Yiitju - Pintupi-Luritja
Here are some extracts from a Pintupi-Luritja translation of the Bible that talk about Jesus. The extracts are from the Gospel of Mark.

1.1 Tjaantutjananya tjakultjurinama
1 Ngaatjanya tjakulpa palya Yiitju Kirritjakuṉu. Palunya Katutjaku katja nyinin. Yirriṯi yara yalatji ngarangu.

1.14-15
Kuka yurraranytja piṉi Yiitjulu yaḻṯingu
14 Palunyangka maḻaya tjilirratjarra piṉiluya Tjaannga witira katirra tjiilangka nyinatjunu. Palunyangka maḻa Yiitjulu yankula paṉa Kaliliyiwana yaṉangu piṉitjananya nintirinama, Katutjakuṉu tjakulpa palya. Yalatjilutjananya nintirinama,
15 “Katutjalu kurraḻka watjara wantinytjangka yuḻṯa palunya ngamurringulpi. Kuwarri Katutjalutjananya palumpa walytja piṉi ngampuṯu kanyilku. Palunyangkaya kurra palyalpaṉilu wantirra, Kirritjakuṉu tjakulpa tjarrulyngarapaṉilu kulila!”

1.21-27
Wati mamutjarra
21 Tawunu Kapaniyamakutulpiya yanu. Tawunu palunyangka Yiitjunya yankula Tjuwuku tjaatjingka tjarrparra nintiṉutjananya, tjiṉṯu Tjarritiyingka.
22 Yiitjulutjananya punparrtjulu nintintjangkaya karrawurrirra nyinama. Punparrtjulutjananya nintilpayi, kutjupa piṉi pirinypa wiya, Mutjaku wangka nintilpayi piṉi pirinypa wiya. Punparrtjupaṉiluya nintilpayi.
23 Palunyangka Tjuwuku tjaatji palunyangka wati mamutjarra tjarrparra,
24 kankarralu Yiitjungkalu tjapiṉu yalatjilu, “Yiitju, Natjaritjanya ngurrara! Nyaakitjalampatjun ngalya yanu? Ngayunpalanyatjun mamu piṉi pungkula wiyalkitjan ngalya yanu, kuḻu? Nintiṉangku nyinin, nyuntu Katutjakuṉu maṯupurra.”
25 Yiitjulu mamu palunya watjaṉu, “Yarkarri! Wati palatja wantirra yarra!”
26 Mamu palunyalu wati palunya punkatjingara kurruntalu nyinanytjatjanu mamu palunya katu mirrarra pakara taputjunu.
27 Nyakulaya karrawurrirra wangkarra pungama yalatji, “Ngaatjanya wangka kutjupa, kuṉpu puḻkatjarra. Ngaalu kuṉpu puḻkatjarralu payira wantirriyalpayi. Palunyangka kulira taputjunkupayi.”

1.32-34
32 Palunyatjanu tjiṉṯu tjarrpanytjangka, pikatjarra piṉitjananyaya mamutjarra piṉilurrtju, ngalya katingu Yiitjukutulu, palunya ngurrara piṉilu. Ngalya katingutjananyaya Yiitjulu pampura palyantjaku.
33 Palunya ngurrara wamumpuya ngalya yankula waaḻa palunyangka kutjungkarringu.
34 Pikatjarra piṉitjananya pampura palyaṉu. Mamutjarra piṉitjanampa mamu payira wantirriyaṉu. Yiitjulu payira wantirriyalkitjalu mamu piṉi marrkulpayi, wangkarraya Yiitjunya Katutjakuṉu tjakultjunkutjakumarra. Mamu piṉiya ninti nyinama, Yiitjunya Katutjakuṉu nyinanytjatjanungka.

