̱ sa̱ʼá kua̱chi kée ndó, ta kandísa ndó xíʼín ndinoʼo ini ndo̱ to̱ʼon va̱ʼa Ndios! —kaá na̱.

1.21-27

Diʼa ni̠ kuu tá ni̠ ndu̱va̱ʼa Jesús iin ta̱a nákaa̱ iin espíritu kini
21 Dá ni̠ na̱sáa̱ Jesús ñoo Capernaum xíʼín ta̱a ñoó. Dá tá ni̠ kasa̱ndaá kuu̱ nániʼi̠ ndée̱ na̱ Israel, dá ni̠ ku̱ʼu Jesús ini veʼe noo̱ nátaka na̱ ñoo ñoó. Dá ni̠ ka̱sáʼá ná dánaʼa̱ na̱. 22 Kúú ni̠ naá vá iní ña̱yuu ñoó sa̱ʼá ña̱ dánaʼa̱ Jesús, chi̠ ko̱ kée na táto̱ʼon kée ta̱a dánaʼa̱ ley Moisés, dá chi̠ dánaʼa̱ na̱ táto̱ʼon ki̠ʼo kée iin na̱ néʼe choon.
23 Ta ini veʼe ñoó nákaa̱ iin ta̱a nákaa̱ iin espíritu kini. Ta kúú ni̠ʼi nda̱ʼo ni̠ ka̱yuʼú espíritu kini ñoó, ta kaáa̱n:
24 —¿Ndi ki̠án ndóʼo ní xíʼín nduʼu̱, Jesús, na̱ ñoo Nazaret? ¿Á ve̱i ní dánaá ní nduʼu̱? Sa̱ náʼá vá yuʼu̱ ndá yoo kúú mií ní, chi̠ mií ní kúú na̱ ii̠ ni̠ kii noo̱ Ndios.
25 Dá ni̠ da̱náni ñaá Jesús, ta kaá na̱ xíʼán:
—¡Kadi yúʼo̱n! ¡Kuaʼán keta kíi̠ ini ta̱a xaa̱n!
26 Ta kúú vitíʼón ni̠ saʼání yi̠ʼí espíritu kini ta̱a ñoó. Ta kúú ni̠ʼi nda̱ʼo ni̠ ka̱yuʼán, dá ni̠ ketaan kuaʼa̱n.
27 Ta kúú ni̠ naá vá iní ndidaá kúú ña̱yuu ñoó, dá ni̠ ka̱sáʼá ná ndátóʼón táʼan ná:
—¿Ndi kuaʼa̱n vía̱n yóʼo? Na̱ ndeé ka̱ vía̱n káʼano ta̱ndeé iní sa̱á dánaʼa̱ ta̱a káa, chi̠ xíʼín choon kómí rá saʼándá ra̱ choon noo̱ espíritu kini, ta kúú seídóʼo ñaa̱n —kaá na̱.

1.32-34

Kua̱ʼá nda̱ʼo ña̱yuu ni̠ ndu̱va̱ʼa Jesús
32 Sa̱ ni̠ keta va ndi̠ndii, ta sa̱ kuaʼa̱n kuaá vá kuu̱ dáá ñóó, dá ndáka ña̱yuu ndidaá na̱ kúʼu̱ xíʼín na̱ ñóʼo espíritu kini ni̠ ka̱sáa̱ na̱ noo̱ Jesús. 33 Sa̱ʼá ño̱ó ni̠ chití yéʼé veʼe ñoó ni̠ na̱taka ndidaá na̱ ñoo ñoó. 34 Ta kúú kua̱ʼá nda̱ʼo ña̱yuu ndóʼo iin rá iin kueʼe̱ ni̠ ndu̱va̱ʼa na, ta kua̱ʼá nda̱ʼo espíritu kini ni̠ taó ná. Ta ko̱ sónó vá ná ña̱ kaʼa̱n espíritu kini ñoó, chi̠ náʼá vá ñá ndá yoo kúú ná.

