Jesu - Adioukrou
Here are some extracts from a Adioukrou translation of the Bible that talk about Jesus. The extracts are from the Gospel of Mark.

1.1
Jan mij ok nuŋ ɛs e Nyam odad eke dad
Matie 3.112; Luk 3.118; Jan 1.1928
1 Aŋa anake Jesu *Krist [Nyam Jim] ec'Amani Mamn a ɔb nuŋ a,

1.1415
Jesu e jam ɛsɛl krɛkrɛ ek'ɛsŋ
Matie 4.1222; Luk 4.1415; 5.111
14 Lɛgŋ ab ɛm eke wɛl ɛlu Jan mij ok nuŋ ɛs sobel ɛm a, Jesu im Galile wus af ɛtŋ n'am ɔb Nyam ec'Amani Mamn a eci kokoba li dad l'ɛsɛ:
15 «Lɛgŋ a eke Nyam ɛwar a ow ŋ̂, aŋke Nyam ec'*es ɛw a ow titm. Ìtŋnin ɛrm ɛm ke ébr Amani Mamn a.»

1.2127
Jesu ewlm abŋ ŋuŋ ɛs a
Luk 4.3137
21 Jesu lel in e *jam ɛsɛl ab ab im Kapɛrnayum ec'ɛb ab ɛm. *Nɛnɛgŋ e lɛgŋ a, Jesu ɛy *Nyam nuŋ igŋ usu a ɛtŋ am yɛgm agŋ low.
22 Agŋ a ek'am iri in e low yɛgm a, low am iti any in ec'elel eke n'am yɛgmn agŋ low a sosiɛm, aŋke n'anm ɛsɛ ɛl ec'ol e *low yɛgm ɛsɛl ab af, kɔ n'am yɛgm wɛl low abusu ɔny ɛm.
23 Ke Nyam nuŋ igŋ usu yogŋ ɛgŋ nyam ek'*abŋ ŋuŋ anŋ ɛm a, am ɔg dad ɛsɛ:
24 «Oy! Nasarɛt e Jesu, bla am erur eke ki kok ɛy ee? Kɔ ek'ow eke ki ŋuŋn ɛy ee? Ɛm, m'uw ɛgŋ ek'el'ŋ ab any: Nyam ec'ɛrm ɛs lala.»
25 Jesu dad abŋ ŋuŋ a odad lebl tuɔtuɔ ɛm ninɛ: «Yèwal, ke ɛ́y ɔkm ɛgŋ na ɛm!»
26 Abŋ ŋuŋ a mumu ɛgŋ a lɛc ɛm, ɛtŋ am ɔg ɛy ɔkm in ɛm.
27 Agŋ a fɛŋ low iti any afŋn es toŋ batŋ n'am bibrmnin ɛl ɔfr l'ɛsɛ: «Kɔ na bla lowi ana ee? Bogŋ ec'abusu ɔny ɛm e low yɛgm owr ana ee? Ɛgŋ ikŋ na ɛw *abŋ eŋuŋ yɛj'es, ɛtŋ li b'ɛlum ow!»

1.3234
32 Ncebles ɛm a, eke ligbn im ɛru es a, agŋ ot ɛl ec'ɔ́lu a fɛŋ is Jesu; *abŋ eŋuŋ ɛsɛl yɛji anŋ ɛm.
33 Ɛb ab ɛm ec'agŋ a fɛŋ as luku Simɔ eci lisany a.
34 Jesu ewlm ɔ́lu a lel ɛl ec'ɔl ɛrŋ ɛrŋ a fɛŋ ab. N'am ogŋ abŋ eŋuŋ a, ɛtŋ l'ɛ́lum wɛl abusu es eke wɛl ki dad odad, aŋke l'uw ɛgŋ a ek'el Jesu ab any.

2.112
Jesu ewlm sos es wɛw ɛs nyam
Matie 9.18; Luk 5.1726
1 Eke sɛgŋ bɛb ɛc a, Jesu ɛwl ow Kapɛrnayum, ɛtŋ dedeku a iri eke l'ɛc akŋ.
2 Ɛtŋ kpɛkŋ agŋ nɔnɔ ow as luku gbugŋ a eb usu a fɛŋ; usu kaka anm, lisany a bɔbɔ yɛji usu anm. N'am dad wɛl Nyam ec'odad,
3 ɛtŋ agŋ yar abu sos es wɛw ɛs nyam am is Jesu.
4 Gbɛkɔ eke li k'ɔtumn l'okmn yogŋ a eke Jesu sig es agŋ a sosiɛm a, li fig usu nyam êl luw af a, ɛtŋ l'oc ɔlu a ek'anŋ in eci faja ɛm a l'usm es Jesu ec'any af.
5 Eke Jesu b'ɛkn agŋ a ec'ɔmn a, li dad sos es wɛw ɛs a ninɛ: «Ɛm jim, m'oc ŋ e sikpl a m'ap'ŋ.»