2.1-12
Wati pikatjarra tjiiḻarrinytja palyaṉu
1 Yiitjunya ngurra maṉkurrngaratjanu maḻaku yanu palumpa ngurrakutu, tawunu Kapaniyamakutu. Waaḻangka nyinarranytja nyakulaya kutjupa piṉingkatjananyaya tjakultjurinama, palunya ngurrara piṉilu.
2 Palunyangkaya piṉi puḻka ngalya yankula kutjungkarringu, waaḻa palunyangka. Waaḻa yaḻangkaya ngarala waṉirra yangatjunu. Yiitjulutjananya Katutjaku wangka nintinma.
3 Palunyangkaya ngalya katingu wati puupalalu, wati tjiiḻpa pikatjarra piitangka ngarrirranytja.
4 Waaḻa palunyangkaya puṯu tjarrparra tjukaltjarrangkaya tatira katalmarakaṯi yaḻara tjarrpatjunu. Kaninytjarrakutuya tjarrpatjunu, wati pikatjarra Yiitjukutuluya.
5 Yiitjulu kuliṉu, “Ngaa puupalaluya ngayunyaṉiya tjarrulyngarapaṉilu kulintjatjanulu, tjiiḻpa pikatjarra ngalya katingu.” Palunyangka Yiitjulu pikatjarrangkalu watjaṉu, “Kulyarri! Kuwarriṉangku kurra wirrupungku.”
6 Mutjaku wangka nintilpayi piṉiluya kuliṉu pinalu kutju, yalatjilu,
7 “Nyaaku wati palalu wiyawanalu watjaṉu? Katutjanya panypurangin. Yiitju palatja nguntinytju, wiya Katutjanya pirinytju kurra wirrupungkupayi. Katutjalu kutju yaṉangungka kurra wirrupungkupayi.”
8 Wangka panyapa pinalu kulintjatjanungka, Yiitjunya ninti nyinama. Yiitjulutjananya tjapiṉu yalatjilu, “Ngayuluṉa kurra wirrupungkunytjangka, nyaakunyurra kulira panypura ngarin?
9 Yaaltjinyurra kuliṉin? Tjinguruṉa watjalku pikatjarra ngarrirranytjakutu, kurra wirrupungkukitjalu? Tjinguruṉa watjalku pakara piita mantjira yankunytjaku? (Wangka ngaatjanya palyarringkula piita mantjintja, marrka. Pikatjarra ngarrinytjatjanulu palyarringkula mantjintjawiyangka, ngayuluṉa tjinguru wiyalyurrpa. Tjinguruṉa watjalku kurra wirrupungkukitjalu. Yalatjiṉa watjantjangka, puṯunyurra kulilku yalatjilu, ‘Tjinguru Yiitjulu kurra wirrupungu, tjinguru wiya. Pikatjarra palunya murraṉi pirinypa tiṯu ngarrin.’ Wangka palunya palyarringkula piita mantjintjaku, mularrpa marrka. Palyarrirra mantjintjawiyangka wiyalyurrpaṉinyurra kulilku.)
10 Ngayunyaṉa yaṉanguku katja mayutju kuṉpu puḻkatjarra nyininpa, kurraṉa wirrupungkupayi. Wangka marrkawana panyapa, palyarringkula piita mantjintja mularrarriku.” Panyapa watjaratjananya Yiitjulu pikatjarrangkalpilu watjaṉu,
11 “Watjaṉinpaṉanta. Pakala! Piita mantjira ngurrakutu yarra!”
12 Palunyangka pakaṉu piita mantjira ngurrakutu yankulanytja nyakulaya karrawurringu, yaṉangu piṉilu. Katutjanyaya maṉinypungkula watjaṉu, “Yalatjilu kuṉpu puḻkatjarralu pakaltjingantjala kuwarri kutju nyangu.”
4.35-41
Waḻpa yurukamu marrkuṉu
35 Tjiṉtu panyapangka mungarrtjirrirratjananya Yiitjulu watjaṉu walytja piṉingka, yalatjilu, “Yarralaka! paṉa kutjupakutu yurungka munkarra.”
36 Yiitjunya puutangka tiṯu nyinarranytjaya katingu, piṉi puḻkatjananyaya wantikatirra. Puuta kaḻkin kutjupa tjungu Yiitjuwanalu yanu.
37 Puutatjarraya Yiitjunya paṉkara yankulanytjangka ngururrpa waḻpalukamu kapilu wirrpitjilu pungama. Kapi yurulu puutangka tjarrparra nguwanpa tjarrpatjunu. Tjarrpatjunkunytjangka, yaṉangu piṉiya mirrirringamara.
38 Palunyangka Yiitjunya kunkunpa ngarrima puutangka maḻakaṯi, kaṯamalangka. Nguḻurrirraya yankula kanara watjaṉu, “Nintilpayi! Wapaḻpalampatjuran ngarrin? Kuliran pakalmara mirrirritjakumarrala.”
39 Kanarrirra pakara waḻpakamu marrkuṉu yalatjilu, “Yataṉarri!” Palunyangka waḻpa rungkalpaṉi wiyarringu, yataṉpa ngarama, yuru yurripaṉi wiyarringu.
40 Marrkuṉutjananya, “Nyaakumpanyurra nguḻu ngarinpa? Tjarrulyngarapaṉiluṉinyurra kulinmara!”
41 Kuṉpu puḻkatjarrakuya karrawurringu. Yalatjiya watjara waṉingu, “Ngaatjanya kutjupa. Ngaalulka kuṉpu puḻkatjarralu waḻpakamu yuru marrkura yataṉmankupayi.”
5.22-24
22 Palunyangka wati Tjaratjanya ngalya pitjala Yiitjungkalu tjantarrngaratingu, Tjuwuku tjaatjiku mayutju.
23 Tjantarrngarala tjapiṉu yalatjilu, “Yuṉṯalpa tjukutjuku ngayukupilku mirrirrikitja ngarrin, pika puḻkatjarra. Pampura palyantjaku ngayuku ngurrakutu ngalya yarra! kana tiṯu nyinanytjaku.”
24 Tjungupula yanama. Tjaratjaku ngurrakutu yankulanytja Yiitjunyaya yaṉangu piṉi puḻkalu yutjura katiyanama.