2.1-12

Diʼa ni̠ kuu, dá ni̠ ndu̱va̱ʼa Jesús iin ta̱a ni̠ na̱tií saʼa̱
1 Tá ni̠ ya̱ʼa dao kuu̱, dá ni̠ na̱ndió ko̱o tuku Jesús ñoo Capernaum. Tá ni̠ ka̱ndaa̱ ini ña̱yuu ña̱ ni̠ ndi̠sáa̱ Jesús veʼe na, 2 kúú kua̱ʼá nda̱ʼo na ni̠ na̱taka ñoó. Ta ko̱ ní kéta ka̱ veʼe ñoó kañoʼo na. Ta kúú nda̱ sata̱ véʼe ndíta ña̱yuu seídóʼo na to̱ʼon dánaʼa̱ Jesús.
3 Dá ni̠ ka̱sáa̱ dao ka̱ ña̱yuu xíʼín iin ta̱a ni̠ na̱tií saʼa̱, ta yíʼi ñaá komi̠ ta̱a ni̠ ka̱sáa̱ ra̱. 4 Tído ko̱ ní kúu taʼon ku̱ʼu ra xíʼín ta̱ kúʼu̱ ñoó ini veʼe noo̱ nákaa̱ Jesús, chi̠ kua̱ʼá nda̱ʼo ña̱yuu ñóʼo. Sa̱ʼá ño̱ó ni̠ da̱káa ñaá rá dini̠ véʼe. Dá ni̠ sonó rá iin yái̠. Dá ni̠ kuu ni̠ da̱nóo ra xi̠to kánóo ta̱ kúʼu̱ ñoó ini veʼe noo̱ ió Jesús.
5 Tá ni̠ xini Jesús ña̱ kándéé ini ñaá rá, dá ni̠ kaa na̱ xíʼín ta̱ ko̱ ku̱ú kaka ñoó:
—De̱ʼe lóʼo̱, sa̱ ni̠ ndoo va kua̱chón —ka̱á na̱.
6 Ta kúú ñoó ndéi dao ta̱a dánaʼa̱ ley Moisés seídóʼo ra. Dá ni̠ ka̱sáʼá nákani kuáchi̠ ini ra̱: 7 “Ta, ¿ndiva̱ʼa káʼa̱n ta̱a káa dión? Ta̱a káa kúú ra̱ yáʼa káʼa̱n ndava̱ʼa xíʼín Ndios. Chi̠ ni iin tóʼón taʼon ta̱a o̱ kúu dándóo kua̱chi ña̱yuu. Iin tóʼón dini̠ mií vá Ndios kúú na̱ kuu kee dión.”
8 Tído vitíʼón diʼa va ni̠ ka̱ndaa̱ ini Jesús ña̱ ki̠ʼo dión nákani ini ra̱. Dá ni̠ nda̱to̱ʼón ñaá ná:
—¿Ndiva̱ʼa nákani ini ndo̱ dión? 9 ¿Ndí ki̠án ko̱ úʼu̱ cháá ka̱ kaʼi̠n xíʼín ta̱a ko̱ ku̱ú kaka yóʼo, káʼán ndó? “Sa̱ ni̠ ndoo va kua̱chón”, o kaʼi̠n xíʼín rá, “Ndakuii̠n ndichi, ta nakiʼin xi̠to̱n kaneʼe kuaʼa̱n nóʼo̱n.” 10 Tído viti dá ná koʼi̠n dánaʼi̠ noo̱ ndo̱ ña̱ kómí ndisa na̱ ni̠ nduu ta̱a ña̱yuu yóʼo choon ña̱ dándóo na kua̱chi kómí ña̱yuu ndéi ñayuú yóʼo.
Dá ni̠ kaa na̱ xíʼín ta̱ ni̠ na̱tií saʼa̱ ñoó:
11 —Ta káʼi̠n xíʼín yo̱ʼó viti. Ndakuii̠n ndichi, ta nakiʼin xi̠to̱n, ta kuaʼán nóʼo̱n veʼón.
12 Ta kúú ni̠ na̱kuíi̠n ndichi ra̱. Dá ni̠ na̱kiʼin ra xi̠to no̱ó ni̠ sa̱ nóo ra néʼe ra ni̠ kiʼin ra kuaʼa̱n ra̱ no̱ó ña̱yuu kuáʼa̱ ñoó. Ta kúú ndidaá vá ná ni̠ naá iní. Ta kúú ni̠ ka̱sáʼá ná kékáʼano na Ndios, ta kaá na̱ diʼa:
—Ni iin kuu̱ ko̱ xi̠nío̱ iin ña̱ʼa ndato táto̱ʼon ni̠ xinio̱ kuu̱ víti —kaá na̱.

