Jesuu - Mixtec, Coatzospan
Here are some extracts from a Mixtec, Coatzospan translation of the Bible that talk about Jesus. The extracts are from the Gospel of Mark.

1.1
Kakaʼan ntódo Juaan Bautista ñuu itsí kān
(Mt. 3:1-12; Lc. 3:1-9, 15-17; Jn. 1:19-28)
1.1 Dukuān o iñɨ ntuʼu e dóo váʼā ó kakaʼan túʼun īña Jesúcristu, dɨ́vi Īʼxá Xuva kō, ña tuví e dukún kān.

1.14-15
Eni ntuʼu Jēsuu kakáʼan ntódo ña ñuú Galilea
(Mt. 4:12-17; Lc. 4:14-15)
1.14 Dā inúu kutu Juaan viútun sán ne, xée Jēsuu ñuú Galilea, kakaʼan ntódo ña, kakaʼan ña nté kuān nte váʼā ó kadē kûʼvé Xuva kō.
1.15 Kakaʼan ña:
—E xée ūra í ve. Ña náʼā ka dá kixkadā kûʼvé Xuva kō. Dukuān né, natuʼvi ntó kuetsi nto ne, kuintiʼxe nto túʼūn é vāʼá san —kaʼan ña.

1.21-27
Uun ñaʼa, ñá nuu é ña váʼā nima i
(Lc. 4:31-37)
1.21 Xée ña ñūu é nani Capērnau. Ntuvi é ntoo kadin ñaʼa sán ne, kuéʼen Jēsuu má viʼī mi ntánataká nuu ña Israeé ne, eni ntuʼu ñā nakuaʼa ña ñaʼá san.
1.22 Ñaʼa sán ne, dōo vaʼá kuinī ñá da téku ña é kuān nte váʼā ó kakaʼan Jésuu. Ñá te ni kāʼan ñá ni ña vatā ó kakaʼan mastrú lei íña Xuva ko, tsi dóo iō ña é kāʼan ña dá kanakuāʼa ña.
1.23 Tuví uun ñaʼa má ūkún kān, ña é nuu e ña váʼā nima i. Kakaʼan ñátīí san:

1.24 —¿Nté kui kānateñu nuu nto ntɨ́, Jesuu, ñá ñuú Nazaree? ¿Vēxkáʼni ntu nto ntɨ? Iní ntɨ nto, tsí Xuva kō táxnūu ña nto —kaʼan ña.

1.25 Ntá tsi de tíi Jesuu ni é ña váʼā san, kakaʼan ña:
—¡Ntiin iʼa, tsí ña te íña o sáʼā! —kaʼan ña.

1.26 Īde é ña váʼā san é xiʼi mii ñatīí san ne, dōó ntii kachuʼu ntáa é ña váʼā san da ntíi, kueʼen.
1.27 Koó dā kúduʼva ña ntâñɨ́ san ne, ntákaʼan ña:
—¿Xoó ñaʼa ntu ña sāʼa e kúvi idé ña é nakūnu ña é ña váʼā san? Ña sāʼá ne, e túku o kadē kúʼvē ña. Kakutíi ña kanakūnu ña é ña váʼā san. ¿Né ntu nchuʼún kanakuāʼa ña kō? ¿Ō nchuʼún xeé ntu, ne, nté kaa? —kaʼan ñáʼa san.

1.32-34
Dōó tɨtɨ́n ña nchokuvi ntaváʼa Jesuu
(Mt. 8:16-17; Lc. 4:40-41)
1.32 Dā kuáā, da idó nuu ngántii sán ne, ñá tē nté kaa ñaʼa xee ña mí tuví Jesuu, xee níʼi ña ña nchokuví ni ñā é ñuʼu é ña váʼā nima i.
1.33 Un ntɨɨ́ ntɨ̄ɨ́ ña ñuu í san ne, nātaká nuu ña xiʼi kan.
1.34 Ñá tē nté kaa ñaʼa ntaváʼa Jesuú da nēé ka kuiʼi ntákuvi ña. Nakúnu ñā é ña váʼā san é ñūʼu nima ñáʼa san dɨ. Ñá ni xēʼé Jesuu itsi é kāʼan é ña váʼā san xoo é dɨvi ñā, tsí e ña váʼā san ne, ini tsí Iʼxá Xuva ko ñā.