5.35-42
35 Minyma palunyangkalu Yiitjunya wangkarranytjangka Tjaratjaku waaḻatjanu wikarrutja maṉkurrpa ngalya yankula Tjaratjangkaluya tjakultjunu yalatjilu, “Kuwarrin yuḻṯurringu. Wiyan nintilpayinya yaḻṯirra ngalya katinytjaku, nyuntupa waaḻakutu.”
36 Tjakulpa palunya kulira Yiitjulu Tjaratjangkalu watjaṉu, “Nguḻurrinytjawiya! Nyuntuluṉin tiṯu tjarrulyngarapaṉilu kulintjaku!”
37 Palunyangka Yiitjulu palumpa walytja piṉitjananya marrkulkatingu, maṉkurrpa kutju watjaṉu, tjungu yankunytjaku Tjaratjaku ngurrakutu. Maṉkurrpa panyapa Piitanya, Tjayimitjanya, Tjaannga. Tjayimitjanyakamu Tjaannga palunya kuṯararrapula nyinama.
38 Tjaratjaku ngurrakutuya yankula nyangutjananyaya, yaṉangu piṉilu kankarralu mirrarra yularra waṉirranytja.
39 Waaḻangka tjarrparra Yiitjulutjananya watjaṉu, “Yulanytjawiyarri! mirriwiya, kutunpa kutju ngarrin.”
40 Kuliraya yikarringu, mirri mularrpa kulintjatjanu. Yiitjulutjananya witura wantirriyaṉu tjapirrpa nyinanytjaku. Kungka palunyaku mama ngunytjukamupulanya Yiitjulu yaḻṯirra tjarrpatjunu, palumpa walytja maṉkurrpalurrtju.
41 Tjunguya ngarala Yiitjulu kungka mirri palunya mara witira watjaṉu, “Talitja kumi!” Wangka walytja watjaṉu, yalatjilu, “Kungka! Watjaṉinpaṉanta, pakala!”
42 Palunyangka pakara parra pitjangu. Parra pitjalanytjaya nyakula puḻkara karrawurringu. Kungka palunya yukarra nyinama.