4.35-41

Diʼa ni̠ kuu tá ni̠ saʼanda Jesús choon no̱ó tachi̠ xíʼín ta̱ñoʼo̱
35 Tá ni̠ kuaá kuu̱ dáá ñóó, dá ni̠ kaa Jesús xíʼín ta̱ xíonoo xíʼín ná:
—Ná koʼo̱ chikaʼanda yo̱ iin ka̱ xoo yuʼú ta̱ñoʼo̱.
36 Tá ni̠ ndiʼi ni̠ kaʼa̱n ta̱a xíonoo xíʼín ná ndisáʼán xíʼín ña̱yuu kuáʼa̱ ñoó, dá ni̠ kaa ra ini barco noo̱ nákaa̱ na̱. Ta ni̠ sa̱rkuei dao ka̱ barco noo̱ ñóʼo cháá ka̱ ña̱yuu kuaʼa̱n na̱ noo̱ kuaʼa̱n Jesús. 37 Ta kúú noo̱ kuaʼa̱n na̱ ñoó ni̠ ka̱sáʼá vá kána tachi̠ dée̱n. Sa̱ʼá ño̱ó ni̠ ka̱sáʼá ko̱kee ta̱kui̠í ini barco ñoó. Ta kúú sa̱ kuaʼa̱n kutí vá ini ra̱ xíʼín ta̱kui̠í. 38 Ta kúú kánduʼu̱ Jesús kídi̠ na̱ ini ra̱ noo̱ nónó chí sata̱ diʼa ra. Ta yíʼi iin dáʼo̱n dini̠ ná kánduʼu̱ ná.
Dá ni̠ da̱ndóto ñaá ta̱ xíonoo xíʼín ná ñóó, dá kaá ra̱:
—¡Maestro! ¿Á ko̱ saʼání taʼon ni mií ní ña̱ kuuo̱?
39 Dá ni̠ nda̱kuíi̠n ndichi Jesús. Dá ni̠ saʼanda na̱ choon no̱ó tachi̠ xíʼín ta̱ñoʼo̱, ta kaá na̱:
—¡Katuu! Tádi̠ kooón.
Ta kúú ni̠ sa̱ tuu va tachi̠, ta ni̠ na̱káa̱ tádi̠ vá ta̱ñoʼo̱.
40 Dá ni̠ kaa na̱ xíʼín ta̱a ñoó:
—Ta, ¿ndiva̱ʼa yuʼú téí ndo̱? ¿Á ko̱ kándéé taʼon iní ndo̱ yuʼu̱, nda̱ni?
41 Kúú ni̠ yu̱ʼú nda̱ʼo ra. Dá ni̠ ka̱sáʼá rá ndátóʼón táʼan rá:
—¿Ndá yoo ví kúú na̱ yóʼo, chi̠ nda̱ tachi̠ xíʼín ta̱ñoʼo̱ seídóʼo choon saʼanda na̱? —kaá ra̱.

5.22-24

22 Dá ni̠ ka̱sáa̱ iin ta̱a naní Jairo, táʼa̱n ra̱ dándáki veʼe noo̱ nátaka na̱ Israel ndéi ñoo ñoó. Tá ni̠ xini ra̱ Jesús, kúú ni̠ sa̱ kuíi̠n xi̠tí rá noo̱ ná. 23 Dá ni̠ ka̱sáʼá rá seí ndaʼí ra̱ noo̱ ná, ta kaá ra̱:
—Sa̱ xíʼi̠ va de̱ʼe diʼíi̠. Nakíi̠ ní ná koʼo̱ chinóo ní ndáʼa̱ ní sata̱ xí, dá ná nduva̱ʼa xi, dá ná o̱ ku̱ú xi.
24 Dá ni̠ kee Jesús kuaʼa̱n na̱ xíʼín rá. Ta kua̱ʼá nda̱ʼo ña̱yuu ni̠ kee kuaʼa̱n xíʼín ná, ta dándútí ná Jesús kuaʼa̱n na̱.

5.35-42

35 Ta kúú káʼa̱n i̠íó Jesús íin na, kúú sa̱ ni̠ ka̱sáa̱ va dao ta̱a ni̠ kii veʼe Jairo, táʼa̱n ra̱ dándáki veʼe noo̱ nátaka na̱ ñoo ñoó. Dá ni̠ kaa ra̱ xíʼín Jairo ñoó:
—Sa̱ ni̠ xiʼi̠ va de̱ʼe diʼí ní. Ná dáʼa ka̱ ní dátaʼán ní maestro xaa̱n.
36 Tá ni̠ seídóʼo Jesús ña̱ ni̠ kaʼa̱n ra̱ dión, dá ni̠ kaa na̱ xíʼín Jairo:
—O̱ sa̱ yúʼóo̱n. Sa̱va̱ʼa yuʼu̱ kandeé inóo̱n —kaá na̱.
37 Ta kúú ko̱ ní sónó taʼon Jesús noo̱ dao ka̱ ña̱yuu ña̱ koʼo̱n na̱ xíʼín ná veʼe ta̱a ñoó, sa̱va̱ʼa Pedro xíʼín Jacobo xíʼín ñani ra̱ naní Juan va ndáka na kuaʼa̱n na̱. 38 Dá tá ni̠ saa̱ na̱ ni̠ ku̱ʼu na veʼe Jairo, kúú ni̠ xini na̱ ña̱ nína vaa̱ nda̱ʼo ña̱yuu ndéíʼi̠ na̱ ndéi na, ta ndaʼí káyuʼú ná saʼa̱ tadiʼí ñoó. 39 Dá ni̠ kaa Jesús xíʼín ná:
—¿Ndiva̱ʼa nína vaa̱ téí ndo̱? Ta, ¿ndiva̱ʼa ndéíʼi̠ téí ndo̱ ndéi ndó? Chi̠ ko̱ ní xíʼi̠ taʼon xi, kídi̠ va xi —kaá na̱.
40 Tído ni̠ saki̠ ndaa va ñaá ña̱yuu ñoó. Dá ni̠ saʼanda Jesús choon ña̱ ná kankuei ndidaá ná sata̱ véʼe. Dá ni̠ kana na tatá tadiʼí ñoó xíʼín naná xi̠ xíʼín ndin oni̠ ka̱ ta̱a ndáka na kuaʼa̱n na̱ ñoó. Dá ni̠ ku̱ʼu na noo̱ kánduʼu̱ xí. 41 Dá ni̠ tiin Jesús ndáʼa̱ xí. Dá ni̠ kaa na̱:
—Talita, cumi —ka̱á na̱. To̱ʼon yóʼo kóni̠ kaa: Diʼí lóʼo̱, káʼi̠n xíʼón, ndako̱o.
42 Ta kúú vitíʼón diʼa vá ni̠ nda̱ko̱o xi. Ta kúú ni̠ ka̱sáʼá xíka xi xíonoo xi. Ta uxi̠ uu̱ kuia̱ ió xi. Tá ni̠ xini ña̱yuu ñoó, kúú ni̠ naá nda̱ʼo iní na̱.

