Yesu - Mündü
Here are some extracts from a Mündü translation of the Bible that talk about Jesus. The extracts are from the Gospel of Mark.

1.1
Dene züka tofo ngü ka Me teka Yesu *Kurisito, te di de Ye Me.

1.14-15
14 Fütanga ngü la, fü ewü azoro Yüwane, anü di agü agbü ku. Te Yesu je ngü la, fü ah ayia ace sü la, adu ka-ye agbü *Galïlaya. Fü ah angbü endoro da emala ngari Me fü wü kpara kpala, 15 gü ba dene, “Mere sïkpï koro eyi gbamari. Miri te Me tima teka aküwa wü ne, koro eyi. Te di bala, wü ce *siti ngü ka-wü, de wü le to ngü ka Me de maguma wü biringbö.”

1.21-27
Dene ngü ka Yesu de wü siti wü di enga me
Luka 4:31-37
21 Gbü gara ra, fü wü Yesu ayia anü akoro agbü Kaparanama. Fü *sïkpï ka Me amaka ewü kpala. Fü ewü ayia anü arï kpa *esambü ka biti-te. Fü Yesu akpo da erï wü kpara kpala. 22 Fü rïrï kaka-na la ayia aga gbü jia wü kpara la afa sü. Wüh gü ba, “Rïrï ka komoko ne ka-ye kpikpi ye. Angü ah ngbü emala mere kpeke ngü, baka kpara te Me tima engu me-ye. Wü kpara ka-ani, te ewü ngbü erï ani de sene ne, wüh rï ani bala nda-wü de.”

23 Gara komoko ta ladü kpa esambü ka biti-te la, de *siti wü di enga me guvu ye. Fü komoko la ayia akpo da eba rere kpa tikpi, gü ba, 24 “Yesu deyï, tima ka-ani gbü ngü ka-ye nda ma. Ye koro sene teka ne? Teka amörö ani asidi? Ani wu ye kpo. Ye de züka kpara te Me tima ye me-ye füh kotö ne.” 25 Fü Yesu ayia amala ngü fü siti wü di enga me la, gü ba dene, “Yi nga anga, de yi koro guvu komoko la asidi!” 26 Fü siti wü di enga me la ayia agbürü komoko la, agbo kötö, da eba rere. Fü ewü ayia ace komoko la, akpe, atafa ka-wü.

27 Dela ngü ta te Yesu mere, te engu liki siti wü di enga me di, guvu gara komoko asidi. Fü ngü la aga gbü jia wü kpara ʼburu, baka mere ngü cucu. Fü ewü akpo da eyi-ta tete-wü, gü ba dene, “Apa! De bane ne ngü ne? Amba rïrï ka Yesu ne, ah ka-ye de kpeke rïrï fanü fanü. Angü ah ngbü eto rïrï fü siti wü di enga me, fü ewü angbü eje ngü kaka!”

1.32-34
32 Etamurago la, te ra tï tete na, fü mere bi wü kpara ayia aza wü mürü keke ka-wü, bete wü kpara te *siti wü di enga me ngbü emere ewü ne, akoro de ewü kpaka Yesu. 33 Fü wü kpara gbü sü la aci abiti te-wü gbe gbe gbe kpa emöngïtï ka kambü te Yesu di gbügbü na. 34 Fü Yesu ayia aküwa mere bi wü kpara de wü keke eküte wü la ʼburu. Fü ah aliki *siti wü di enga me guvu gara ewü asidi. Fü siti wü di enga me la angbü eku gba. Fü Yesu ayia atïrï ewü. Kükürü de, angü wüh wu ta eyi, gü ba, Yesu ka-ye de kpara te Me tima engu me-ye füh kotö ne.

2.1-12
Dene ngü te Yesu küwa gara komoko te küküte kpi akpi ʼburu
Matayo 9:1-8, Luka 5:17-26
1 Gbü gara sïkpï, fü wü Yesu ayia adu kpa ekötï, agbü Kaparanama. Te wü kpara je nganga na, gü ba, Yesu du koro eyi kpa ekötï ne, 2 fü mere bi wü kpara aci akoro abiti te-wü gbe, kpa esambü te Yesu ngbü gbügbü na ne. Fü sü ani kpa esambü ʼburu yere. Fü gara wü kpara angbü nda-wü kpa etanü, ede möngïtï. Fü Yesu angbü emala to ngari Me fü ewü.