2.1-12
Ntāváʼa Jesuu úun ñaʼa, ñá xiʼi kúñu ī
(Mt. 9:1-8; Lc. 5:17-26)
2.1 Dā kútɨtɨ́n ntuvi ne, nāxee Jésuu ñuu é nani Capērnau. Ura tsí i kútuni ñáʼa san é tuví ña uun viʼi.
2.2 Ñá tē nté kaa ñaʼa nátaká nuu ña; ntē ña ni xee táʼan viʼi san é kuntōo ña má viʼi kān é kīni ña é kākaʼan ña.
2.3 Kidáā ne, xée kɨ̄mi ñaʼa, odo ña uun ñaʼa, ña xiʼi kúñu ī.
2.4 Ñá nī kúvi kuīta ntíʼxin ña má viʼī mí tuví Jesuu, tsí ña te nté kaa ñaʼa ntáñɨ̄ ña. Dukuān ne, kúxēe ña dɨkɨ viʼi kan né, nākaán ña un siin dɨkɨ̄ viʼí san mí tuví Jesuu. Mí kantīí ne, nákīí ña chidō é nuu ña xiʼi kúñu ī san iní viʼi kān.
2.5 Dā íni Jesuu tsí ña odō ña xiʼi kúñu ī sán ne, nɨɨ̄ kuéʼen ini ña ntákuintiʼxe ña ne, kakaʼan ñá nī ña nchokuví san:
—É ntōo kuétsi o vē, daʼ —kaʼan ña.

2.6 Īó mastrú lei Xúva kō é ntoo ña ne, ntádē kuení ña:
2.7 “¿Nté kui kuān ó kakaʼan ntú ña sāʼa? ¿Ña kaíko ñuʼu ntu ña Xuva kō? Tsí xoxó ñaʼa ñuxiví sa é kūvi nakate ña kuétsi kō. Da mii tsi Xuva kō é kūvi vií ña”, dé kuení ña.
2.8 Kūtuni Jésuu nté ō ntádē kuení ña ne, kakaʼan ñá ni ñā:
—¿Nté kui kuān ó ntádē kuení nto?
2.9 ¿Neé ntu e dií ka ña víʼxin kaa é kāʼán u ni ña sāʼá, te kuinī nto? ¿Ō kaʼán ntu u: “É ntōo kuétsi o”, ō kaʼán ntu u: “Nakuntítsin, kuniʼin chido ō, kunúʼūn nú viʼi o kān”, koo kaʼán u?
2.10 Ntio ko é na kūtuni nto tsí xuʼu é vēxkúvi ú ñatīí ne, kuvi nakate u kuétsi ntō ñuxiví sa —kaʼan Jésuu ni mastrú leí san.
Kidáā ne, kakaʼan ñá nī ña xiʼi kúñu ī san:

2.11 —Dɨvīn é kākaʼán u ni ō ne, nakuntítsin, kuniʼin chido ō, kunúʼūn nú viʼi o kān —kaʼan Jésuu ni ña.

2.12 Ura tsí i nakuntítsi ña, nákiʼi ña chido ñā ne, kúnūʼú ña nú viʼi ña kān. Koó dā kúduʼva ñaʼa san ne, nánūʼu ñá iní ña Xuva kō, ntákaʼan ña:
—Váta ūun ito kini o é kuān ó kakuvi, é kāntuváʼa ñaʼa san —kaʼan ña.

4.35-41
Dā natúʼu Jesuu tátsin ni ntūté san
(Mt. 8:23-27; Lc. 8:22-25)
4.35 Dā kuáa ntuvi tsikán ne, kakaʼan Jésuu ni ña ntɨníʼi ñā:
—Kuíta ntiʼxin o ūun xo diñɨ ntute san ve —kaʼan ñá ni ñā.