7.18-23
18-19 Yiitjulutjananya ngaparrkulu tjapira payiṉu yalatjilu, “Tiṯunyurra ngurrpa kuḻu nyinin? Puṯunyurra kuliṉin? Yalatjinyurra tjukarurru kulintjaku. Mayi paṉkara tjaawana yurrkuyankula mukalakutu yankula ngarrirra yuṉarripayi. Pina wiya kuyaṉin mayilukamu kukalu. Mayikamu kuka mungutja.” Yiitjulu wangka palunya watjara yalatji watjaṉu, mayi kuka wamumpu palyala ngalkunytjaku.
20 Yiitjulutjananya palumpa walytja piṉingka puru watjaṉu yalatjilu, “Yaṉangulu pinalu kulira kurra palyantjatjanu kuyakuya nyininpa, mayi paṉkara ngalkunytjatjanu, wiya.
21 Pinalu kulira kurra palyantjatjanu yaṉangu kuyakuya nyinin. Pina wiyawanalu kulintjatjanu yaṉangu kuyakuya nyinin. Pinalu kulira kurri walytjapaṉingka ngarrinytjatjanu kuyakuya nyinin. Pinalu kulira yulytja kiḻilu mantjintjatjanu kuyakuya nyinin. Pinalu kulira yaṉangu kutjupa mirri pungkunytjatjanu kuyakuya nyinin.
22 Pinalu kulira kutjupaku yulytja paṉkaraku mikurrirra nyinanytjatjanu kuyakuya nyinin. Pinalu kulira kurra palyantjatjanu yaṉangu kuyakuya nyinin. Pinalu kulira yaṉangu kutjupa nguntilyinkunytjatjanu kuyakuya nyininpa. Pinalu kulira papa pirinytju kurra palyantjatjanu kuyakuya nyininpa. Pinalu kulira kutjupaku rarrurrinytjatjanu kuyakuya nyininpa. Pinalu kulira kutjupaku mingarrtjulu watjantjatjanu kuyakuya nyininpa. Pinalu kulira walytjalungku mirra waṉinytjatjanu kuyakuya nyinin. Pinalu kulira Katutjanya wantirra mungutjakukantjalu kulintjatjanu kuyakuya nyinin.
23 Kurra palunya pirinypa pinalu kulira palyantjatjanu yaṉangu kuyakuya nyinin. Mayikamu kuka wiya ngalkunytjatjanu, kuyakuya nyinin, mungutja.” Yalatji Yiitjulutjananya watjaṉu.
9.2-8
Yiitjunya yaṉangu kutjupa pirinyarringu
2 Palunyatjanu tjiṉtu tjikitjipala nyinarra Yiitjulutjananya yaḻṯirra katingu watiwiyakutu, puḻingka katu nyinatjunkukitjalu, Piitanya Tjayimitjanya Tjaannga. Puḻingkaya tatira palunya piṉiluya Yiitjunya nyakulanytjangka, Yiitjunya yaṉangu kutjupa pirinyarringu.
3 Palumpara mantarra tjulkararringu. Yaṉangulu wiya paltjira yalatji mantarra tjulkurankupayi.
4 Yiitjungkalupula tjamu Mutjanyakamu tjamu Yilayitjanya yutirringu, kurraḻkapula nyinarra mirrirrinytja. Palunya kutjarralupula Yiitjungka wangkarranytja.
5 Piitalupulanya nyakula Yiitjungkalu watjaṉu, “Mayutju! Palyalanyatjun ngaakutu ngalya katingu. Nyuntu mikurrinytjangka puritjunkulatjunyurrampa puri maṉkurrpa? Kutju nyuntupanta, kutjupara Mutjaku, kutjupara Yilayitjaku?”
6 Yalatji puritjunkukitjalu wiyawana watjaṉu, nguḻurrirra. Wamumpuya nguḻu puḻkarringu, Mutjanyakamu Yilayitjanya yutirrinytja nyakunytjatjanu.
7 Palunyangka yutuwarilutjananya tjuṯuṉu. Katutjalu yutuwaringurulu watjaṉu, “Ngaatjanya katja ngayuku yunytjuṉara nyinanyi. Rawalulunyurra palumpa wangka kuliranytjaku.”
8 Parra pinkulutirraya nyangu Yiitjunya kutju ngaralanytja.