3 Baka te Yesu ngbü la emala to ngari Me fü wü kpara la, fü ewü ayia akoro de gara komoko, te küküte kpi akpi ʼburu. Wü kpara te ewü bï engu, wüh baka wü kpara bala. Fü ewü abï engu füh kaʼda, de ani koro di kpaka Yesu, de ah küwa engu. 4 Te wüh koro kpala, fü ewü amaka mere bi wü kpara, te ewü ni sü emöngïtï ʼburu yere. Da ewü, te ewü ena arï kpa esambü de mürü keke la, akoro di kpaka Yesu ne, nda ma. Te di bala, fü ewü ayia afï nga gara mani. Fü ewü ayia alï kpa tikpi, enzö kambü, afuru nzö kambü la mbiii te sü, te Yesu ngbü ero mö tete na ne. Fü ewü ai ku te kaʼda ka mürü keke la, abï engu di, ato te görö te ewü furu la ferrre, ao kötö engagira Yesu.

5 Te Yesu wu ngü la bala, fü ah awu, gü ba, wü kpara la to maguma wü eyi fü ni fanü fanü. Fü ngü la areke gbü jijia na afa sü. Fü ah ayia amala ngü fü mürü keke la, gü ba dene, “Enga ra, *siti ngü ka-mü ta te mü mere gbü jia Me ne, ma za gbü nzö mü eyi asidi.”

6 Gara wü *mürü rïrï ta kpah ladü kpala. Te wüh je ngü te Yesu mala fü komoko la bala, fü ewü angbü efï nga ngü emaguma wü, 7 gü ba dene, “Dene ne töndö ngü ne? Yesu yia efü te-ye ba Me? Angü kpara füh kotö ne, te tï aza siti ngü gbü nzö wü kpara, ah ngbürü ladü? Ah nda ma! ʼDuwa Me te ngbü eza siti ngü ka wü kpara me-ye.”

8 Amba Yesu wu fïngangü ka-ewü la eyi. Fü ah ayia ayi-ta ewü, gü ba dene, “Yi ngbü efï nga ngü la emaguma yi bala, neh teka ne? 9-10 Yi wu de, gü ba, ma de *Ye Kpara ka Kpï? Te di bala, wazi ra ladü, teka adi eza siti ngü ka wü kpara füh kotö ne, gbü nzö ewü di asidi. Yi fï nda-yi, gü ba, ma mala töndö ngü kükürü? Yi ena awu ngü la enatikine.” Fü Yesu adu afü te-ye, amala ngü fü mürü keke la, gü ba dene, 11 “De-ye deyï, ye yia eyia, ye za darara ka-ye, ye go kpa ekötï.” 12 Fü mürü keke la ayia ʼduwa cukuru, gbü jia wü kpara ʼburu, arü atikpi. Fü ah aza darara ka-ye, ayia ago di agba ye.

Dela ngü ta te Yesu mere, te engu küwa komoko, te küküte na kpi akpi ne. Fü ngü la aga gbü jia wü kpara la afa ʼduwa sü. Fü ewü aci ʼburu, agbo nga ïrï Me, gü ba, “Ani wu ngü de bala gügü la de!”

4.35-41
Dene ngü te Yesu tata mere wege di
Matayo 8:23-27, Luka 8:22-25
35 Gbü ra la, etamurago, fü Yesu ayia amala ngü fü wü kpara ka-ye, gü ba dene, “Ani nü enü kpa etangu.” 36 Fü wü *kpara ka Yesu ayia alï gbü *zabu, te engu di gbügbü na. Fü ewü anü sü ka-wü, yo! ace mere bi wü kpara la kpa füh gümba kpala. Wü gara zabu ngbü ta kpah enü kpala. 37 Wüh te ekoro kpa etü mere ngu *Galïlaya la, fü mere wege ayia akpo angbü efe jia ngu la de wazi. Fü zabu angbü eyiki, da efüfü te-ye, ekolo ngu gbü ye. Fü ngu angbü esi gbü zabu la. Zabu la yia ta ebu ewü abu agbü ngu.

