Jesús - Mixe, Juquila
Here are some extracts from a Mixe, Juquila translation of the Bible that talk about Jesus. The extracts are from the Gospel of Mark.

1.1
Oybyʉ Ayuk Di'ibʉ Markʉs Jyaay
Fwank Yajnʉbajtpʉ tka̱jxwa'xy ja Diosʉ 'yayuk ma̱ mʉj it
1.1 Dʉ'ʉn tsyondaky ja oybyʉ ayuk mʉt yʉ'ʉgyʉjxmʉ Jesukristʉ, ja Diosʉ 'yU'unk,

1.14-15
Jesús tka̱jxwa̱'xtso'oñ ja Diosʉ 'yayuk
1.14 Es ko Fwank yajtsiimy, net ja Jesús ñejxy Galileeʉ ña̱a̱xóty es jap tka̱jxwa'xy ja oybyʉ ayuk.
1.15 Net ja Jesús t'anʉʉmʉdʉ ja ja̱'a̱yʉty:
—Tʉ jya'ty ja tiempʉ es wingoombʉ dʉ'ʉn ja Diosʉ kyutujkʉn. Yajtʉgátstʉ ja mjot mwinma̱'a̱ñ es mʉbʉktʉ ja oybyʉ ayuk.

1.21-27
Jesús dyajpʉdsémy ja ka'oybyʉ ma̱ tu'ugʉ ja̱'a̱y
1.21 Ta jya̱jttʉ ma̱ ja Kafarnaúm ka̱jpn. Ma̱ ja sa̱a̱bʉdʉ xʉʉ Jesús tyʉjkʉ ma̱ ja tsa̱jptʉjk es tyʉjkʉ ya'ʉxpʉjkpʉ.
1.22 Dʉ'ʉñʉ ja ja̱'a̱yʉty wyʉ'ʉmʉdyaaydyʉ mʉdʉ di'ibʉ kyajxypy, mʉt ko dʉ'ʉnʉ naty ya'ʉxpeky éxtʉm tu'uk di'ibʉ myʉda̱jtypy ja kutujkʉn es kyaj éxtʉm ja di'ibʉty tsa̱jptʉgóty ya'ʉxpʉjktʉp.
1.23 Ma̱ ja tsa̱jptʉjk japʉ naty tu'ugʉ ja̱'a̱y di'ibʉ myʉda̱jtypy ja ka'oybyʉ. Ta yaxkeky:

1.24 —¿Ti mdunaampy mʉt ʉj, Jesús nazarenʉ? ¿Tii mmiimp xyajkutʉgoya'añʉdsʉ? Ʉj n'ʉxkajpyʉts mij ko mwa̱'a̱tsja̱'a̱yʉty di'ibʉ Dios wya̱ndak tkaxa̱'a̱ñ.

1.25 Net ja Jesús t'ooy ja ka'oybyʉ, es t'anma̱a̱y mʉdʉ kyutujkʉn:
—¡Amoñʉ es mastu'udʉ tya̱dʉ ja̱'a̱y!

1.26 Es ja ka'oybyʉ twijtsxijty ja ja̱'a̱y, es ja ja̱'a̱y jyantsyyaxy amʉja̱a̱, ta tyukpʉdsʉʉmʉ ja ka'oybyʉ.
1.27 Nidʉgekyʉ dʉ'ʉñʉ wyʉ'ʉmʉdyaaydyʉ ja ja̱'a̱yʉty, es ñayyajtʉʉjʉdʉ ak yʉ'ʉjʉty:
—¿Tii dʉnʉ tya̱a̱dʉ? ¡Tya̱dʉ ja̱'a̱y myʉda̱jtypy ja kutujkʉn es t'ana'amʉt extʉ yʉ ka'oybyʉ, es mʉmʉdoojʉp!