6 Ol eci *low any uw ɛsɛl bɛb sig es yogŋ, ɛtŋ am tutr ɛl ec'ɛrm ɛm dad ɛsɛ:
7 «Kɔ bla ɛtŋ ɛgŋ na am dad odad nɛnɛ ee? N'am ɔbr Nyam any! Bwo ec'ɛgŋ ɔtu eke k'óc sikpl ap ek'ow elm Nyam sɔny coco ee?»
8 Eke Jesu uw ɛl e sow tutr ab any a, li dad wɛl ninɛ: «Kɔ bla ɛtŋ am tutar ów amua na ɔny ec'ɛrm ɛm ee?
9 Kɔ bogŋ ec'anake ɛw fuɛfuɛ eke wɛl ki dad sos es wɛw ɛs ab ee? ‹M'oc ŋ e sikpl a m'ap'ŋ›, oglog ke wɛl dád'r ɛsɛ: ‹Ìgb oc ŋ eci faja a ke án es ee›?
10 Gbɛkɔ m'erur eke k'uwr low na any: wus na af, ɛgŋ ec'*Iy ɔny abusu eke k'oc sikpl ap.» Ɛtŋ sica li dad sos es wɛw ɛs a ninɛ:
11 «M'am dad'ŋ, ìgb oc ŋ eci faja a eb ejagb ím gbugŋ!»
12 Kpɛkŋ ɛgŋ a igb agŋ a fɛŋ ec'any af, l'oc in eci faja a, ɛtŋ l'ɛy ɔkm n'am an es n'im. Ow e low a iti dedeku ab any, ɛtŋ n'am kɔklm Nyam li dad l'ɛsɛ: «Lɛgŋ kaka s'ɛknm low akpasu na.»

4.3541
Jesu adar lidgbegb
Matie 8.2327; Luk 8.2225
35 Lɛgŋ a cɛ eci ncebles a, Jesu dad in e *jam ɛsɛl a ninɛ: «S'úbar mij jam a.»
36 Ɛtŋ eke l'ɛlul bieku ab es a, jam ɛsɛl a ok lɛtŋ a eke Jesu anŋ ɛm ab ɛm, ɛtŋ n'im. Mɛtŋ ɛjeci yɛji anŋ ɛl saw.
37 Ɛl ec'ubr ɛm a, kpɛkŋ lidgbegb okr ɛl es ɛtŋ mra am ɛlul ɛl, toŋ mij am bubm ok ɛl lɛtŋ ɛm.
38 Jesu gbɛ ɛkpn ob, ɛru es lɛtŋ nɛny a am ɛru mɛmn. Jam ɛsɛl a am uwr'r dad'r ɛsɛ: «Low yɛgm agŋ ɛs, kɔ ɛy e luw na eke s'am ow s'uw a, ow am kokm'ŋ low kaka ee?»

39 Jesu ufŋm es ɛtŋ dad lidgbegb a lele mij ab ab ninɛ: «Ìrmn es! Àdar!» Ɛtŋ lidgbegb a ec'ɛlu a ubr es ɛtŋ usu a fɛŋ irm es tiŋ.
40 Sica Jesu am dad in e jam ɛsɛl a ɛsɛ: «Kɔ bla ɛtŋ erŋn am ɔny ɔny ee? Kɔ ɔny k'ɔnymn ɔmn cɛ ee?»
41 Jam ɛsɛl a erŋn ligbɛl am ɔny ɛtŋ am dad ɛl ɔfr ɛm ɛsɛ: «Kɔ bwo el ɛgŋ ikŋ na eke lidgbegb lele mij ab b'ɔny in ec'ɛlum ab ee?»