4.36 Kidáā né, ña ntɨniʼi Jēsuu tsóo mii ña ūn ntɨɨ́ ntɨ̄ɨ́ ñaʼa san, dá kūxée ña iní tun ntōo mí nuu Jesuu. Tɨtɨ́n ñaʼa kūxée ña tuku tun ntōo é kɨ̄ʼɨn ñá ni Jēsuu.
4.37 Kidáā ne, iñɨ ntúʼu ínu tātsín ō ne, uun ito tsi kukɨ́ʼvi ntūte iní tun ntōó san un tsi da nte tsítu ntute.
4.38 Jesuú ne, kakidi ña ata tún ntōó san, xɨʼɨ téu ña doo dɨ́kɨ. Nantóto ña ntɨniʼi Jēsuu ña, ntákaʼan ñá ni ñā:
—¡Mastrû! ¿Ñā ntu te káde nto kuenta é dóko sa téni ō? —kaʼan ñá ntɨniʼi ñā.

4.39 Kidáā ne, nákuntītsí Jesuu, dá kakāʼan ñá ni tātsin ni ntuté san:
—¡Nakunúun kadin! ¡Diin diin tsi kutūvin! —kaʼan ña.
Xíō kadin tatsin ni ntuté san.
4.40 Kidáā ne, kakaʼan Jésuu ni ña ntɨníʼi ñā:
—¿Nté kui ntaúʼvī ntú nto? ¿Ña ntákuintiʼxe ntu nto tsi dóo kaʼnu Xuva kō? —kaʼan ña.

4.41 Dā kúduʼva ña ntɨniʼi ñā ne, ntánatíin mii ñā:
—¿Nēe ñáʼa ntu ña sāʼa é un tsi nte tatsin ni ntuté san ntáde ntaa é kākaʼan ña? —kaʼan ñá ntɨniʼi ñā.

5.22-24
5.22 Ikan vēʼxí uun ñaʼa, ña nteé ntaʼa i xiʼi úkūn ña Israeé san, ñá nanī Jairu. Dā íni ña Jesuú ne, ínchɨtɨ ña nūu ñá ne,
5.23 kakaʼan ña:
—Dóko sā kúvi iʼxá ko. Kiʼxi nto, tɨɨn ntaʼa ntō í, na kūtíi ntuváʼa —kaʼan ña.

5.24 Kidáā ne, kuéʼen Jēsuu ni ña. Ñá te da dīi ñaʼa kuéʼen ñá dɨ. Dōo táʼu nūu Jesuu méʼñū ñaʼa san.

5.35-42
5.35 Nɨɨ dukuan kākaʼan Jésuu ni ñadɨʼɨ́ san ne, xée ñāʼa, ña véʼxī nte nú viʼī Jairu, ña é nchokuvi dióko ī. Ñaʼa sán ne, ntákaʼan ña:
—E xíʼi dióko ntō. ¿Nté kui kanatekū duʼxén ka ntú nto Mastrú san? —kaʼan ña.

5.36 Ña ni íde Jesuu kuénta é ntákaʼan ñáʼa san, ntá tsi kakaʼan ñá ni uva īʼxá san:
—Ñá ku uʼvī ntó; kuintiʼxe nto Xuva kō —kaʼan ña.

5.37 Ñá ni xēʼé Jesuu itsi é kɨ̄ʼví ñaʼa san ni ña; mii tsī Pedru ni Sántiau ní Juaan, ení Santiaú san.
5.38 Dā xee Jésuu ni ña nú viʼī ña nteé ntaʼa i xiʼi úkūn sán ne, dōo dito ntaéku ñaʼa san é ntaéku nteé ña diókō Jairu.
5.39 Kidáā ne, kúkɨ̄ʼví Jesuu má viʼi kān ne, kakaʼan ñá ni ñāʼa san:
—¿Nté kuān nte dúʼxen eku ntu ntō? Tsí iʼxá san ne, ñá te ni xīʼi, tsí kūdii kakídi —kaʼan ña.