1.32-34
Jesús dya''agʉda'aky may ja puma̱'a̱yʉty
1.32 Ko oj tsyi'tnʉ ja xʉʉ, ta oj dyajmíndʉ ma̱ Jesús nidʉgekyʉ ja puma̱'a̱yʉty es di'ibʉ myʉda̱jttʉp ja ka'óybyʉty,
1.33 es tʉgekyʉ ja kuga̱jpnʉty myiindʉ tʉjk agʉ'ʉm ma̱ naty ja Jesús.
1.34 Jesús ya''agʉdak may ja di'ibʉ myʉda̱jttʉp kana̱k nax ja pa̱'a̱m es yajpʉdsʉʉm ja ka'óybyʉty. Es ja'a ko ja ka'óybyʉty ñija̱'a̱dʉp pʉ́nʉ dʉn ja'a, pa̱a̱ty ja Jesús dyajkutijky es kyaj kya̱jxtʉt.

2.1-12

Jesús dya''agʉda'aky tu'ugʉ xux ja̱'a̱y
2.1 Oknʉm jyʉmbijty ja Jesús ma̱ ja Kafarnaúm ka̱jpn. Es ko yajnija̱'a̱jʉ ko tapʉ naty tʉ tyʉjkja̱'ty,
2.2 ta pojʉn ja ja̱'a̱yʉty ñaymyujkʉdʉ, es ni je'eyʉ kyanakyñibatʉ ma̱ ja tʉjk a̱a̱. Es yʉ'ʉ tka̱jxwa'xy ja Diosʉ 'yayuk.
2.3 Net tmʉmiindʉ ma̱ ja Jesús tu'ugʉ ja̱'a̱y di'ibʉ naty xux, nima̱jtáxk tkʉ'ʉydyʉ.
2.4 Es kom kyaj mba̱a̱t jya'ty extʉ Jesús wyindum, mʉt ko jyantsymyayjya'ayʉty, ta dyajjʉgáktʉ waanʉ ja tʉjkni'x. Es ma̱ dya''awatstʉ, jap tkutʉʉyña̱jxtʉ ja puma̱'a̱y mʉt tu'ugʉ mabajnu'unk.
2.5 Ko ja Jesús t'ijxy éxtʉm ja myʉbʉjkʉnʉty, ta t'anma̱a̱y ja puma̱'a̱y:
—Yʉ mbojpʉ yajma'xp.

2.6 Es na̱a̱gʉty ja di'ibʉty tsa̱jptʉgóty ya'ʉxpʉjktʉp di'ibʉ naty jap uñaaydyʉp, ja'a winma̱a̱ydyʉ:
2.7 “¿Ti ko tya̱dʉ ja̱'a̱y dʉ'ʉn kyajxy? Myʉdʉgeebyʉ dʉ'ʉn ja Dios, mʉt ko ni pʉ́n mba̱a̱t tkame'xy ja pojpʉ, yʉ'ʉyʉ dʉ'ʉnʉ Dios.”

2.8 Ñija̱'a̱bʉ naty ja Jesús di'ibʉ wyinma̱a̱ydyʉp. Ta t'anma̱a̱ydyʉ:
—¿Ti ko xymyʉdattʉ axʉʉgʉ winma̱'a̱ñʉty?
2.9 Kyaj ñimʉja̱a̱ty njʉna̱'a̱nʉm: “Yʉ mbojpʉ yajma'xp”, mʉt ko kyaj ya'ixy pʉn tʉy'a̱jtʉn. ¿Tii kyaj dyʉ'ʉnʉty? Es mjʉna̱'a̱ndʉp miidsʉty ko ni pʉ́n tka''anʉʉmʉt yʉ tya̱dʉ xux: “Pʉdʉ'ʉk, yajmúk ja mmabajn es nʉjx”,
2.10 mʉt ko mba̱a̱t ya'ixy ko kyaj tmʉdaty ni ti mʉk'a̱jtʉn. ¿Tii kyaj dyʉ'ʉnʉty? Pes oy. Min n'oktuk'ixtʉ ko ʉj, ja Naxwíñʉdʉ Ja̱'a̱yʉdyʉ Kyudʉnaabyʉ, sitʉy nmʉda̱jtypyʉts ja mʉk'a̱jtʉn ya̱ naxwiiñ es nma'xʉdʉts ja pojpʉ.
Net t'anma̱a̱y ja xux:

2.11 —Mij n'anmaapy, pʉdʉ'ʉk, yajmúk ja mmabajn es nʉjx ma̱ mdʉjk.