38 Yesu, mü ngbü ka-mü gbü zabu to kpa sidi kpala, era ka-mü ara, o nzö mü ga füh bongo. Fü wü kpara kaka akoro azükü engu, gü ba dene, “Mere kpara! Mere kpara! Ani te ekpi! Ani te ekpi! Te ani kpi la, ngü ena asiti te-ye de?” 39 Fü Yesu ayia azükü. Fü ah adu arü amala ngü fü wege, gü ba, “Wege, mü nga enga! Ngu, mü ngbü ziii.” Fü wege ayia anga. Fü ngu ayia angbü ziii. Fü sü ayia anga ʼduwa ngbiii.

40 Fü Yesu adu arü amala ngü fü wü kpara ka-ye, gü ba dene, “Yi ekpe neh cürü ne? Yi to maguma yi fere mbi mbi la de? Ah le de yi to maguma yi fere.” 41 Fü cürü arï te ewü afa sü, teka ngü ka wazi ka Yesu la. Fü ewü angbü da eyi-ta tete-wü, gü ba dene, “Apa! De bane neh ene ngü ne? Kpara ladü füh kotö ne, te tï amala ngü fü wege bete mere ngu, fü ewü aje rïrï kaka-na baka e la?”

Dela ngü ta te Yesu mere, te engu to rïrï fü mere wege tete.

5.22-24
22 Gara komoko ta ladü kpala de ïrï ye Yayïrü. Engu ta de mere kpara te ngbü emere tima kpa *esambü ka biti-te. Te Yayïrü wu Yesu tete, fü engu ayia akoro, atï eri lö Yesu, 23 andaʼba te-ye fefe, gü ba dene, “Mere kpara deyï, ye koro, ye küwa ye ni, mba jaji würüse, angü keke ngbü emere engu efa sü. Ah yia eyi ekpi akpi. Ye koro la, de ye o kpa ye eküküte na, de ah küwa.” 24 Te Yesu je ngü la, fü ewü ayia anü de wü Yayïrü. Fü mere bi wü kpara aci anü kpah gbü nga ewü, enzinzi te-wü, da ededere Yesu.

5.35-42
35 Baka te Yesu ngbü emala ngü fü würüse la, fü wü kpara gba Yayïrü, te mbarase kaka ngbü eke ake ne, akpe akoro. Fü ewü amala ngü fü Yayïrü, gü ba dene, “Yayïrü deyï, ah nza eyi. Ye mere e ambü mere kpara la tïne de, angü mbarase ka-ye ne kpi eyi.” 36 Amba Yesu, mü le ngü ka-ewü la nda-mü de. Fü mü adu amala ngü fü Yayïrü, gü ba dene, “Yayïrü deyï, ye kpe cürü de. Ye to maguma ye fü ni.”

37 Fü wü Yesu ayia de wü Petero, *Yakobo bete *Yüwane, anü kpa gba Yayïrü. Fü ewü ace mere bi wü kpara la sidi nga wü, angü Yesu le de bi wü kpara la nü fa nga ni kpala tïne de. 38 Te wüh nü koro agba Yayïrü, fü ewü amaka mere bi wü kpara kpala, da eku mere siti gba, de wü yiyi. Dela gba nda tïne de! 39 Fü Yesu adu arü amala ngü fü wü kpara la, gü ba dene, “Wü ngbü eku gba neh teka ne? Mbarase la kpi akpi nda de. Ah ngbü era ka-ye ara.” 40 Fü ewü aci ʼburu angbü emü engu, gü ba, “Dene ne töndö ngü ne?” Fü Yesu ayia aliki ewü ʼburu etanü, aza ʼduwa wö ye mbarase, ake ni ye na, bete wü Petero de wü bu ye, te ewü koro de ewü ne. Fü ewü ayia arï te sü, te wüh o kö mbarase la tete. 41 Te wüh koro kpa esambü la, fü ewü ayia awu kö mbarase. Fü Yesu ato kpa ye, azoro kpa mbarase di, aï mbarase la, amala ngü fefe gbü ngü mündü ka-wü, gü ba, “Talïta gumi!” Ah ba e te ewü gü ba dene, “Jaji würüse deyï, ye yia eyia tikpi.” 42-43 Fü jaji würüse la azükü, ayia cukuru atikpi da endoro. Angü mbarase la, re kaka-na koro eyi nzükpa de füh ye ʼbasu. Fü Yesu amala ngü fü ewü, gü ba dene, “Wü mere e amala nga ngü la fü wü bu wü fa fa fa de.” Fü ah adu amala ngü fü wü wö ye mbarase la, ake ni ye na, gü ba, “Wü mere kümü, wü to fü mbarase la.”