5.40 Ntá tsi ñaʼa sán ne, da ntáxkuntée ña é kākaʼan Jésuu, tsí ini ña tsí e xíʼi kueʼen iʼxá san. Ntá tsi kíñuʼu Jesuu un ntɨɨ́ ntɨ̄ɨ́ ñaʼa san nu kíʼi kān. Da mii tsi dɨʼɨ īʼxá san ni uva i, nī ntuni ñáʼa ña ntɨniʼi ñā kúkɨ̄ʼví niʼi ñā mí tuví iʼxá san.
5.41 Dā karkáa Jesuu ntáʼa i ne, kakaʼan ñá ni ī:
—Talita, kumi (é kāni túʼun: Nākuntítsin, laʼ) —kaʼan ña.
5.42 Kidáā ne, nákuntītsí iʼxá san ne, nakaka, tsí é uxuvi kuíā i. Koó dā kúduʼva ñaʼa san.

7.18-23
7.18 Kakaʼan Jésuu ni ña:
—Ntōʼó ne, ¿ñā ntu ntátekú nto dɨ? ¿Ñá ini ntú nto tsí ña tuví nee iña é kaēʼxí ñaʼa é kakiʼxi nte kiʼi kan é kade i é kakudentū nima ña?
7.19 Tsí ña te nima ñá kakɨ́ʼvi, tsí mii tsi īni iʼxí ña kakɨ́ʼvi ne, dá kantīi kúñu ñā —kaʼan ña.
Dukuān ne, nee iña é ntaéʼxi ó ne, váʼā; ña te déntū.

7.20 Kakaʼan ñá dɨ:
—É kakēne nima ñáʼa sán ne, dɨvī é kade i é kakudentu ñā.
7.21 Tsí un tsi nté nima ñá kakene e ntádē kuení ña é kīni kaa, e ntáde ña é kini kaa ni ñadɨ̄ʼɨ ñáʼa san, e ntáde luku ña, e ntaéʼní ña ñaʼa,
7.22 e ntáde ña é kīni kaa, e ntaéni ntâʼví ña ñaʼa, e ntáde xení ña, e ntákuneʼu iní ña, e ntákaʼan ñá dovete, e dóo naʼnu ncho vií ña, e ntáde tuntu ña.
7.23 É un ntɨʼɨ̄ é kīni kaa sán ne, nima ñá kakene. Dukuān é ntákudentu ñā —kaʼan Jésuu.

9.2-8
Dā nádama kúñu Jēsuu
(Mt. 17:1-13; Lc. 9:28-36)
9.2 Dā ita ntíʼxin iñu ntúvi ne, Jesuú ne, kueʼen níʼi ñā Pedru, Sántiau ní Juaán san, kuéʼen ña ūun xuku mi dóo dūkun, mí xoxó ñaʼa. Ikān né, nādama kúñu Jēsuu núu ntuni ñáʼa, ñá ntɨniʼi ñā.
9.3 Īñɨ ntúʼu kāxiʼí nuu doo ña. Ntukuiʼxīn kueʼen, e nté uun ñaʼa ña kuvi nakáte ña vatā ó kuīʼxin.
9.4 Kidáā né, ntīi dîtó Elia ni Muísee, ña xiʼí nte kídaā, ne, ntatíin ña ni Jēsuu.
9.5 Kidáā ne, kakaʼán Pedrú san:
—Mastru, ¡ñá tē nté kaa váʼā o é ntoo ntɨ́ ni ntō iʼa! Xntāñɨ́ ntɨ uni viʼi xóʼo vē: uun iña nto, uun iña Muíseé, ni ūun iña Élia —kaʼan ña.

9.6 Dotō tsí kakaʼan ñá, tsi dóo uʼvī ñá, ntuni ña.
9.7 Kidáā ne, nákunūu taʼán ña vikó san ne, méʼñū vikó san véʼxi tatsín san é kākaʼan:
—Ña sāʼa é Iʼxá miī ko e dóo kakuinimá ko ña. Kīni nto é kāʼan ña —kaʼan tátsín san.

9.8 Ña ntɨniʼi Jēsuú san ne, ura í da xkókōto ña ne, ntoko ñuʼu mii ntuvi ñáʼa san. Da miī sá Jesuu ntítsi ña.