2.12 Net ja puma̱'a̱y pyʉde'ky, es dyajmijky ja myabajn, es tsyo'oñ jam ijxnide'xy. Es mʉdʉ tya̱a̱dʉ dʉ'ʉñʉ wyʉ'ʉmʉdyaaydyʉ es t'awda̱jttʉ ja Dios, es jyʉnandʉ:
—Ni na̱'a̱nʉmʉ dʉ'ʉn nga'ijxʉm éxtʉmʉ tya̱a̱dʉ.

4.35-41
Jesús dyajmo'oty ja poj es dyajtʉmijtkʉ ja mejyñ
4.35 Nan ja xʉʉ ko oj tsyu'ujʉnʉ, ta t'anma̱a̱ydyʉ ja 'yʉxpʉjkpʉty:
—N'oknina̱jxʉm ja mejyñ.

4.36 Net tnikaktʉ ja ja̱'a̱yʉty es ñʉjxtʉ mʉt ja barkʉ ma̱ naty ja Jesús 'yu'uñʉ. Es 'yakpanʉjxʉdʉ wiinkpʉdyʉ barkʉ.
4.37 Ta myiiñ tu'ugʉ mʉk poj. Es ko ja nʉʉ ñikapy tʉjkʉp barkoty, net ja barkʉ 'yutsannʉ mʉdʉ nʉʉ.
4.38 Tamʉ natyʉ Jesús mya'ay ʉx'am ma̱ tu'ugʉ kukoy kyʉxmada'aky. Ta dyujxtʉ es t'anma̱a̱ydyʉ:
—¡Windsʉ́n! Tyap ngi'inʉnʉ, ¿es mij kyaj ti xyjawʉ?

4.39 Net ja Jesús pyʉde'ky es t'ooy ja poj, es t'anma̱a̱y ja mejyñ:
—¡Amoñʉ! ¡Tʉmijtkʉ!
Ta ja poj myo'ty, es tʉgekyʉ oj wyʉ'ʉmʉdya'ay amoñʉ es tʉmijtkʉ.
4.40 Net ja Jesús t'anma̱a̱ydyʉ ja 'yʉxpʉjkpʉty:
—¿Ti ko nʉgoo m'oktsʉ'kʉnʉdʉ? ¿Ti ko xykyamʉdattʉ mʉbʉjkʉn?

4.41 Ta ja 'yʉxpʉjkpʉty jyantsytsyʉ'kʉdʉ, es ñayjyʉnánʉdʉ:
—¿Pʉ́nʉ dʉnʉ tya̱a̱dʉ, ko extʉ yʉ poj esʉ mejyñ mʉmʉdoojʉp?

5.22-24
5.22 Net ñimiinʉ nidu'uk di'ibʉ xyʉ'a̱jtypy Jayrʉ, di'ibʉ windsʉn'a̱jtp ma̱ ja tsa̱jptʉjk. Ko jyajty ma̱ ja Jesús, ta ñaygyoxtʉna̱a̱ydyákʉ tyeky'ʉjxm,
5.23 es tjantsymyʉnu'xtáky, es t'anʉʉmʉ:
—Yʉ nnʉʉxʉts tim'oogánʉp. Tunʉ may'a̱jtʉn, min esʉ mgʉ'ʉ xytyuknikónʉt es 'yagʉda̱'a̱gʉt es jyiky'átʉt.

5.24 Net ja Jesús oj ñejxy mʉt yʉ'ʉ, es may ja ja̱'a̱y oj pyanʉjxʉdʉ es 'yadijmúkʉdʉ.

5.35-42
5.35 Támnʉmʉ naty ja Jesús 'yakkajxy ko ñimiinʉdʉ ja ja̱'a̱yʉty di'ibʉ tso'omp ma̱ ja Jayrʉ tyʉjk. Ta t'anma̱a̱ydyʉ ja Jayrʉ:
—Yʉ mnʉʉx tʉ 'yo'knʉ. Katʉ xyñaky'adsipy ja Windsʉ́n.