7.18-23

18 Dá ni̠ kaa na̱ xíʼín rá:
—¿Á dión taʼani ko̱ kátóni̠ taʼon ini ndo̱ʼó? ¿Á ko̱ kándaa̱ taʼon ini ndo̱ ña̱ ni iin ña̱ʼa seí ña̱yuu ko̱ dáyako̱ ñaá noo̱ Ndios? 19 Dá chi̠ o̱ du̱ú nío̱ ná ko̱kee ña̱ʼa seí na̱. Ini ti̠xi va na kuaʼa̱n. Ta kúú tá ni̠ ndiʼi, dá kuaʼa̱n na̱ sata̱ véʼe tatá náa̱n.
Dión ni̠ kaa Jesús, dá ná kandaa̱ ini ra̱ ña̱ ni iin ña̱ʼa seí yo̱ ko̱ dáyako̱ ñaá noo̱ Ndios.
20 Ta ni̠ kaa taʼani Jesús xíʼín rá:
—Ña̱ kini kánkuei ini nío̱ ña̱yuu, ño̱ó vá kía̱n dáyako̱ ñaá noo̱ Ndios. 21 Dá chi̠ nda̱ ma̱á ini nío̱ vá ná ve̱i ña̱ kini nákani ini na̱ kee na, dá kee na kua̱chi xíʼín na̱ ko̱ kúú ñadiʼí na̱ o yíi̠ ná, ta kée na ña̱ kaʼan noo̱ xíʼín ñíi̠ ná, ta saʼání ná ña̱yuu, 22 ta kíʼin kuíʼíná ná ña̱ʼa, ta kátoó na̱ ña̱ʼa ió noo̱ dao ka̱ na̱, ta ió ña̱ xíxi ini na̱, ta ndúkú ná ña̱ dándaʼí na̱ dao ka̱ ña̱yuu, ta ni lúʼu̱ ví ko̱ chítuu ini na̱ kée na ña̱ kini, ta uʼu̱ ini na̱, ta ndéineʼe táʼan na, ta chíndaya̱ʼi na mií ná, ta kúú ná na̱ ko̱ xíkaʼan noo̱. 23 Ta ndidaá ña̱ yóʼo kía̱n kánkuei nda̱ ma̱á nío̱ ná, ta dáyako̱ ñaá noo̱ Ndios.