12.28-31
Tūʼun é dií ka kaʼnu
(Mt. 22:34-40)
12.28 Xée ūun mastrú leí ne, tēkú ña é kākaʼan Jésuu ni ñá saduceú san. Īní ña tsi dóo váʼā ó kakaʼan Jésuu é kanantiko koō ña. Tsixeʼē mastrú leí san dɨ:
—¿Neé ntu túʼūn e táʼxi Xuva kō é dií ka kaʼnu é kāda ntaa o? —kaʼan ñá, tsixeʼe ñā.

12.29 Nantíko kōó Jesuu, kakáʼan ña:
—É kuvi ūun sán ne: “Kiní nto, ña Israee: uun tsi Xuva kō e dóo kaʼnu ña.
12.30 Kuinima ntó Xuva ko kanɨɨ̄ nima ntó, kanɨɨ̄ é tduiña nto, kanɨɨ ūʼxen dɨkɨ nto. Nɨɨ̄ kuéʼen ini nto kunuu inī ntó ña.”
12.31 É kuvi ūví san ne: “Kuinima ntó taʼan nto vata tsī ó kakuinima ntó kúñu mii ntō.” Ña túvī ká xtuku é kadā kûʼve é vata kaa sáʼa —kaʼan Jésuu.

14.10-11 Dā diko Júdā san Jésuu
(Mt. 26:14-16; Lc. 22:3-6)
14.10 Uun ña ntɨniʼi Jēsuu, ñá nanī Júda Scārioté ne, kuéʼen ñā mí ntoo tóʼō dutú san ne, tíin ña ni ñā nté koo vií ña é diko ña Jēsuu.
14.11 Dā téku tóʼō dutú san é kākaʼan Júdā né, dōó diní ña. Xéʼe ñā xuʼu ña e ntáʼvi ña ña te kuvi vií ña. Júdā sán ne, ntukū nuu iní ña nté koo vií ña é diko ña Jēsuu.

14.44-46
14.44 Júdā sán ne, nté dīʼna tíin ña nī tóʼō dutú san:
—Xoó ñaʼa é kāʼxi ú xuʼu i ne, é dɨvi ñā. Tɨɨn nto ña, kunteka váʼa nto ña —kaʼan ña.

14.45 Dā xee Júdā sán ne, ura tsí i kuéʼen ñā mí ntitsí Jesuu, káʼan ñá ni ñā:
—¡Mastru! —kaʼan ña.
Ēʼxí ña xuʼu Jesuu.
14.46 Kidáā né, tɨ̄ɨn ñaʼa san Jésuu.

15.6-15
Kakaʼan ña é kūví Jesuu
(Mt. 27:15-31; Lc. 23:13-25; Jn. 18:38-19:16)
15.6 Kuia kuíā dá kaxee víko e nákaʼan ñāʼa san nté ō nakáku Xuva kō ña Israeé san ñuú Egítō né, vatā xkoó ini Pílatú san ne, kanantīi ñá uun ñaʼa ña ñuʼu kutū san, ntá tsi ñaʼa san ntaíkan ña xōo ñáʼa é ntio ña.
15.7 Tɨtɨ́n ñaʼa ñuʼu kutu ña viūtun san ntuvi tsikan, tsí naá ña ni ña tsiñu ī sán ne, ēʼní ña ñaʼa. Uun ñaʼa ñā né, Barabaa nani ña.
15.8 Ñá te da dīi ñaʼá san xee ña, ntákaʼan ñá ni Pīlatu té nantīi ña uun ñaʼa ña ñuʼu kutu viūtun san, vatā ó de ña kuia kuia dá kakuvi viko sāʼa.
15.9 Kakaʼan Pílatu ni ñaʼá san:
—¿Ntio ntu nto é nantiī ú Rei iña ñá Israeé san? —kaʼan ña.

15.10 Tsi kútuni Pílatu tsi tóʼō dutú san kuneʼu iní ña ni Jēsuu. Dukuān e ntáda ña ña kuenta ntáʼa ña.
15.11 Ntá tsi tóʼō dutú san ne, ntákaʼan ñá ni ñāʼa san é kāʼan ñá ni Pīlatu é na nantīi ña Barabaá san.