5.36 Es ja Jesús ni tkamʉjpʉjtáky éxtʉmʉ naty jyʉna̱'a̱ndʉ. Ta t'anma̱a̱y ja Jayrʉ:
—Katʉ mjotmay'eeky. Mʉbʉjkʉts je'eyʉ.

5.37 Es tkutijky es kyaj pʉ́n pyanʉjxʉdʉt, ja'ayʉ ja Peedrʉ, Santya̱'a̱gʉ esʉ Fwank, ja myʉga'axʉ Santya̱'a̱gʉ.
5.38 Ko jyajty ma̱ ja tyʉjkʉ Jayrʉ, net t'ijxy ko ni'igʉ ja ja̱'a̱yʉty ñaymyuk ñaydya̱'a̱dsʉdʉ es jyantsyjyʉ'ʉy jyantsyya̱'a̱xtʉ.
5.39 Ta ja Jesús tyʉjkʉ jap tʉgoty es t'anma̱a̱ydyʉ:
—¿Ti ko nʉgoo m'okna'amnʉdʉ es mjʉ'ʉydyʉ? Yʉ kixyu'unk kyaj tʉ 'yeeky, ma̱a̱bʉ dʉ'ʉn.

5.40 Per je'eyʉ tyukxíkʉdʉ. Net ja Jesús dyajpʉdsʉʉmdʉ nidʉgekyʉ. Ta tmʉnejxy ja u'unkta̱a̱k u'unkteety es mʉdʉ 'yʉxpʉjkpʉty. Ta tyʉjkʉ ma̱ ja o'kpu'unk 'yity.
5.41 Ta tma̱jtsʉ ja kyʉ'ʉ es t'anma̱a̱y:
—Talita, kumi (di'ibʉ ayuk wimbʉdsʉʉmp: “Kixyu'unk, mij n'anmaapy, pʉdʉ'ʉk.”)

5.42 Netyʉ ja kixyu'unk pyʉde'ky es yo'oydsyo'oñ. Ma̱jmajtskʉ natyʉ jyʉmʉjt. Es ja ja̱'a̱yʉty dʉ'ʉñʉ wyʉ'ʉmʉdyaaydyʉ.

7.18-23
7.18 Ta ja'a 'yadsoojʉ:
—¿Nan kyaj miits xyjaygyúkʉdʉ? Ko di'ibʉ tʉjkʉp a̱a̱jóty, kyaj yʉ'ʉ di'ibʉ yajpekykya̱'a̱p,
7.19 mʉt ko di'ibʉ tʉjkʉp a̱a̱jóty, jodoty yʉ'ʉ ñejxy, es óknʉm pyʉdsemy.
Es mʉdʉ tya̱a̱dʉ Jesús tyuknija̱'a̱dʉ ko tʉgekyʉ je'xy peky, wa̱'a̱dsʉ'ʉ.
7.20 Es nandʉ'ʉn 'yanma̱a̱yʉdʉ:
—Ko di'ibʉ pʉdsʉʉmp jyodoty wyinma̱'a̱ñóty, yʉ'ʉ sitʉy yajpekykya̱'a̱dʉp ja ja̱'a̱yʉty,
7.21 mʉt ko ma̱ ja ja̱'a̱y jyodoty wyinma̱'a̱ñóty myiñ yʉ axʉk winma̱'a̱ñ, yʉ mʉ'induunk, yʉ yajja̱'a̱y'o'k, ko ja̱'a̱y dyajtʉgóydyʉ yʉ pʉjk úkʉnʉ wyindsʉ'kʉn,
7.22 yʉ ma'tsk, yʉ adsojk, yʉ andak, yʉ axʉk jiky'a̱jtʉn, yʉ naywyinnaxʉja̱'a̱k, yʉ pi'tska̱jx, yʉ mʉjpátʉk, yʉ kujuun'át.
7.23 Tʉgekyʉ tya̱dʉ axʉk'a̱jtʉn, yʉ'ʉ miimp jodoty winma̱'a̱ñóty, es yʉ'ʉ dʉ'ʉn yajpekykya'apy ja ja̱'a̱yʉty.