5.2224
22 Ɛgŋ nyam eke wɛl b'ɛsŋ Jayirus, *Nyam nuŋ igŋ usu a ec'es ɛw ɛs anŋ ow ɛtŋ eke l'ɛkn Jesu a, l'ok ɔwrɔkp wus ow ec'any af.
23 N'am at lebl es ni ŋɔŋn Jesu li dad l'ɛsɛ: «Ɛm jɔwli am uw. Òw ke át'r abu nuŋ, yec'ɛtŋ ke li k'úwm kɔ ke n'ánŋ owr.»
24 Jesu ab n'im, ɛtŋ agŋ nɔnɔ a ek'aam ɛwl'l a am itarir l'ul il.

5.3542
35 Jesu odad anŋ nɛnym am dad ɛtŋ agŋ anŋ Jayirus ogŋ a ow. N'am dad ow l'ɛsɛ: «Ejɔŋ uw! K'ìjr low yɛgm agŋ ɛs gbre ɔfr ɔfr.»
36 Jesu usm ɛl e sodad ebl a jam kɔ li dad Jayirus ninɛ: «K'ùru erŋn, kɔ ɔ̀ny ɔmn sɔny coco cɛ.»
37 N'ɔɔm ɛgŋ kaka abusu eke k'im ɛwl'l ek'ow elm Piɛr, Jak lele Jan ek'el Jak lisijim ab cɛ.
38 N'im l'ok Jayirus ec'akŋ a; yogŋ, sɔ́g ɔnym nuŋ. Jesu ɛkn ek'agŋ am ikŋ ɔŋn babarm.
39 L'ɛy akŋ a, ɛtŋ n'am ibrm wɛl l'ɛsɛ: «Kɔ bla sosiɛm ɛtŋ am ikŋn ɔŋn ɔgr ee? Dedyɔwli a, l'uwm kɔ mɛmn n'am ɛru.»
40 Ɛtŋ dedeku a am kokr Jesu miyɛr. Ow sosiɛm l'ogŋ agŋ a fɛŋ ok ɔkm. Gbɛkɔ l'ɛsŋ iy ɛs a, iy lis a, lel in eci jam ɛsɛl agŋ nyahan ab ab, ɛtŋ l'ok akŋ a eke dedyɔwli a anŋ a.
41 N'ɔny ow abu, ɛtŋ li dad ow ninɛ: «Talita, kum!» (Ow e nyandrɛ el: ‹Dedyɔwli, m'am dad'ŋ, ìgb!›)
42 Kpɛkŋ dedyɔwli a igb ɛtŋ n'am an es. Ke dedyɔwli a, n'ɔny akpo lɛw yony. Agŋ a fɛŋ ek'anŋ yogŋ a, low iti any.

7.1823
18 Ɛtŋ n'am dad wɛl l'ɛsɛ: «Kɔ ɔny yɛji k'ɔtumn k'irimn low na eci nyandrɛ ee? Uwmn any ek'ow elm ob ek'ɛgŋ b'ij ok lokm a, k'ɔtum ɔɔm'n l'uwm anŋ,
19 kɔ ów tutr eke b'anŋ in ec'ɛrm ɛm ɛy ɔkm a anake b'ɔŋ'n ke l'uwm anŋ ab ee? Aŋke ob e li b'ij l'ok sos ɛm a, lokm ow b'ok'r kɔ ow elm ɛrm ɛm, ɛtŋ li b'iny l'ok es.» (Odad ebl na ɛm a, Jesu am yɛgm ek'ob fɛŋ akpl iju.)
20 Ɛtŋ ɛmɛny Jesu dad ninɛ: «Ów tutr eke b'anŋ ɛgŋ ɛm ɛy ɔkm a b'ɔŋ ɛtŋ l'uwm anŋ.
21 Tasi ɛm a, ɛgŋ ec'ɛrm ɛm anake sow tutr eŋuŋ a fɛŋ b'anŋ, ke b'ɔŋ'n l'ij *nfaci, l'iy mil, l'ibi ɛgŋ,
22 l'ɛrum yɔw ɛjec'ab, l'erur lawl ec'ob; li kok low ŋuŋ, l'ɛju ɛgŋ, li wuwlm ów ab, n'ɔnyn ɛgŋ nyamn ɛyr, li cak cak ɛgŋ, n'ɔny tutre, ke l'ij nyamb a.
23 Ów amua fɛŋ eke b'anŋ ɛgŋ ec'ɛrm ɛm ok ɔkm a, anake b'ɔŋ ke l'uwm anŋ a.»