15.12 Kakaʼan xtúku Pilatu ni ñaʼá san:
—¿Nté ntu koo vií u ni ña sāʼá kuan, ña e xntánteē ntó Rei iña ñá Israee? —kaʼan ña, tsíxeʼe ñā.

15.13 Koó da vāntiñɨ ñáʼa san ntákaʼan ña:
—¡Naxnteē ntó ña ntiká krusi kan! —kaʼan ña.

15.14 Kakaʼan Pílatu ni ña:
—¿Nté kui san? ¿Neé ntu kuetsi idé ña sāʼa? —kaʼan ña, tsíxeʼe ñā.
Ntá tsi dā dií dií ka vāntiñɨ ñáʼa san ntákaʼan ña:
—¡Naxnteē ntó ña ntiká krusi kan! —kaʼan ña.

15.15 Pilatú san ne, ña ni ntío ña é kūdiin ñáʼa san ni ñá, ne, nantíi ña Barābaa. Kidáā ne, kakaʼan Pílatu ni sntadún san é na kāni ña Jesuu xóʼo ūme ne, dá ntāda ña ña kuenta ntáʼa sntadún san é na naxnteē ñá ña ntiká krusi.

15.33-39
Dā xiʼi Jésuu
(Mt. 27:45-56; Lc. 23:44-49; Jn. 19:28-30)
15.33 Dā káʼñu ntuvi ne, un tsi da nte kaeku uni kuáa ne, kūneé da kanɨɨ ñūxivi.
15.34 Ura tsíkan ne, un ntii tsī kéne Jesuu, kakáʼan ña:
—Eluii, Eluii, ¿lama sabatani? (é kāni túʼun: Xuvā kó, Xuvā ko, ¿nté kui xtuvī mii ntó ko?) —kaʼan ña.

15.35 Dā téku ña ntâñɨ étsin sán ne, ntákaʼan ña:
—Kini nto ña. Vata te kakana ña ña kaʼán naa Xuva ko, ñá nani Ēlia —kaʼan ña.

15.36 Uun ñaʼa ñā né, kaxkainu ña kueʼen ña, kuxnúu ntoʼo ña tɨʼntɨ dóo san iní ntute tɨntiʼo ía, dā xnuu ntído ña dɨkɨ útun, dā xeʼé ña é kōʼo Jesuu. Kakaʼan ña:
—Na koo mii nto ñā. Koto o ve te kīʼxi ntíʼxe Eliá san é nāntii nteé ña ña ntiká krusi kan —kaʼan ña.

15.37 Kidáā né, kāchuʼu ntáa Jesuu, ntíʼxi nuu kakan inī ñá ne, xíʼi ñā.
15.38 Ntáta ntāa dôxi é rkaa íko má ūkún kaʼnu san. Nte dɨ́kɨ i un tsi nte xeʼe i ntíi.
15.39 Uun tóʼō é uun sientu sntadún san ntitsí ña nuu Jésuu. Dā íni ña nté ō xiʼi Jésuú ne, kakaʼan ña:
—Nuu é ntāa ntíʼxe i é ña sāʼá ne, Iʼxá Xuva ko ñā —kaʼan ña.

15.42-46
Dā intúʼxi Jesuu
(Mt. 27:57-61; Lc. 23:50-56; Jn. 19:38-42)
15.42 Dā kuáa ntuvi vierné san, ntuvi é koo túʼve tsí utén ne, ntuvi iō dáʼna,
15.43 xée Jōsee, ña véʼxi ñuú Arimatea. Ña sāʼá ne, dōó ntaíko ñuʼu ñaʼa san ña, tsí ña tsiñu i ña. Kantétu ña ntūvi dá kada kúʼve Xuva kō. Naxnuu kaʼxi ñā nima ñá ne, kuéʼen ñā mí tuví Pilatu é ntākan ña kúñu Jēsuu.
15.44 Koó dā kúduʼva Pilatú san tsí e xiʼi Jésuu. Kāna ña tóʼō sntadún san, tsíxeʼe ña ña tē nuu é ntaā i é xiʼi Jésuu.