9.2-8

Diʼa ni̠ kuu tá ni̠ na̱yeʼe̱ ndaa noo̱ Jesús xíʼín dáʼo̱n ná
2 Tá ni̠ ya̱ʼa iño̱ kuu̱, dá ni̠ kee Jesús ndáka na Pedro, xíʼín Jacobo, xíʼín Juan kuaʼa̱n na̱ dini̠ iin yúku̱ dikó íin ñoó. Ta ñoó ni̠ na̱da̱on na táto̱ʼon káa na no̱ó ta̱a ñoó. 3 Kúú ni̠ na̱yeʼe̱ ndaa dáʼo̱n ná. Ta kúú ni̠ ndu̱ku̱xí kachi̠án táto̱ʼon ki̠ʼo ndéʼé yiʼo̱. Ta ni iin ña̱yuu nákata dáʼo̱n ndéi ñayuú yóʼo ko̱ kándeé taʼon dándúkuxía̱n táto̱ʼon ki̠ʼo ndato kuxí ni̠ nduu dáʼo̱n Jesús. 4 Dá ni̠ naʼa̱ noo̱ profeta Elías xíʼín Moisés, ta ndíta na ndátóʼón ná xíʼín Jesús. 5 Dá ni̠ kaa Pedro xíʼín Jesús:
—Va̱ʼa kúú ndéi nduʼu̱ yóʼo, maestro. Ná kava̱ʼa ndu oni̠ ti̠yaʼó. Iian ná koo mií ní, ta iian ná koo Moisés, ta iin ka̱a̱n ná koo Elías.
6 Dión ni̠ kaa ra̱, chi̠ ko̱ náʼá taʼon ra ndí ki̠án káʼa̱n ra̱ sa̱ʼá ña̱ ni̠ yu̱ʼú ra̱. 7 Kúú ni̠ na̱xino̱ iin viko̱. Ta kúú ni̠ chi̠káti̠án noo̱ ndíta na. Ta tein viko̱ ñoó ni̠ kaʼa̱n tachi̠ Ndios:
—Ta yóʼo kúú de̱ʼe mani̠ yuʼu̱. Kueídóʼo ndó to̱ʼon káʼa̱n xi̠ —kaá na̱.
8 Tá ni̠ na̱nde̱ʼé tuku ra, kúú sa̱ ko̱ó ka̱ va ta̱a ñoó ndíta. Nda̱dá iin tóʼón míí vá Jesús íin.

12.28-31

Yóʼo dánaʼa̱ Jesús ndi káa choon ndáya̱ʼi cháá ka̱ ni̠ saʼanda Ndios keeá
28 Dá ni̠ na̱tuu yati iin ta̱a dánaʼa̱ ley Moisés, ta ni̠ sei̠do̱ʼo ra ña̱ ni̠ kaʼa̱n Jesús xíʼín ta̱ saduceo ñoó. Kúú ni̠ ka̱tóni̠ ini ra̱ ña̱ va̱ʼa nda̱ʼo ni̠ na̱ndió néʼe na ña̱ ni̠ nda̱to̱ʼón ñaá rá sa̱ʼá na̱ ni̠ xiʼi̠. Sa̱ʼá ño̱ó ni̠ nda̱to̱ʼón ñaá rá:
—¿Ndi káa iin choon ndáya̱ʼi cháá ka̱ noo̱ ndidaá ka̱ choon ni̠ saʼanda Ndios keeá?
29 Dá ni̠ kaa Jesús xíʼín rá:
—Choon ndáya̱ʼi cháá ka̱ noo̱ ndidaá ka̱ choon ni̠ saʼanda Ndios keeá kía̱n kaáa̱n diʼa: “Kueídóʼo ndoʼó, na̱ ñoo Israel. Ndios, na̱ kúú satoʼo yo̱, iin tóʼón dini̠ mií vá ná kúú Ndios. 30 Koni̠ ndo̱ satoʼo yo̱ Ndios xíʼín ndinoʼo nío̱ ndo̱, xíʼín ndinoʼo ini mií ndó, xíʼín ndidaá ña̱xintóni̠ ndo̱, ta xíʼín ndidaá kúú ndée̱ ndo̱.” Ña̱ yóʼo kúú choon ndáya̱ʼi cháá ka̱ ni̠ saʼanda Ndios keeá. 31 Ta ña̱ kúú uu̱ kía̱n sá kíʼin táʼan xíʼín ña̱ yóʼo, chi̠ diʼa kaáa̱n: “Kuʼu̱ ini ndo̱ sa̱ʼá ña̱yuu xi̠ʼín ndó táto̱ʼon ki̠ʼo ndóʼo ndó xíʼín mií ndó.” Ta ko̱ó ka̱ choon ndáya̱ʼi cháá ka̱ noo̱ ndin nduú choon yóʼo —kaá na̱.

14.10-11

Diʼa ni̠ kuu, dá ni̠ ka̱ndo̱o Judas ña̱ naki̠ʼo ra Jesús noo̱ ndáʼa̱ ta̱ duti̠ kúú no̱ó
10 Dá ni̠ kee Judas Iscariote, táʼa̱n ra̱ nákaa̱ tein ndin uxi̠ uu̱ ta̱a xíonoo xíʼín Jesús, kuaʼa̱n ra̱ di̠kó rá Jesús no̱ó ta̱ duti̠ sakua̱ʼa̱. 11 Tá ni̠ sei̠do̱ʼo ta̱ duti̠ ñoó ña̱ ni̠ kaʼa̱n Judas xíʼín rá, kúú ni̠ kadii̠ nda̱ʼo ini ra̱. Dá ni̠ ka̱ndo̱o ra ña̱ ki̠ʼo ra di̠ʼón noo̱ rá. Dá ni̠ ka̱sáʼá ndúkú Judas ndí koo kee ra, dá naki̠ʼo ra Jesús noo̱ ndáʼa̱ ro̱ón.