9.28
2 Eke sɛgŋ nɔhɔn ɛc a, Jesu ɛsŋ Piɛr, Jak lele Jan ab ɛtŋ li kpab es n'im saw ɛm ɛl sɔny lafɛny gege nyam af. Yogŋ, Jesu itŋn sos ɛl ec'any af.
3 In eci mob sus ɛm a e jɛjn a afŋn es; wus af aŋa, ɛgŋ kaka anm eke k'ɔŋ in eci mob sus ɛm a jɛjn ɛbɛn.
4 Ɛtŋ kpɛkŋ *Eli lele *Mois ab okm sos ɔkm ɛtŋ am dad ów Jesu ab.
5 Eke Piɛr b'ɛkn ɛbɛn a, li dad Jesu ninɛ: «Low yɛgm agŋ ɛs, ow akpl eke si k'anŋ aŋa! S'ús nuŋ igŋ usu nyahan: ŋ e nyam, Mois e nyam lel Eli e nyam ab.»
6 Tasi ɛm a, Piɛr ɛknm odad eke ki dad aŋke ɛl nyahan mum erŋn am ɔny ɛl.
7 Kpɛkŋ jru ɛy ɛtŋ ubur ɛl es. Ɛtŋ lebl nyam anŋ jru ab ɛm am ikŋ dad ɛsɛ: «Ɛgŋ na el ɛm ec'*Iy eke m'erur tasi; ìrir in e low.»
8 Kpɛkŋ *jam ɛsɛl a am ɔl saw saw, gbɛkɔ l'ɛknm ɛgŋ kaka ek'ow elm Jesu sɔny cɛ ek'anŋ ɛl ab a.

12.2831
Ol ab ɛm eci ligbɛl tasi a
Matie 22.3440; Luk 10.2528
28 Ol e *low yɛgm ɛs nyam iri ɛl ec'ów es atar a, ɛtŋ l'ɛkn eke Jesu ec'odad a e dad *Sadusiɛl a el low tasi. L'ɛri l'ow li titm ow ɛtŋ n'am ibrm ow l'ɛsɛ: «Ol a fɛŋ ɛm e ligbɛl el bogŋ ec'ee?»
29 Jesu dad'r ninɛ: «Kin ol a fɛŋ ɛm e ligbɛl: O Israɛl, ìgŋ lɔru es! Ɛs Kɔtɔkɔ ɛy e Nyam el Nyam nyam coco.
30 B'ow erur Asŋ Kɔtɔkɔ ŋ e Nyam ŋ ec'ɛrm fɛŋ ɛm, ŋ ec'abŋ fɛŋ ɛm, ŋ e tutr fɛŋ ɛm lele ŋ e lɛc pupukpaŋ ab.
31 Ɛtŋ kin ol a e yony ɛm ek'ot krɛkrɛ ec'ab es: B'ow erur ɛgŋ kaka fɛŋ ɛsɛ ŋ obi af. Ol a fɛŋ ɛm, kaka anm agbm akam ol yony na.»

14.1011
Judas am bɛbm eke b'ow ɔl Jesu ij
Matie 26.1416; Luk 22.36
10 Sica, *jam ɛsɛl lɛw yony ab ɛm ec'ɛgŋ nyam eke wɛl b'ɛsŋ Judas Iskariɔt, im ɛŋn *egb waw ɛsɛl ɛgbɛl a, ɛtŋ dad ɛl eke k'ɔny Jesu ɔŋ ɛl.
11 Eke l'irir odad na a, sos ɛm iŋn ɛl toŋ l'ɛgŋ l'eb eke li k'ɔŋ ow os. Ow ɔŋ Judas am ɔl akunda sɛnyn yec'ɛm eke li k'ɔny Jesu n'ɔŋ wɛl.

14.4446
44 Judas eke b'ow ɔl Jesu ij a, ikŋ anym yɛgm dedeku a akunda yec'ɛm eke li k'ɔnyn ow a. Li dad ninɛ: «Ɛgŋ a eke m'ow mi joj nɛny a, in ana; ɔ̀nyn in, òcr imn in, ke ɔ́sur ir sɛnyn sɛnyn gɔŋ.»
45 Kpɛkŋ eke Judas im titm Jesu a, li dad ninɛ: «Low yɛgm agŋ ɛs!» Ɛtŋ li joj ow nɛny.
46 Kpɛkŋ agŋ a ok'r af ɔny'n.