Dela ngü ta te Yesu küwa ye Yayïrü di. Fü ngü la aga gbü jia wü kpara afa sü.

7.18-23
18 Yesu gü ba dene, “Yi kpah bala? Yi je si-ngü la nda-yi kpah de? Zü-e te mü ezü, ah ena asiti mü gbü jia Me, neh baye baye? 19 Angü zü-e nü kpa emaguma mü nda de. Ah enü ka-ye kpa gbü nza mü, anü sü ka-ye agbü gü.” Ngü te Yesu mala la, ah baka e te engu gü ba, zü-e te kpara ezü, ah ʼburu mbi gbü jia Me. 20 Fü Yesu agü ba, “Ngü te ena asiti mü gbü jia Me, ah de siti ngü, te mü ngbü efï emaguma mü. 21-22 Angü te kpara ngbü de siti fïngangü emaguma ye la, wü ngü te engu ena angbü emere ne, ah ena adi kpah ʼburu de siti wü ngü. Ah ena amere yala, ah ena afiti wara kiri ye, ah ena amere waza. Gara ena ati ngü guvu ye, asoko kpara, amörö kpara. Gara ena akpi gümü e, amere zü, azi e ka kiri ye. Gara ena acu ngü ye, afiti kiri ye de mani, emere wü gara töndö ngü, te Me le de. 23 Wü kpara ʼburu ngbü emere wü ngü de bala, ah teka siti ngü te di emaguma ewü. Dela wü ngü te ena asiti mü gbü jia Me me-ye.”

9.2-8
Dene ngü ka küte Yesu te fü te-ye
Matayo 17:1-13, Luka 9:28-36
2 Fütanga sïkpï maʼdiya, fü Yesu ayia aza wü Petero, *Yakobo, bete *Yüwane. Fü ewü anü akoro kpa enzö mere rüvü. Te wüh koro kpala, fü küte Yesu akpo da efü te-ye, da ecï acï gbü jia ewü. 3 Fü bongo kaka-na avi kpah avi kpïlïlï, angbü da ecï acï baka ra. Kpara te ena azürü bongo, avi akoro di bala, ah nda ma. 4 Wüh te eceka kpï bane de, gbo! te wü kpara ʼbasu. Ah de wü *Ïlïya ake *Müse, diri wü kpara ka Me ta gügü ne. Fü Yesu angbü da ero mö de ewü. 5-6 Fü mere cürü ayia arï te wü Petero. Fü fïngangü ka-wü akpo da endoro ʼdaaa. Fü Petero ayia amala ngü fü Yesu, gü ba dene, “Mere kpara, sü de sene, ah reke gbü jia ni fa sü. Ah tï ta fü ani angbü sene. Te di bala, ani ena ajï wü gugu bata, nda-ye biringbö, nda Müse biringbö, nda Ïlïya kpah biringbö.” Ah mala ngü la bala, angü ah wu züka ngü, te engu ena amala ne, nda de. 7 Petero bü te emala ngü la, fü sangu ayia akoro, agba ewü ʼburu. Fü ri Me awü gbü sangu la, gü ba dene, “Dene zu Ye ra, te maguma ra le engu fa sü. Yi di eje ʼduwa rïrï kaka-na.” 8 Wüh te eceka kpï bane de, yïrrrï! Wü Müse ake Ïlïya nda-wü tïne ma! Yesu ka-ye bü eyi kpikpi ye.