12.28-31
“Luwu palunya puḻkanya yaaltji?”
28 Yiitjulutjananya ngaparrpungkula watjaranytja wati kutjupalu kulinma, Mutjaku wangka nintilpayilu. Yiitjuku wangkaku pukuḻarrirra Yiitjungkalpilu tjapiṉu, “Mutjalulampa luwu piṉi watjaṉu. Luwu kutju tjinguru puḻkanya ngarin? Ka kutjupa piṉi luwu ngatalpa. Luwu palunya puḻkanya yaaltji?”
29 Yiitjulu watjaṉu, “Luwu puḻkanya yalatji ‘Yitjurilaku tjamupiṯilu kapaḻipiṯiluya kulila! Mayutjunyurrampa Katutjanya kutju nyinin, piṉiwiya.
30 Mayutju puḻka palunyakunyurra puḻkara yunytju nyinanytjaku, nguntilyinkunytjawiya. Pinalu yurrukulira yunytjuranyurra tiṯu tjukarurru nyinarranytjaku.’
31 Palunya pirinypa luwu puḻkanya kutjupa ngarin yalatji, ‘Walytja ngamutjaku mikurrirra nyinanytja pirinypa, walytja kutjupa piṉikunyurra mikurrirra nyinanytjaku.’ Luwu palunya kutjarra puḻkanya kutjarra. Luwu kutjupa piṉi ngatalpa ngarin.”

14.10-11
10 Tjuutatjanya Yitjikarriyatanya ngurrarra Yiitjuku walytja tuwalpala nyinapayi. Tjuutatja palunyalutjananya tuḻkuku mayutju puḻka piṉingka yankula Yiitjunya tjaalytju watjaṉu, kutjupa piṉiluya ngula yankula witira pungkunytjaku.
11 Ngalya yankula tjaalytju watjantjangka, pukuḻarrirraya manira ngula yungkukitjalu tjamaṯatjunu, tuḻkuku mayutju puḻka piṉilu. Palunyangka mani ngula mantjilkitjalu Tjuutatjalu tiṯu kulirinama yalatjilu, “Yaṉangu piṉi puḻkaluya Yiitjunya wantirra yankunytjangka, palumpa walytja maṉkurrpa kutju nyinanytjangka, ngayuluṉatjananya yankula yaḻṯikatiku, ngalya yankulaya Yiitjunya witintjaku.”
14.44-46
44 Pikaṯi piṉingkatjananya Tjuutatjalu yurruntu yalatjilu watjaṉu, nintilkitjalu, “Palunyaṉalu ngulytju pirinytju nyunytjulku. Palunyangkaya witira wituṯu kati!”
45 Tjuutatjanya Yiitjukutulu ngalya yankula wangkangu, “Mayutju!” Wangkarra nyunytjunu. Murraṉiluya Tjuwu tjuṯalu mularrwiyalu nyunytjulpayi tjungurrirra.
46 Palunyangkaya witiṉu pikaṯi piṉilu.