9.2-8
Jesús tyʉgatsy

9.2 Kyumdʉdujk xʉʉ Jesús oj ñejxy ma̱ tu'ugʉ kopkʉ kʉjxmbʉ. Yʉ'ʉyʉ wyoo ja Peedrʉ, Santya̱'a̱gʉ esʉ Fwank. Es jam wyindúmʉty tyʉga̱jtsy ja Jesús.
9.3 Yʉ wyit jyʉmbijty jantsy tʉ'xp es jantsy poop éxtʉmʉ tsa̱jp'e'pyky, éxtʉm ni pʉ́n ya̱ naxwiiñ mba̱a̱t tkayajwe'emy poop.
9.4 Es yʉ'ʉjʉty 'yijxtʉ ja Eliiʉs esʉ Moisés myadya̱'a̱ktʉ mʉdʉ Jesús.
9.5 Net ja Peedrʉ t'anma̱a̱y ja Jesús:
—Windsʉ́n, oy ko nya̱a̱'a̱jtʉm. N'ok'ya'o'oyʉm tʉgʉʉgʉ ʉxkʉda̱'a̱k tʉjk: tu'uk mij xyja'a'átʉt, jatu'uk tja'a'átʉt ja Moisés es jatu'uk tja'a'átʉt ja Eliiʉs.

9.6 Dʉ'ʉn 'yanma̱a̱y mʉt ko ja 'yʉxpʉjkpʉty tsyʉ'ʉgʉdʉ naty, esʉ Peedrʉ ni tkanijawʉ wi'ix jyʉna̱'a̱nʉt.
9.7 Net oj myiñ tu'ugʉ yoots di'ibʉ yajnitujkʉdʉ, es jap yoodsóty yajmʉdooy tu'ugʉ ayuk di'ibʉ jʉna̱a̱mp:
—Tya̱a̱dʉdsʉ dʉ'ʉn ja n'U'unk di'ibʉts njantsytsyejpy. Mʉmʉdowdʉ yʉ'ʉ.

9.8 Ko ti'in ñas'ijxʉdʉ ma̱ naty tʉ t'ixtʉ, ta kyaj tnaky'ijxtʉ ni pʉ́n, yʉ'ʉyʉ natyʉ Jesús ma̱ yʉ'ʉjʉty.

12.28-31
Ana'amʉnʉ waanʉ mʉjpʉ
12.28 Net nandʉ'ʉn ñimiinʉ Jesús tu'uk ja di'ibʉ tsa̱jptʉgóty ya'ʉxpʉjkp, di'ibʉ tʉ tmʉdoyʉ tya̱a̱dʉ es ñija̱'a̱p ko Jesús tʉ t'adsoodʉ ja saduseeʉty mʉdʉ wijy'a̱jtʉn. Ta dyajtʉʉy:
—Ya'ʉxpʉjkpʉ, ¿di'ibʉ dʉ'ʉn ja ana'amʉn ni'igʉ myʉ́jʉty?

12.29 Ta Jesús 'yadsoojʉ:
—Ja ana'amʉn di'ibʉ ni'igʉ myʉ́jʉty, yʉ'ʉ tya̱a̱dʉ ma̱ jyʉna'añ: “Mʉdowdʉ es jaygyúkʉdʉ, miits israelítʉty: ja Dios di'ibʉ Nindsʉn'a̱jtʉm, yʉ'ʉyʉ je'eyʉ Windsʉn'a̱jtp.
12.30 Tsoktʉ ja mWindsʉ́n Dios mʉt winʉ mjot mwinma̱'a̱ñ, mʉt winʉ m'anmʉja̱'a̱n es mʉt winʉ mmʉja̱a̱.”
12.31 Es ja myʉmajtskpʉ yʉ'ʉ dʉ'ʉn jyʉna'añ: “Tsoktʉ ja mmʉdʉjkpa̱'a̱ éxtʉm mij kʉ'ʉm mnaydsyékyʉty.” Tadʉ nimajtskpʉ ana'amʉn nik ni'igʉ myʉ́jʉty kʉdiinʉm ni tu'ugʉ wiinkpʉ.