12.28-31
Dene ngü ta te Yesu mala teka kpeke Rïrï ka Me
Matayo 22:34-40
28 Gara *mürü rïrï ngbü ta eje yïkï te wü *Saduke ngbü ega de wü Yesu ne. Te engu je ngü te Yesu lügü fü ewü la, fü ngü la areke gbü jijia na afa sü. Fü mürü rïrï la adu ayi-ta Yesu, gü ba dene, “Mere kpara deyï, nda-ni yitangü kpah ladü. Esüka wü *Rïrï ka Me ʼburu, kpeke rïrï, te fa wü bu ye ʼburu, neh engu deyi?” 29 Yesu gü ba, “Kpeke Rïrï te Me to fü nih, wü di enga *Yïsarayele, gü ba dene, ‘Me ka-ye ngbee biringbö. Ah de miri ka-nih me-ye. Kpara te fa engu nda ma. 30 Mü le Me de maguma mü ʼburu. Mü o fïngangü ka-mü kpah ʼburu tete. Mü le ngü kaka de wazi mü kpah ʼburu. Mü to te-mü kpah ʼburu fefe.’ Dela kpeke Rïrï te Me to fü nih, te fa wü bu ye ʼburu. 31 Eʼbaʼbasu na gü ba dene, ‘Mü le wü bu mü, baka e te mü ngbü ele küte mü.’ Dela gina wü kpeke *Rïrï ta te Me to fü nih. Gara rïrï te fa ewü dela nda ma.”

14.10-11
Dene ngü te Yuda Keriyota reke, teka ato Yesu di fü wü vügü
Matayo 26:14-16, Luka 22:3-6
10 Fütanga ngü la, fü *Yuda Keriyota, te di biri kpara esüka wü *kpara ka Yesu nzükpa de füh ye ʼbasu ne, ayia anü kpaka wü mere *kovo ka wü Yïsarayele. Fü ah amala ngü fü ewü, gü ba, “Ni ena agïrï kaje, te ni ena ato Yesu di fü wü.” 11 Te wü mere kpara la je ngü te Keriyota mala fü ewü de bala ne, fü ngü la areke gbü jia ewü ʼduwa ba-neh-ene-la. Fü ewü alügü ngü fefe na, gü ba dene, “Te ye to Yesu fü ani fanü fanü la, ani ena ato jiase fü ye.” Te di bala, fü Keriyota akpo da egïrï züka kaje, te ni ena agü tamu Yesu tete fü ewü.

14.44-46
44 Angü Yuda Keriyota mala ta fü ewü, gü ba, “Ni ena agü tamu Yesu fü wü. Mene kpara te ni ena afaka, dela eyi engu. Wü zoro engu gö! anü di kpaka wü mere kpara.” 45 Fü Keriyota akoro kürrrü, afaka Yesu, gü ba dene, “Mere kpara, mü ladü!” 46 Fü ewü ayia ʼduwa azoro Yesu.

15.6-15
6 Ta gbü wü re la, gbü mere sïkpï ka *Pasïka ʼburu, Miri Pïlatü ngbü ta ece kpa te gara kpara ka ku biringbö, ba e te wü di enga Yïsarayele ngbü ele. 7-11 Te di bala, fü wü gara kpara ayia akoro kpaka Miri Pïlatü, ayi-tata, gü ba dene, “Mere kpara, ah ena atï atï fü ye ace kpa te kpara ka ku biringbö fü ani, kpah baka e te ye ngbü emere gbü wü sïkpï ka Pasïka ʼburu ne?” Baka te Miri Pïlatü, wu eyi, gü ba, maguma wü kovo la siti eyi eküte Yesu, fü ewü aza engu akoro di kpaka ni, teka de ni mörö engu asidi ne, fü engu ayia agïrï kaje, de ni küwa Yesu tete na. Fü ah ayia amala ngü fü wü kpara la, gü ba dene, “Wü le de ni ce neh kpa te da? Te ni ce kpa te Yesu, miri ka-wü ne, ah esiti?” Te wü kpara la je ngü te Miri Pïlatü mala de bala ne, fü ewü aci ʼburu, amala ngü fü Miri Pïlatü, gü ba, “Ani ele de ye ce kpa te Baraba engu fü ani!” Wüh mala bala kükürü de, angü wü kovo to ta ngü eyi guvu ewü gügü, gü ba, “Te Pïlatü gü ba, ni le ace kpa te Yesu la, de wü ce ka-wü kpo. Wü mala fefe, gü ba, ‘Ani le ka-ani Baraba engu.’ ” Baraba ta süka wü kpara te wüh gü gbü ku, teka te wüh ngbü emömörö wü kpara teka tö ka-wü. 12 Miri Pïlatü gü ba, “Anga Yesu, de te wüh ngbü eï engu, gü ba, ah de Miri ka wü *Yïsarayele ne, ni ena amere de engu neh ene?” 13 Fü ewü aci ʼburu, aba rere kpa tikpi, gü ba dene, “Wüh mörö engu amörö! Wüh bere engu eküte *rü gbegbete!” 14 Miri Pïlatü gü ba, “Teka neh? Engu kpo neh ene lïya ne? Ah mere ne *siti ngü ne?” Fü ewü adu akpo da eba rere, afa engu de tïne ne ka, gü ba, “Wüh mörö engu amörö! Wüh bere engu eküte rü gbegbete!”