15.615
Wɛl ɔb Jesu low luw eci
Matie 27.1526; Luk 23.1325; Jan 18.3919.16
6 Eke sakp sakp fɛŋ *Pak ec'es gbɛgbl e lɛgŋ b'ow a, *Pilat b'ɛlu sobel ɛm ɛs nyam eke dedeku a b'ibrm ab es.
7 Kɔ ɛgŋ nyam eke wɛl b'ɛsŋ Barabas lele lawlɛl ab ab ek'ɛ́gŋm Rom ec'es ɛw e low ebm a, anŋ sobel ɛm. L'el agŋ ek'ɛl ec'ɛrm bebl ɛm ibi ɛgŋ.
8 Dedeku a uyu im ɛŋn Pilat, ɛtŋ am ibrm'n ɛsɛ: «Kòk low a eke lakpo lakpo fɛŋ bi kok a ɔŋ ɛy.»
9 Pilat ɛwl am ibrm ɛl ɛsɛ: «Kɔ am erurir eke mi k'ɛlu Jwifɛl ec'ɛb ebu ab es m'ɔŋ ɔny ee?»
10 Tasi ɛm a, l'uw any eke nyamn ɛyr ɛm *egb waw ɛsɛl ɛgbɛl a oc Jesu is'r.
11 Egb waw ɛsɛl ɛgbɛl a am ok dedeku a al ɛm dad ek'ow k'ɛlu Barabas es ɔŋ ɛl.
12 Pilat ɛmɛny am ibrm dedeku a ɛsɛ: «Sica bla lowi mi ki kok ɛgŋ a eke b'ɛsŋn Jwifɛl ec'ɛb ebu ab ee?»
13 N'am ɔg li dad ow l'ɛsɛ: «`Ɛw'r olikŋ af!»
14 Pilat ibrm ɛl ninɛ: «Kɔ bla low ɔbr iy li kok ee?» Kɔ n'am ɔg lebl tuɔtuɔ ɛm l'ɛsɛ: «`Ɛw'r olikŋ af!»
15 Pilat erur eke ki kok dedeku a sos ɛm iŋn; na sosiɛm l'ɛlu Barabas es n'ɔŋ wɛl, ɛtŋ n'ɔŋ wɛl ɔr Jesu say ɛm gbuŋ ɛtŋ l'ɛlu abusu es eke wɛl k'oc im ɛw ow olikŋ af.

15.3339
Jesu e luw a
Matie 27.4556; Luk 23.4449; Jan 19.2830
33 Sica lɛgŋ uyu nuŋ ɛm a, ncebn ɛy wus a nimum af toŋ ok ncebles e wanci nyahan ɛm.
34 Ncebles e wanci nyahan ɛm a, Jesu barm lebl tuɔtuɔ ɛm ninɛ: «Eloi, Eloi, lama sabaktani?» (ek'el nyandrɛ ɛm: ‹Ɛm e Nyam, ɛm e Nyam, kɔ bla ɛtŋ digŋ ɛlu'm es ee?›)
35 Agŋ nyam nyam ek'anŋ yogŋ a iri odad na ɛtŋ dad ninɛ: «Ìrir, n'am ɛsŋ Eli!»
36 Ɛtŋ ɛl ɛm ec'ɛgŋ nyam uru es im oc mbra usm ɛl eci mar ab ɛm, oc ujr likŋni nyam ɛm ɛtŋ oc am ɔkŋ Jesu ek'ɛgŋ. Ɛtŋ li dad ninɛ: «S'ɛ́wr nyamn es s'ɛkan ek'Eli b'ow ɔny usm'n es olikŋ na af!»
37 Ɛtŋ eke Jesu barm lebl ligbɛl nyam a, l'ok sel es.
38 Wanci ab af cɛ *Nyamel ab ɛm eci gbad gbɛl gbada a eke wɛl ɛw ɛdŋn *usu lala ab any a, igŋ afr ɛm a ɛtŋ agbr ɛm araŋn didi toŋ ok esr ɛm a.
39 Rom e srɔda eyŋ a eci anym ɛs a ek'ɔbr Jesu any a, ɛkn luw a ec'elel eke ɛcr ɛtŋ li dad ninɛ: «Njɛ tasi ɛgŋ na Nyam ec'Iy!»