14.10-11
Juudʉs tkʉyaka̱'a̱ñ ja Jesús
14.10 Net nidu'ugʉ nima̱jmajtskpʉ ja ʉxpʉjkpʉ di'ibʉ xyʉ'a̱jtypy Juudʉs Iskaryotʉ, oj ñejxy ma̱ ja teedywyindsʉ́nʉty es oj myadya'aky mʉt yʉ'ʉjʉty wi'ix tkʉyaka̱'a̱ñ ja Jesús.
14.11 Es yʉ'ʉjʉty xyondaktʉ es twa̱ndaktʉ ja Juudʉs ko tmo'oya̱'a̱ndʉ ja meeñ. Net ja Juudʉs t'ʉxta̱a̱y ja winma̱'a̱ñ wi'ix tkʉyákʉt ja Jesús.

14.44-46
14.44 Yʉ Juudʉs tʉ naty ttukni''ixʉ wi'ixʉ naty dyaka̱'a̱ñ ja ijxwʉ'ʉmʉn:
—Di'ibʉts ʉj ndsi'xypy, yʉ'ʉ dʉ'ʉnʉ naty ja Jesús. Yʉ'ʉ dʉ'ʉn mmátstʉp es yajxón xykyʉtsúmdʉt es xyajnʉjxtʉt.

14.45 Netyʉ Juudʉs tnimiiñ ja Jesús es tka̱jxpe'xy:
—Dios maygyépyʉty, Windsʉ́n.
Ta oj ttsi'xy.
14.46 Ta tma̱jtsnʉdʉ ja Jesús es dyajnʉjxnʉdʉ tsimy.

15.6-15
Jesús ñidukʉ es 'yoogʉt
15.6 Es paskʉ paskʉ ja Pilatʉ tnasmatsʉ tu'ugʉ tsimyjya'ay di'ibʉ ja ja̱'a̱yʉty wyin'ijxtʉp.
15.7 Japʉ naty 'yittʉ tsimy na̱a̱gʉty di'ibʉ tʉ yajja̱'a̱y'eeky ko tsyiptuundʉ yʉ yajkutujkpʉ, es nidu'uk yʉ'ʉjʉty xyʉ'a̱jtypy Barrabás.
15.8 Ta ja ja̱'a̱yʉty tniwingoondʉ ja Pilatʉ, es t'amdoodʉ ttúnʉt éxtʉm jaayʉm ttuñ.
15.9 Ta ja Pilatʉ 'yadsoodʉ:
—¿Tii mdsojktʉp es nnasmátsʉdʉts ja mrey?

15.10 Dʉ'ʉn jyʉnáñ ja Pilatʉ mʉt ko ñija̱'a̱bʉ naty ko ja teedywyindsʉ́nʉty tnaywyinnaxʉjáwʉdʉ ko ja Jesús may ja ja̱'a̱yʉty pyanʉjxʉdʉ es pa̱a̱ty tʉ tyukkʉdʉ́kʉdʉ.
15.11 Per ja teedywyindsʉ́nʉty tnibʉdʉ'ʉktʉ ja ja̱'a̱yʉty es jyʉna̱'a̱ndʉt ko yajnasmátsʉt ja Barrabás.

15.12 Ta ja Pilatʉ dyajtʉʉdʉ:
—¿Es tits ndúnʉp mʉt di'ibʉ miits mdijtʉp ja israelítʉdyʉ ryey?

15.13 Yʉ'ʉjʉty yaxkaktʉ:
—¡Yajkruuzpát!

15.14 Ta ja Pilatʉ t'anma̱a̱ydyʉ:
—Pes, ¿tii dʉ'ʉn tʉ ttuundʉgóy?
Per ja'ajʉty 'yaktim'yaxkaktʉ:
—¡Yajkruuzpát!

15.15 Es ja'a ko Pilatʉ wyʉ'ʉma̱'a̱ñ oy mʉt ja ja̱'a̱yʉty, ta tnasma̱jtsʉ ja Barrabás es tni'ana'amʉ esʉ Jesús yajwópʉt. Ta net tkʉyajky es dyajkruuzpáttʉt.