15 Fü cürü arï te Miri Pïlatü, teka mere bi wü kpara la. Fü ah adu ale ngü ka-ewü. Fü ah ayia ace kpa te Baraba fü ewü, ba e te ewü le. Fü ah adu aï wü marajümïya ka-ye de wüh süma Yesu. Fü ewü asüma Yesu de siti juru konü de biki gbü ye. Fütanga ngü la, fü Miri Pïlatü adu aza Yesu, ato fü wü marajümïya ka-ye, de wüh nü, wüh bere engu eküte rü gbegbete.

15.33-39
Dene ngü ka kpi ka Yesu
Matayo 27:45-56, Luka 23:44-49, Yüwane 19:28-30
33 Fütanga ngü la, ah te enü akoro etü ra, fü sü ayia atï ʼduwa mbirrri, baka biti la. Fü e la ayiri bala, zalü akoro gbü lö-ra bata ka tamurago. 34 Gbü lö-ra engu la, fü Yesu ayia aku gba de mere ri ye kpa tikpi, gü ba dene, “Eloyi, Eloyi, lama sabakatanï?” Ah baka e te wüh gü ba dene, “Me, Mere Miri ka-ra, mü ce ra kpikpi ra, neh teka ne?” 35 Wü gara kpara te ewü di kpala, wüh je ngü te Yesu mala la mbi mbi nda-wü de, fü gara ewü afï, gü ba dene, “Ah ngbü dela neh eï *Ïlïya, de ah koro, ah küwa ni?” 36 Fü gara komoko ayia akpe de woro, aza e baka lïfa föʼdö föʼdö bala, agü gbü fï, ato te nzö e baka gala la, aza ato te komö Yesu, de ah ʼbü, gü ba dene, “E-wu neh da, anga Ïlïya ena akoro aküwa engu?”

37 Fü Yesu ayia aku gba kpa tikpi, ayia ace maguma ye, akpi.

38 Gbü lö-ra te Yesu kpi tete na, fü mere bongo ta te wüh i, kolo tü *Mere Kambü ka Me agbü Yerüsalema di, baka ngisi ne, fü ah ayia asörö te-ye de tete-ye, mbaaa kü kpa tikpi ngbüüü kötö. Fü ngü la aga gbü jia wü kpara ba sirimbi.

Dela ta ngü te Yesu kpi tete na.

39 Gara mere kpara ka wü marajümïya ngbü ta eceka Yesu kpala. Te engu je gba ka Yesu bala, fü ah awu kaje te Yesu kpi tete na, fü ah agü ba, “Komoko ne, ah ka-ye de Ye Me fanü fanü.”

15.42-46
Dene ngü teka kö Yesu
Matayo 27:57-61, Luka 23:50-55, Yüwane 19:38-42
42-43 Gara komoko ta ladü de ïrï ye *Yüsefa kpara ka Arïmatayo, te di de mere kpara esüka wü mere *kovo ka wü Yïsarayele. Ah kpah de kpara te ngbü eo jia ye teka Miri, te Me ena atima teka aküwa wü kpara ne. Sïkpï de ta te Yesu kpi tete na ne, ah ka-ye ta sïkpï te wü kpara ngbü ereke te-wü tete, teka *sïkpï ka Me ka wü Yïsarayele. Te di bala, etamurago la, fü Yüsefa ayia, ai maguma ye gö, anü kpaka Miri *Pïlatü, andaʼba te-ye fefe na, gü ba dene, “Mere kpara, ni le ayi-ta ye de gara ngü biringbö. Te ah tï eyi gbü jia ye la, ni ele de ye to kö Yesu fü ni, ni ti.”