15.6-15
Yiitjunyaya mirritjunu
6 Tuḻku Patjuwupanya purinyinangka ngaranytjangka Payilatalutjanampa murraṉilu puritjina kutju walatjunkula wantirriyalpayi, yaṉangu piṉiluya mikurrirra tjapintjangka.
7 Palunyangka wati kutju Parapatjanya tjiilangka nyinama. Parapatja paṉkaraluya kurraḻka kamanta ngurrara piṉiku pikarringkula pungama. Palunyangka Parapatjalu wati kutju mirri pungu.
8 Yaṉangu piṉiluya Payilataku waaḻakutu yankula Payilatangkaluya tjapiṉu, tjiila ngurrara murraṉilu pirinypa pakaltjingantjaku.
9 Payilatalutjananya ngaparrpungkula tjapiṉu, “Puritjina nganakunyurra mikurrin? Tjinguru Tjuwu piṉiku mayutju puḻkaku?”
10 Wangka panyapatjananya tjapiṉu, Payilatalu, Yiitjunya walatjunkukitjalu, pinalu yalatjilu kulintjatjanulu “Yitjukuraya lirri piḻṯirrirra ngalya katirraṉiya ngaratjunu.”
11 Payilatalutjananya yaṉangu piṉingka Yiitjunya walatjunkukitjalu tjapintjangka, maḻa panyapa piṉilutjananyaya parra yankula muunpungkulinama, tuḻkuku mayutju puḻka piṉi paṉkaralu. Muunpungkulinamatjananyaya yaṉangu piṉilu yalatjilu Payilatangka watjantjaku, “Parapatjanya walatjurra!” Payilatangkaluya tjakultjunu Parapatjanya walatjunkunytjaku.
12 Payilatalutjananya puru tjapiṉu “Wati kutjupakuṉa nyaa palyalku? Wati palunyanyurra watjara waṉipayi, ‘Tjuwu piṉiku mayutju puḻkakunyu.”
13 Kankarraluya watjaṉu, “Ngaṉangka waralytjunkula mirrirriṉṯankunytjaku.”
14 Payilatalutjananya puru tjapiṉu, “Palunyanya mungutja. Kurra nyaa palyantjatjanungkaṉa waralytjunku?” Tiṯuya kankarralu watjaṉu, “Ngaṉangka waralytjunkula mirriṉṯankunytjaku.”
15 Palunyangkatjanampa Payilatalu Parapatjanya pakaltjingaṉu, yaṉangu piṉi pukuḻmankukitjalu. Watjaṉutjananya tjilirratjarra piṉingka Yiitjunya wiipa pirinytjarralu pungkunytjaku. Pungkunytjatjanungka Payilatalutjananya tjilirratjarra kutjupa piṉiku Yiitjunya yungu, katirraya ngaṉangka waralytjunkula mirriṉṯankunytjaku.
15.33-39
Yiitjunya mirrirringu
33 Tjiṉṯu panyapangka karrpungka yaḻa tjiwarriwarringka mungarringu. Munga ngarala ngarala mungarrtji kutjulpi tjiṉṯurringu.
34 Mungarrtji Yiitjulu waralyngaralanytjalu kankarralu tjapiṉu, “Yiluyi yiluyi lama tjapakatjani.” Tjaa walytjalu tjapiṉu yalatjilu, “Katutja! Katutja! Nyaatjanuluṉin wantitingu?”
35 Ngamu ngaralanytjaluya kulyu kulira watjaṉu yalatjikukantjalu, “Kulilaya! Tjamu Yilayitjakura yaḻṯingu.”
36 Kutjupalu wirrtjara pulakina yuṉanytjingka minatjunkula katirra pilypa tawarrangka tinkira yititjunu, pilypa minatjarrangka. Yalatjilu yititjunkulanytjalutjananya watjaṉu, “Wanyuya nyangama! tjamu Yilayitjanya ngalya pitjanytjaku. Tjinguru Yilayitjalu ngalya pitjala palatja yurulypungkula walatjunku.”
37 Palunyangka Yiitjulu kankarralu mirrarra mirrirringu.
38 Palunyangka mantarra puḻka Tjuwuku tjaatji puḻkangka waralyngaralanytja wingaṉyanu, kankarratjanu kaninytjarrakutu.
39 Yiitjukutu ma ngarala mirrirrinytja nyakula, tjilirratjarra piṉiku mayutjulu watjaṉu, “Mularrpa, wati palatja Katutjaku katja waralyngarinpa.”

15.42-46
Mirri ngarritjunu piṉkingka
42 Tjiṉṯu Puratiyi ngarala ma mungarrtjirringu. Tjarritiyi kuwarripa ngarangu. Tjarritiyingka Tjuwu piṉiya waarrkapaṉi wapaḻpa nyinapayi.
43 Puratiyi palunyangka mungarrtjirrirra wati palyalu yini Tjutjupalu raparringkula mayutju Payilatakutu yankulalu tjapiṉu, Yiitjunya mirri yurulypungkula katirra tuuntjunkukitjalu. Tjutjupa palunya tawunu Yaramatjiyanya ngurrara nyinama. Wati palunya Tjuwuku mayutju piṉiya murraṉi kutjungkarripayi tawunu Tjarutjalumangka. Tjutjupa palunya tjukarurru nyinanytjatjanu Katutjaku walytja piṉingka nyinakitja mikurripayi, Katutjalu ngampuṯu kanyintja piṉingka.
44 Tjutjupalu Payilatangka mirriku tjapintjangka, mayutju Payilatalu puṯu kuliṉu, Yiitjunya kanakukantjalu kuliranytjatjanulu. Tjilirratjarra piṉiku mayutju yaḻṯirra tjapiṉu payilatalu, “Yiitjunya tjinguru kana? Tjinguru mirri waralyngarinpa?”
45 Mirri kulintjatjanulu Payilatalu watjaṉu Tjutjupangkalu yurulypungkula tuuntjunkunytjaku.
46 Mantarra pulangkita pirinypa katirra Tjutjupalu mirri palunya yurulypungkula mantarra panyapangka karrpiṉu. Karrpira katirra ngarritjunu piṉkingka, puḻingka tjawara wantinytjatjanungka. Piṉki palunyangka Yiitjunya ngarritjunkula puḻi puḻka kutikutiwaṉirra tjaa patiṉu.