14.44-46

44 Sa̱ ni̠ ka̱sto̱ʼon va Judas xíʼín ta̱a ñoó ndi kee ra dánaʼa̱ ra̱ ndá yoo kúú Jesús, chi̠ diʼa ni̠ kaa ra̱:
—Ta̱a ni̠ chitóí noo̱ ñoó, ro̱ón kúú tiin ndó kandaka ndó koʼo̱n ndo̱, ta kandaa va̱ʼa ndó ra̱ —kaá ra̱.
45 Dá tá ni̠ na̱tuu yati Judas noo̱ íin Jesús, dá ni̠ kaa ra̱ xíʼín ná:
—Nákaa̱ ní, maestro.
Dá ni̠ chitó rá noo̱ ná. 46 Dá ni̠ na̱tuu ta̱a kuaʼa̱ ñoó ni̠ tiin ra Jesús.

15.6-15

Diʼa ni̠ kuu, dá ni̠ saʼanda Pilato choon ña̱ ná karkaa Jesús ndi̠ka cruz
6 Tein iin iin víko̱ pascua dáyaa̱ Pilato iin ta̱a nákaa̱ veʼe ka̱a, táʼa̱n ra̱ kándo̱o na̱ ñoo Israel saʼa̱. 7 Daá ñóó nákaa̱ iin ta̱a naní Barrabás veʼe ka̱a, ta ñóʼo taʼani dao ka̱ ta̱a kíʼin táʼan xíʼín rá saʼání rá ndi̠i. Ro̱ón kúú ta̱a ni̠ nda̱kuei ni̠ na̱á xíʼín ta̱ néʼe choon romano. 8 Dá ni̠ ka̱sáa̱ kua̱ʼá nda̱ʼo ña̱yuu noo̱ Pilato. Dá ni̠ ka̱sáʼá xíka̱ na̱ noo̱ rá ña̱ ná dáyaa̱ ra̱ iin ta̱a nákaa̱ veʼe ka̱a, táto̱ʼon ki̠ʼo kée ra tein iin rá iin víko̱ pascua. 9 Dá ni̠ kaa ra̱ xíʼín ña̱yuu ñoó:
—¿Á kóni̠ ndo̱ ña̱ dáyaa̱i̠ na̱ kúú rey no̱ó na̱ Israel yóʼo?
10 Dión ni̠ kaa ra̱ chi̠ ni̠ ka̱ndaa̱ va ini ra̱ ña̱ sa̱ʼá ña̱ uʼu̱ ini vá ta̱ duti̠ sakua̱ʼa̱ ñoó, sa̱ʼá ño̱ó ni̠ na̱ki̠ʼo ñaá rá noo̱ ndáʼa̱ rá. 11 Tído ni̠ da̱káʼa̱n kue̱ʼé ta̱ duti̠ sakua̱ʼa̱ ñoó ña̱yuu kuáʼa̱ ñoó, dá ni̠ xika̱ na̱ ña̱ va̱ʼa cháá ka̱ Barrabás ná dáyaa̱ ra̱. 12 Dá ni̠ nda̱to̱ʼón ñaá Pilato, ta kaá ra̱:
—¿Ndí ki̠án kóni̠ ndo̱ kee yuʼu̱ xíʼín ta̱a chínaní ndó kúú rey no̱ó na̱ Israel yóʼo, tá dáá?
13 Dá ni̠ ka̱yuʼú ña̱yuu kuáʼa̱ ñoó:
—¡Chirkaa ní ra̱ ndi̠ka cruz!
14 Dá ni̠ kaa Pilato:
—¿Ndí ki̠án kini ni̠ ya̱ʼa ta̱a yóʼo ni̠ kee ra?
Tído kúú ni̠ʼi cháá ka̱ ví ni̠ ka̱sáʼá káyuʼú ña̱yuu kuáʼa̱ ñoó:
—¡Chirkaa ní ra̱ ndi̠ka cruz!
15 Ta sa̱ʼá ña̱ kóni̠ Pilato kando̱o va̱ʼa ra no̱ó ña̱yuu kuáʼa̱ ñoó, sa̱ʼá ño̱ó ni̠ da̱yáa̱ ra̱ Barrabás. Dá tá ni̠ ndiʼi ni̠ kani soldado Jesús xíʼín chirrión, dá ni̠ na̱ki̠ʼo ñaá Pilato noo̱ ndáʼa̱ rá, dá ná koʼo̱n ra̱ chirkaa ñaá rá ndi̠ka cruz.