15.33-39
Jesús 'yeeky
15.33 Net tʉgekyʉ ja naxwíñʉdʉ kyoodsʉdyaay kijkyxyʉʉ extʉ tʉgʉk yaxp xʉʉnʉm.
15.34 Es nan ma̱ tadʉ oorʉ ja Jesús mʉk kyajxy:
—Eloy, Eloy, ¿lamʉ sabaktanʉ? (di'ibʉ ayuk wimbʉdsʉʉmp: “Dios miiʉ, Dios miiʉ, ¿ti kots mij tʉ xymyastu'uty?”)

15.35 Nidu'ugʉty di'ibʉ naty jam tmʉdoodʉ, es ñayjyʉnánʉdʉ:
—Mʉdowdʉ, yʉ'ʉga yáxʉp ja Diosʉ kyuga̱jxpʉ Eliiʉs.

15.36 Net nidu'uk oj ñejxy pʉye'egyʉ, es oj dyajtsooñ tu'uk di'ibʉ yuunkpʉnaanʉ. Ta dyajxe'ky mʉdʉ vinʉ xun, es ttukjʉjptíjʉ tu'ugʉ kepyu'unk, es ttukmʉwingooñ ja Jesús es tmuugʉt. Ta jyʉnáñ:
—Mastu'uttʉ. Min n'ok'ijxʉm pʉn nimiinʉp ja Eliiʉs es yajjʉnákʉdʉt kruuzkʉjxy.

15.37 Ta jatʉgok ja Jesús oj mʉk kyajxy, es oj 'yo'knʉ.
15.38 Net ja adʉy di'ibʉ jap mʉj tsa̱jptʉgóty kyʉ'tswa'xy kʉbajky es extʉ ʉx'am.

15.39 Net ja solda̱a̱dʉ windsʉ́n di'ibʉ naty jap tʉnaapy Jesús wyindum es tmʉdooy ko mʉk kyajxy es 'yeeky, yʉ'ʉ net jyʉnáñ:
—¡Tʉy'a̱jtʉndʉmʉ naty ko tya̱a̱dʉ yʉ'ʉjʉty ja Diosʉ 'yU'unk!

15.42-46
Jesús ñaxtʉkʉ
15.42 Ko oj tsyu'ujʉnʉ es ko naty ñayjyʉjp'íxʉdʉ ko ja sa̱a̱bʉdʉ xʉʉ dyajtsonda̱'a̱ga̱'a̱ndʉ,
15.43 ta Josee tninejxy ja Pilatʉ mʉdʉ jotmʉk'a̱jtʉn es t'amdoy ja Jesusʉ ñini'x. Esʉ tadʉ Josee, Arimateeʉ ja̱'a̱y, yʉ'ʉ naty nidu'uk ja di'ibʉ naty ana'amdʉp mʉj tsa̱jptʉgóty es jap mʉj 'yity, es 'yawijxypy ko ja Diosʉ kyutujkʉn myínʉt.
15.44 Ta ja Pilatʉ dʉ'ʉñʉ wyʉ'ʉmʉ ko yajnima̱a̱y ko tʉ ja Jesús 'yeeky. Net twoodsooy ja solda̱a̱dʉ windsʉ́n es dyajtʉʉy pʉn tʉ 'yeeky ja Jesús.
15.45 Net ja solda̱a̱dʉ windsʉ́n jyʉnáñ:
—Tʉy'a̱jtʉn. Tʉ 'yo'knʉ.
Ta ja Pilatʉ t'anma̱a̱y ja Josee:
—Mba̱a̱t xyajkruuzjʉnáky.

15.46 Net ja Josee tjuuy tu'ugʉ sa̱a̱bʉnʉ oybyʉ es dyajkruuzjʉnajky ja Jesusʉ ñini'x. Ta t'abijty mʉt ja sa̱a̱bʉnʉ. Ta tpʉjtáky ma̱ tu'ugʉ o'kpʉ jut di'ibʉ naty yʉ'ʉ tʉ dyajtsajtsjúty dyajpa̱'a̱jútyʉty tsa̱wiiñ, es oj t'agʉ'ʉy mʉt tu'ugʉ mʉjpʉ tsa̱a̱.