16.1-7
Yiitjunya mirritjanu pakalkatingu
1 Tjarritiyi palunyangka, tjiṉṯu tjarrpanytjangka maḻaya yankula nyiṯi paṉṯi palya payimilaṉu, yungunpa yankula Yiitju mirringka murraṉilu pirinypa tjutilkitjalu, Miiri Makatalanya ngurraralu, kungka Tjalumalu, Miiri kutjupalu Tjayimitjaku ngunytjulu.
2 Tjuuntiyi yungunpa tjiṉṯu pakantjangkaya piṉki palunyakutu yanama.
3 Ngururrpa yankulinkulanytjalungkuya tjapiṉu yalatjilu, “Nyaalulampa puḻi kutikutiwaṉirra piṉki yaḻalku?”
4 Tiwanguruluya purinytjura nyakula nyangulpi, puḻi palunya waḻinyku puḻkanya kutikutiwaṉirra wantinytja piṉki yaḻa ngaranytja.
5 Piṉkingkaya tjarrparra kulyarri mantarra tjulkuratjarra nyangu, kaninytjarra nyinarranytja. Nyakulaya nguḻunguḻurringkula ngarama.
6 Palunyangka kulyarrilutjananya watjaṉu yalatjilu, “Nguḻuwiyaya ngarama! Ngurriṉinparanyurra Yiitjuku, Natjaritjanya ngurraraku, waralyngarala mirrirrinytjatjanuku. Palunya kanarrirra pakalkatingu. Ngaawana ngarritjunkunytjatjanungkaya nyawa! Wiyalpi ngarrin.”
7 Kulyarrilutjananya puru watjaṉu, “Paṉa Kaliliyikutu pakalkatirra ma yaninpa, kurranyunyurrampa. Ngurra palunyangkanyurra yankula nyaku. Paṉa palunyangkanyurranya nyakunytjaku Yiitjulunyurranya kurraḻka watjaṉu. Yara palunyanyurra yankula tjakultjurratjananyaya! palumpa walytja tjuṯangka, Piitangkalurrtju.”

16.15-16
15 Watjaṉutjananya yalatjilu, “Yankulanyurra paṉa piṉiwanalu yaḻa tjiwarriwarriwanalutjananyaya ngayukuṉu tjakulpa tjakultjurinama! yaṉangu piṉiwanalu.
16 Yaṉangulu tjakulpa palunya tjarrulyngarapaṉilu kulira papatatji mantjintjangka, Katutjalu wankalku. Tjarulyngarala wantinytjatjanungka Katutjalu mirritjunku.

16.19-20
Ngaṉkakutu kaḻpangu
19 Palunyatjanu mayutju Yiitjunyatjananya wangkarra ngaṉkakutu kaḻpakatirra Katutjangka tjungu nyinanyi. Katutjalu palunya ngaṉkakutu katingu.
20 Palunyangkaya palumpa walytja piṉilu yaḻa tjiwarriwarriwanalu Kirritjakuṉu tjakulpa tjakultjurinama. Yalatjiya tjakultjurinkulanytjangka, mayutju Kirritjalutjanampa yatjikilu kutjupa kutjupa palyarinama yarkalu. Yaṉangu piṉiluya yatjikilu palyantja nyakula kuliṉu, “Mularrpa ngaatjanya wangka Katutjakuṉu.” Yalatji ngaranytjaku.)