44 Fü Miri Pïlatü adu afï nga ngü la, gü ba dene, “Yesu mere ngü ye, adu akpi kece neh fe?” Fü Miri Pïlatü ayia aï mere kpara ka wü marajümïya ka-ye, ayi-tata, gü ba dene, “Yesu kpi eyi fanü?” 45 Komoko la ga, “Wayi, ah kpi eyi fanü.” Te Miri Pïlatü je ngü la bala, fü ah ayia ale ngü ka Yüsefa, ato kö Yesu fefe.

46 Fü Yüsefa ayia anü ase züka bu bongo, akoro di. Fü ah adu aza kö Yesu eküte *rü gbegbete asidi, adu agaga de bu bongo la. Fü ah anü de kö Yesu, ati agbü gara gö da, te wüh jï sere sere bane, angü gele ka wü *Yïsarayele ta bala. Fü ah awara mere ngbürükü da, ao emö nga mbükü la, ani di.

16.1-7
Dene ngü te mere te-ye kpa füh mbükü Yesu
Matayo 28:1-8, Luka 24:1-8, Yüwane 20:1-12
1 Kpurutokokpï la, wü kpara ʼburu ngbü efe te-wü, angü ah de *sïkpï ka Me. Etamurago la, te ra tï tete na, *sïkpï ka Me nza eyi. Te di bala, fü *Marïya Egba-Magadala ayia de wü Salüme, bete *Marïya ni ye Yakobo, ayia anü ase *züka se-mü, teka amoko eküte kö Yesu.

2 Gügü kpurutokokpï, fü ewü ayia anü kpa füh mbükü. 3 Te wüh ngbü enü tete na, fü ewü angbü emala ngü esüka wü, gü ba dene, “Anga mere siti da, te wüh ni mö mbükü la di ne, ani ena amere di, neh baye? Kpara te ena anzi da la asidi neh da, teka fü ani arï kpala?” 4 Fü ewü anü akoro kpa füh mbükü la, aceka kpï, yïrrrï! Da, ta te wüh o emö mbükü ne, wüh nzi eyi asidi!

5 Fü ewü ayia arï agbü gö da, te wüh ti Yesu gbügbü na ne. Gbo! te gara jaji komoko de züka bu bongo te ye, te ngbü gbü mbükü kpala gbü kokpa. Fü cürü arï te ewü ʼduwa ba-neh-ene-la. 6 Fü jaji komoko la ayia amala ngü fü ewü, gü ba dene, “Yi kpe cürü de. Ma wu eyi, gü ba, yi ngbü egïrï Yesu, kpara te wüh bere engu te *rü gbegbete ne. Ah zükü eyi. Yi ceka la sanga, ta te wüh o kökö gbügbü na ne. Engu sene ma! 7 Yi du edu, yi mala ngü la fü wü Petero de wü bu ye, gü ba dene, ‘Yesu zükü eyi! Ah nü sü eyi kpa engagira nü agbü *Galïlaya. Wüh nü enü, fü ewü amaka engu kpala, kpah ba ngü ta te engu mala fü ewü ne.’ ”

16.15-16
15 Fü Yesu adu arü amala gara ngü fü ewü, gü ba dene, “Yi nü, yi baya te nga sü füh kotö ne ʼburu, de yi mala ngari ra fü wü kpara ʼburu nde. 16 Mene kpara te to maguma ye fere, de yi to *babatïza fefe na, fü Me aküwa engu. Mene kpara te le ngü ka-ra la de, ah küwa kpah de.
16.19-20
19 Fütanga ngü la, fü Me ayia aza Yesu, ago di agbü sü ka-ye, agbü kpï. Fü Yesu angbü kpala gbü kokpa ka Me. 20 Te wü *kpara ka Yesu je ngü te engu mala fü ewü la, fü ewü ayia abaya te nga wü sü ʼburu, angbü da emala ngü ka Yesu fü wü kpara ʼburu nde. Fü Miri Yesu angbü da eto wazi fü ewü teka tima ka-ye la. Fü ah angbü kpah eto wazi fü ewü, de wüh ngbü emere wü mere tiri ngü ka talara di, teka fü wü kpara awu, gü ba, “Ngü ka Yesu, te ewü ngbü emala la, ah ka-ye de zu ngü fanü fanü.”

Dela ngü teka Yesu *Kurisito, Ye Me. Adudu na bala.