16.1-7
Jesús jyikypyeky
16.1 Ko ja sa̱a̱bʉdʉ xʉʉ ñajxy, ja Mariiʉ Magdalenʉ, Salomee esʉ Mariiʉ, ja Santya̱'a̱gʉ tya̱a̱k, tjuuydyʉ ja pa̱'a̱k xu'kpʉ es ttukja̱a̱xa̱'a̱ñ ja Jesusʉ ñini'x.
16.2 Ta jantsy jépyʉp, xʉʉñʉbʉnʉ naty ma̱ ja domingʉ xʉʉ, jya̱jttʉ jam ma̱ ja o'kpʉ jut.
16.3 Es jam tu'am ñayyajtʉʉjʉdʉ ak yʉ'ʉjʉty:
—¿Pʉ́n xyjʉdi'imxʉm ja mʉj tsa̱a̱ es xya''awátsxʉm ja jut?

16.4 Es ko jya̱jttʉ, ta t'ijxtʉ ko tʉ naty yajjʉdímy ja tsa̱a̱ es ja jut awa̱'a̱dsʉ naty 'yijnʉ.
16.5 Ta tyʉjkʉdʉ jutoty, es jam t'ijxtʉ 'yu'uñʉ aga̱'a̱ñgyʉ'ʉ tu'ugʉ ʉna̱'k di'ibʉ xóxyʉty mʉt tu'ugʉ poop wit yeñ. Es yʉ'ʉjʉty jyantsytsyʉ'kʉdʉ.
16.6 Es ja'a 'yanma̱a̱yʉdʉ ja toxytyʉjkʉty:
—Katʉ mdsʉ'ʉgʉdʉ. M'ʉxta̱a̱ydyʉp ja Jesús nazarenʉ di'ibʉ tʉ dyajkruuzpáttʉ. Pes tʉ jyikypyeky. Kyaj ñakyya̱a̱ty. Ixtʉ ja luga̱a̱r ma̱ naty tʉ tpʉjta̱'a̱ktʉ.
16.7 Nʉjxtʉ es xy'awánʉdʉt ja 'yʉxpʉjkpʉty es ja Peedrʉ: “Jawyiin ja'a ñejxy Galileeʉ. Japts xy'íxtʉt éxtʉm oj m'anʉ'ʉmxʉdʉ.”

16.15-16
16.15 Ta t'anma̱a̱ydyʉ:
—Nʉjxtʉ miidsʉty ma̱ nidʉgekyʉ naxwíñʉdʉ ja̱'a̱y es xytyuk'ʉxpʉ́ktʉt ja oybyʉ ayuk.
16.16 Di'ibátyʉts ʉj xy'axá̱jʉp es nʉbajttʉp, nitso'ogʉp. Per pʉ́nʉts xykya''axá̱jʉp, ja'a nʉjxʉp ma̱ ja tʉydyu'unʉnʉ winʉ xʉʉ winʉ tiempʉ.

16.19-20
Jesús tsya̱jpéty
16.19 Ko ja Nindsʉn'a̱jtʉm Jesús dʉ'ʉn jyʉna̱a̱nda̱a̱y, ta ja Dios yajpatʉjkʉ tsa̱jpótm es 'yu'uñʉ aga̱'a̱ñdsyoo ma̱ Dios.
16.20 Oknʉm ja ʉxpʉjkpʉty tsyo'ondʉ tka̱jxwa'xy ja oybyʉ ayuk ma̱jaty ja ja̱'a̱yʉty. Es ja Nindsʉn'a̱jtʉm Jesús pyudʉ́kʉdʉ yʉ'ʉjʉty, es mʉdʉ mʉj ijxwʉ'ʉmʉnʉty ttuk'ixtʉ ja ja̱'a̱yʉty ko tʉy'a̱jtʉnʉ'ʉ di'ibʉ myadyáktʉp.

_____________