15.33-39

Diʼa ni̠ kuu tá ni̠ xiʼi̠ Jesús
33 Tá ni̠ kasa̱ndaá ka̱xuu̱, dá ni̠ na̱kuíi̠n naá iin níí kúú ñayuú nda̱ ka̱ oni̠ sa̱ʼini. 34 Dá tá ni̠ kasa̱ndaá ka̱ oni̠ ñoó, kúú ni̠ʼi nda̱ʼo ni̠ ka̱yuʼú Jesús, ta kaá na̱:
—Eloi, Eloi, ¿lama sabactani? —To̱ʼon yóʼo kía̱n kóni̠ kaa: Ndios miíi̠, Ndios miíi̠, ¿ndiva̱ʼa ni̠ da̱yáa̱ ndáʼa̱ ní yuʼu̱?
35 Tá ni̠ sei̠do̱ʼo dao ka̱ ta̱a ndíta ñoó ña̱ ni̠ kaʼa̱n na̱ dión, dá ni̠ kaa ra̱:
—Kueídóʼo ndó, chi̠ kána ra profeta Elías.
36 Kúú ni̠ ka̱nkono iin ta̱a ni̠ saʼa̱n ra̱ ni̠ da̱ndáxi ra iin táʼí dáʼo̱n xíʼín vino iá. Dá ni̠ soʼoni ra̱án dini̠ iin ta̱ñi̠í. Dá ni̠ chi̠rnee raa̱n yúʼu̱ Jesús, dá ná koʼo na ra̱. Dá ni̠ kaa ra̱:
—Ná dáʼa ni kee ndo dión. Ná kandati yó, dá ná kande̱ʼá á kasaa̱ Elías dánóo ñaá ná —kaá ra̱.
37 Ta kúú ni̠ʼi nda̱ʼo ni̠ ka̱yuʼú Jesús, dá ni̠ xiʼi̠ na̱. 38 Ta kúú mií dáá vá ni̠ ndata̱ dao dáʼo̱n tákaa ndadí ini veʼe ño̱ʼo káʼano. Ni̠ keean nda̱ yúʼa̱n ni̠no, ta kúú nda̱ yúʼa̱n nino̱ ni̠ xino̱ no̱ó ni̠ ndata̱ ñá.
39 Ta mií ta̱a dándáki soldado íin noo̱ tákaa Jesús ñoó. Kúú ni̠ xini ra̱ táto̱ʼon ni̠ ka̱yuʼú ná tá ni̠ xiʼi̠ na̱, dá ni̠ kaa ra̱:
—¡Miía̱n ndaa̱ ndisa de̱ʼe Ndios ni̠ sa̱ kuu ta̱a yóʼo!

15.42-46

Diʼa ni̠ kuu, dá ni̠ ndu̱xi Jesús
42 Sa̱ ni̠ ini va kuu̱ dáá, ña̱ kía̱n mií kuu̱ kénduu na̱ Israel ña̱ʼa keí ná taa̱n, chi̠ sa̱ kuaʼa̱n kasandaá va kuu̱ nániʼi̠ ndée̱ ná. 43 Ió iin ta̱a naní José, ta kúú rá ta̱ ñoo Arimatea. Ta kúú rá iin ta̱a ndáya̱ʼi tein ta̱ néʼe choon no̱ó na̱ Israel. Ta ndáti taʼani ra ña̱ kasaa̱ Ndios dándáki na ñayuú yóʼo. Ro̱ón kúú ra̱ ni̠ xi̠ʼo ndeé iní ni̠ ku̱ʼu ra noo̱ nákaa̱ Pilato. Dá ni̠ xika̱ ra̱ noo̱ Pilato ña̱ ná naki̠ʼo ra yikí ko̱ño Jesús noo̱ rá. 44 Kúú ni̠ naá vá iní Pilato tá ni̠ ka̱ndaa̱ ini ra̱ ña̱ sa̱ ni̠ xiʼi̠ va Jesús. Dá ni̠ kana ra ta̱ dándáki soldado ñoó. Dá ni̠ nda̱to̱ʼón ñaá rá, á ndaa̱ ña̱ sa̱ ni̠ xiʼi̠ va na. 45 Dá ni̠ kaa ta̱ dándáki soldado ñoó ña̱ sa̱ ni̠ xiʼi̠ va na. Dá ni̠ saʼanda Pilato choon ña̱ ná naki̠ʼo ra yikí ko̱ño Jesús noo̱ José. 46 Dá ni̠ saʼa̱n José ñoó ni̠ xiin na iin sábana sa̱á. Dá ni̠ da̱nóo ra yikí ko̱ño Jesús ndi̠ka cruz. Dá ni̠ na̱chi̠tuú ñaá rá xíʼín sábana ñoó. Dá ni̠ saʼa̱n ra̱ ni̠ chi̠káa̱ ñaá rá ini iin yái̠ káʼano ni̠ ka̱va̱ʼa ndi̠ka iin káo̱. Dá ni̠ da̱kui̠ó tuú ra̱ iin yuu̱ chi̠káʼano ni̠ sadi ra̱ yéʼán.