15.45 Kakaʼan tóʼō sntadún san tsí nuu é ntaā i.
Kidáā ne, xéʼe Pīlatu ítsi é na nākuníʼi Joseé san kúñu Jēsuu.
15.46 Joseé san ne, ñīi ña doo váʼa é nāxnuu taʼán ña Jesuu. Nántii ntēé ña ña ntiká krusi kán, dā náxnuu táʼan ña ña doó san, dā xtúvi ntuvē ñá ña iní ñañā mí ete nuu ña ini xuú san. Xnuu ntiʼu ñá xiʼi ñáñā san uun xuú kaʼnu.

16.1-7
Dā ntóto Jesuu
(Mt. 28:1-10; Lc. 24:1-12; Jn. 20:1-10)
16.1 Dā ntɨ́ʼɨ ntuvi dá iō dáʼna ne, Maria Madálena, María, dɨʼɨ Sāntiau lúʼntī sán, ni Salūmeé ne, ñīi ña choʼo e dóo váʼa ñeʼe é daʼvi ña ata dóo é nuu taʼan kúñu Jēsuu.
16.2 Tēvaá duʼva tsi da véʼxi tuví ntuvi domingú san ne, kuéʼen ñadɨ̄ʼɨ́ san nú ñaña Jēsuu.
16.3 Ntánatíin mii ñā:
—¿Xoó ntu kuvi naxtuvī xio i xuu kaʼnú san é kantīʼu núu xiʼi ñáñā san? —kaʼan ña.

16.4 Dā íto ña ne, ñá kantīʼú ka xuu kaʼnú san xiʼi ñáñā san.
16.5 Kɨ́ʼvi ña īní i kān né, īní ña tsí tuví uun ñatīí diñɨ kuaʼa ñañā san. Nuu ña doo kani, doo kuiʼxin. Ña dɨ̄ʼɨ́ san ne, dōo uʼví ña.
16.6 Kakaʼan ñátīí san ni ñā:
—Ñá ku uʼvī nto. Iní u tsí ntánantuku nto Jēsuu, ña ñuú Nazaree, ña é intée ntiká krusi kan. Xôxó ka ña íʼa. É ntōto ña. Koto nto mí inuu ntúʼxi ña.
16.7 Kueʼēn ntó, kukoto nto Pedrú, ni ña ntɨniʼi Jēsuu, tsí e díʼna ña kodo nuū ñá nuʼu ñá ñuú Galileá ne, ikan nakinī ntó ña, vatā ó kākaʼan ñá ni ntō —kaʼan ñátīí san.

16.15-16
16.15 Kakaʼan Jésuu ni ña:
—Kueʼēn ntó ve, kukaʼan nto túʼūn vaʼá san kuenta iñá ko ni ūn ntɨɨ́ ntɨ̄ɨ́ ñaʼa san dá kanɨɨ ñūxivi.
16.16 Xoó ñaʼa é kuintiʼxe ña ne kutsi ntute ña ne, nakākú Xúva ko ñā. Ntá tsi xoó ñaʼa, ña é ña kuintíʼxe i ne, ñá kada kaʼnū iní Xuva ko ni ña kuētsí ña.

16.19-20
Dá kūntáa Jesuu é dukún kān
(Lc. 24:50-53)
16.19 Kidáā né, dā kúvi kaʼan Tóʼo ko Jēsuu ni ña ntɨníʼi ñā ne, kúntāa ña e dukún kān, kunakutúvi ña diñɨ kuaʼa Xuva kō.
16.20 Ña ntɨniʼi ñā ne, kuéʼen ña, kūkaʼan ña túʼūn vaʼá san iña Jésuu dá kanɨɨ ñūxivi. Tōʼó ko Jēsuú ne, xntii ña ñā ne, xéʼe ñā é kūtuni ñáʼa san tsí nuu é ntaā i é ntákaʼan ñá, tsi xéʼe ñā é kūvi vií ña nuu i e dóo naʼnu san. Kuan tsī kaa é kāʼán u ni ntō.