15.4246
Jesu ec'es oc owi
Matie 27.5761; Luk 23.5056; Jan 19.3842
4243 Sica eke lɛgŋ ew es a, Josɛf, Arimate baŋn iy a, am ow. L'el Jwifɛl e *Sanedrɛn ab ɛm ec'any ɛs nyam ek'in yɛji am eku ɔmn ɛm, Nyam e *gbreŋgbi usu a e mowrer e low. Ow el *nɛnɛgŋ e sos bɛbm e lɛgŋ, ek'el lɛgŋ e wɛl b'ɛŋn gbuŋ ke nɛnɛgŋ b'ɛy wus a. Na sosiɛm l'oc lokm susu ɛm, n'im n'ɛŋn *Pilat ɛtŋ l'ibrm ek'ow k'oc Jesu e sos megl a ɔŋ'n.
44 Pilat low iti any eke Jesu k'uw fafa. Na sosiɛm l'ɛsŋ Rom e srɔda eyŋ eci nyimn ɛs ligbɛl a ow ɛtŋ l'ibrm ow eke Jesu uw ow ibn.
45 Sica eke Pilat iri ɛgŋ ligbɛl a nɛnym a, n'ɔŋ Josɛf abusu eke k'im oc Jesu e sos megl a.
46 Josɛf im ɔl gbad ufu nimamn nyam, l'ow n'ɔny Jesu e sos megl a l'usm es olikŋ ab af, l'oc gbad ufu a li wiwrm ow ab ɛtŋ l'oc n'im l'oc ow es *uwɔmu lob nyam eke wɛl n'ɔŋ ur ab ɛm. Ɛtŋ li wuwl lebn ligbɛl nyam l'ow l'abl ow ec'ɛm ɛy usu ab es.

16.17
Jesu eci luw ɛm anŋ igb a
Matie 28.18; Luk 24.112; Jan 20.110
1 Eke *nɛnɛgŋ e lɛgŋ a ɛc'a, Mari, Magdala baŋn yɔwi a, Salome lele Mari, Jak lis ab, ɔl mun sŋɔsŋɔ eke k'im ok Jesu e sos megl ab af.
2 Dimas eci ibribr fafa eke ligbn am ɛy ɔkm a, l'igb n'aam *uwɔmu ab af.
3 N'am dadarir ɛl ɔfr ɛm l'ɛsɛ: «Kɔ bwo ec'ɛgŋ b'ow wuwl lebn na ek'anŋ uwɔmu a ec'ɛm ɛy usu a oc es ɔŋ ɛy ee?»

4 Gbɛkɔ eke li b'igbl any ogŋ li lɛr a, l'ɛkn eke lob a oc es anŋ saw ɛm.
5 N'im l'ok uwɔmu ab ɛm, ɛtŋ l'ɛkn ŋgbafrɛ nyam eke sig es lidr ogog a, sus mob ufu kpaakp, ɛtŋ ɔyɔw a erŋn ligbɛl am ɔny.
6 Gbɛkɔ ŋgbafrɛ a dad ɛl ninɛ: «Erŋn k'ɔ́ny ɔny; am ɔɔl Nasarɛt e Jesu a eke wɛl ɛw olikŋ af a; l'igb agŋ ek'uw ab ɛm, n'anm aŋa. Lɛ̀ɛr yogŋ a eke wɛl ɛw'r a.
7 Sica ìmn ke dádr *jam ɛsɛl likpr a lele Piɛr ab eke in am ikŋ ɔny anym in im in eku ɔny Galile; yogŋ anake ɔny b'ow ɔny ɛkan in ɛsɛ elel eke in dad ɔny ab af a.»

16.1516
15 Ɛtŋ li dad wɛl ninɛ: «Ìmn wus na nimum af ke ɔ́br Amani Mamn a e kokoba okr agŋ fɛŋ.
16 Ɛgŋ yec'eke b'ow ɔny ɔmn ke wɛl b'ow ok mij nuŋ a, li b'ow n'ɛŋn sel; gbɛkɔ ɛgŋ yec'eke k'ow ɔnym ɔmn a, Nyam b'ow ɔb'r low luw eci.

16.1920
19 Sica eke Ɛs Kɔtɔkɔ Jesu dad ɛl odad bake ow uwr a, n'im afr ɛtŋ li sig es Nyam e lidr abu af.
20 Jam ɛsɛl a im ɛtŋ am ɔb Amani Mamn a e kokoba susu a fɛŋ. Ɛs Kɔtɔkɔ am ɛlum ɛl abu ɛl e juma kok ab ɛm, ɛtŋ mɛny ɛwr fɛŋ eke n'am ɛlu ɔkm a, am yɛgm ek'ɛl ec'odad a el nawrɛ tasi.