16.1-7

Diʼa ni̠ kuu tá ni̠ na̱taki Jesús
1 Tá ni̠ ya̱ʼa kuu̱ nániʼi̠ ndée̱ na̱ Israel, dá ni̠ saʼa̱n María Magdalena, xíʼín Salomé, xíʼín María naná Jacobo ni̠ xiin na ndutá támi sáʼa̱n kaneʼe na koʼo̱n na̱ chiʼi na yikí ko̱ño Jesús, káʼán ná. 2 Ta naʼa va̱ʼa kuu̱ mií no̱ó kásáʼá saʼa̱ semana, dá ni̠ kee na kuaʼa̱n na̱ yái̠ noo̱ nákaa̱ yikí ko̱ño Jesús. Ta kúú du̱ú ni̠ xi̠nko̱o va ndi̠ndii. 3 Ta kúú ndátóʼón ná kuaʼa̱n na̱ íchi̠ ñoó, ta kaá na̱:
—¿Ndá yoo ví niʼi̠ yo̱ di̠tá yuu̱ ndadí yúʼu̱ yái̠ ñoó?
4 Tído tá ni̠ saa̱ yati na, kúú ni̠ xini va na ña̱ sa̱ ni̠ ku̱xoo va yuu̱ káʼano ni̠ sa̱ ndadi yúʼu̱ yái̠ ñoó. 5 Dá tá ni̠ ku̱ʼu na inia̱n, kúú ni̠ xini na̱ ió iin tayií chí xoo kuáʼa diʼa. Ta ndíxi xi iin dáʼo̱n kuxí chi̠káni̠. Ta kúú ni̠ yu̱ʼú nda̱ʼo na̱ ñáʼa̱ ñoó. 6 Dá ni̠ kaa xi̠ xíʼín ná:
—Ná dáʼa ni yu̱ʼú ndo̱, chi̠ sa̱ náʼá váí ña̱ nándukú ndó Jesús, na̱ ñoo Nazaret, na̱ ni̠ sa̱rkaa ndi̠ka cruz. Tído ni̠ na̱taki va na. Kande̱ʼé ndó no̱ó ni̠ chi̠nóo ñaá rá. Ko̱ó ka̱ na̱ nákaa̱ yóʼo. 7 Kuaʼán kíi̠ ndo̱ kasto̱ʼon ndó xíʼín Pedro, xíʼín dao ka̱ ta̱a xíonoo xíʼín ná ña̱ kuió no̱ó Jesús koʼo̱n na̱ noo̱ rá chí Galilea diʼa. Ta nda̱ ñoó ví, dá koni ñaá rá táto̱ʼon ki̠ʼo ni̠ sa̱ kaʼa̱n na̱ xíʼín rá —kaá ángel ñoó.

16.15-16

15 Dá ni̠ kaa na̱ xíʼín rá:
—Kuaʼán ndo̱ kanoo ndó iin níí kúú ñayuú dánaʼa̱ ndo̱ sa̱ʼá to̱ʼon va̱ʼa ña̱ káʼa̱n sa̱ʼí noo̱ ndidaá kúú ña̱yuu. 16 Ta ndi ndáa na̱ ni̠ ka̱ndísa ñaá, ta ni̠ sodo̱ ndúta̱ ná, no̱ón kúú na̱ dáka̱ki Ndios. Tído na̱ ko̱ ní xíin kandísa to̱ʼon va̱ʼa yóʼo, no̱ón kúú na̱ kando̱o kakomí kua̱chi noo̱ Ndios.

16.19-20

Diʼa ni̠ kuu tá ni̠ nana Jesús kuaʼa̱n nóʼo̱ ná induú
19 Tá ni̠ ndiʼi ni̠ kaʼa̱n satoʼo yo̱ Jesús to̱ʼon yóʼo, dá ni̠ kee na ko̱nana na kuaʼa̱n nóʼo̱ ná induú. Kúú ni̠ na̱ko̱o na xoo kuáʼa Ndios.
20 Dá ni̠ kee ta̱a xíonoo xíʼín ná ñóó kuaʼa̱n ra̱ dánaʼa̱ ra̱ to̱ʼon va̱ʼa sa̱ʼá Jesús ndidaá kúú ñoo. Ta kúú sa̱ chi̠ndeé vá ñaá míí satoʼo yo̱ Jesús, ta ni̠ naʼa̱ na̱ ña̱ ndaa̱ kía̱n ni̠ kaʼa̱n ra̱, chi̠ ni̠ xi̠ʼo na ña̱ kandeé rá kee ra ña̱ʼa ndato. Dión ná koo.